IGIHE

Imitobe n’ibinyobwa birimo isukari bishobora kongera ibyago byo kurwara kanseri-Ubushakashatsi

0 13-07-2019 - saa 12:36, Ndayikunda Josué

Ubushakashatsi bushya bwagaragaje ko kunywa ikirahuri kimwe cya mililitiro 100 buri munsi cy’ibinyobwa byifitemo isukari bishobora gutera kanseri ku kigero cya 18% na 22% yo kurwara kanseri y’ibere.

Ubu bushakashatsi bwakorewe ku Bafaransa bakuze barenga ibihumbi 100, buhuza kunywa ibinyobwa birimo isukari no kongera ibyago byo kurwanya zimwe muri kanseri. Burakurikira ubundi bwahuzaga kunywa ibinyobwa birimo isukari n’impfu z’imburagihe.

Umushakashatsti mu by’imirire, Ian Johnson, ahamya ko kunywa ibinyobwa birimo isukari bifite ingaruka mbi zo kurwara kanseri z’ubwoko bwose harimo n’iy’ibere.

Yagize ati “Ubushakashatsi bwagaragaje ko hari isano yo kunywa ibinyobwa by’isukari n’ibyago byo kurwara ubwoko butandukanye bwa kanseri harimo n’iyibere”.

Johnson yanabwiye ikinyamakuru cyandika kuri siyansi cyo mu Bwongereza ko ‘igitangaje ari uko ubwiyongere bw’ibyago byo kurwara kanseri ku banywa ibinyobwa birimo isukari buri no ku banywa umutobe w’umwimerere w’imbuto, icyakora iki kibaka gikeneye ubushakashatsi bwimbitse’.

Mathilde Touvier wayoboye abanditse ubu ubushakashatsi akanabusohorera mu kinyamakuru ‘Medical Journal BMJ’ avuga ko ubu bushakashatsi bwerekana ko ari byiza kugabanya ingano y’ibinyobwa birimo isukari abantu abanywa, kugira ngo barusheho kugira ubuzima buzira umuze.

Ati “Ibyo twabonye ni uko ikiri inyuma ya byose ari isukari iba iri muri ibi binyobwa”.

Akomeza ahamya ko uretse kuba kunywa ibinyobwa birimo isukari bishobora gutera kanseri, ngo bishora no gutera umubyibuho ukabije ndetse no kwiyongera ibiro. Umubyibuho kandi ukaba imwe mu mpamvu zishobora gutera kanseri.

Ubu bushakashatsi buvuga ko abantu bakwiye gukurikiza amabwiriza yo kwirinda kunywa isukari nyinshi ntibarenze ikirahuri kimwe ku munsi.

Itangazo umuvugizi w’ishyirahamwe ry’ibinyobwa muri Leta Zunze Ubumwe za Amerika, Danielle Smotkin, yasohoye, yamaganye iby’ubu bushakashatsi avuga ko ibinyobwa birimo isukari cyangwa ibitayifite ntacyo bitwara ababinywa.

Yagize ati “Ni ibyingenzi ko abantu bamenya ko ibinyobwa byose yaba ibirimo isukari n’ibitayifite ntacyo bitwaye kuko ari muri bimwe bigize indyo yuzuye”.

Avuga ko inganda z’ibinyobwa muri Leta Zunze Ubumwe za Amerika ziri kwigira hamwe uburyo zakora ibinyobwa bifite isukari nke ndetse n’ibitayifite mu rwego rwo guha amahitamo menshi ababinywa.

Mu gihe ubu bushakashatsi bwakorwaga, abantu 2,193 bari mu kigero cy’imyaka 59 basanzwe barwaye kanseri, 693 bari barwaye kanseri y’ibere, 291 barwaye kanseri y’ubugabo (prostate), naho abandi 166 barwaye kanseri y’amara.

Nyamara nubwo bagiye basanga barwaye izo kanseri, ntihagaragazwa neza niba koko byaraturutse ku kunywa ibinyobwa birimo isukari, ari nayo mpamvu inganda z’ibinyobwa zitemeranya n’ubushakashatsi bwakozwe.

Ibinyobwa bidasembuye bishobora gutera ibyago byo kurwara kanseri
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza