IGIHE

Hakusanyijwe arenga miliyoni 5 Frw yo gutera inkunga abafite uburwayi bwa Down syndrome

0 19-05-2024 - saa 09:25, Ntabareshya Jean de Dieu

Umuryango wa Rwanda Down Syndrome Organization (RDSO), ku bufatanye na DuHope, umuryango utanga amahirwe ku bagore bo mu Rwanda kuva mu kazi k’uburaya n’umuryango mpuzamahanga wa KICS Interact club uharanira inyungu rusange, hateguwe igikorwa cyo gukusanya inkunga ingana na miliyoni 5 Frw cyiswe Jofest yo gufasha abafite imiterere ya Down Syndrome gahunda ya Talent4U.

Ubusanzwe Down Syndrome ni indwara ikomoka ku kuba umuntu yavutse afite uture,mangingo ‘chromosomes’ turenze utwo umuntu usanzwe avukana. Iyo bigenze gutyo bigira ingaruka ku mikurire y’ingingo n’imikurire y’ubwonko bw’umwana.

Abana bavukanye Down Syndrome bakunze kugira ku mubiri ibimenyetso birimo nk’amaso asa nk’areba hejuru kandi batinda kumenya kuba bakwikorera buri kintu no kuvuga.

Bashobora kandi kuvuka bafite ibibazo by’umutima hamwe n’ibibazo byo mu mara.

Nubwo Down Syndrome idashobora gukira, abantu bayifite iyo babonye ubufasha hakiri kare ari ubw’ubuvuzi n’ubw’uburezi, bashobora kugera kuri byinshi mu mibereho yabo.

Umuyobozi wa RDSO, Edwige Musabe, yagaragaje akamaro ko kunganira no gushyigikira ubuvugizi bw’imiryango ifite abantu bafite Down syndrome.

Yashimangiye ko hakenewe ubuvuzi bwuzuye no kubona serivisi zihariye kugira ngo abantu bafite Down syndrome bashobora gutera imbere.

Ati “Amafaranga yakusanyijwe azakoreshwa mu gushyira mu bikorwa ingamba zitandukanye zigamije kuzamura imibereho y’abo bana no guteza imbere kwishyira hamwe muri sosiyete binyuze muri gahunda ya RSDO izwi nka Talent4U.”

Yongeyeho ati “Iyo gahunda igamije guha ibikoresho abantu bafite Down syndrome, amahugurwa atandukanye ku bijyanye na tekinike ya barista (gukora ikawa n’ubukorikori bwo gukora utunigi n’udukomo”

Umuyobozi wa DuHope Foundation, Jamie Boiles, yashimangiye ko ayo mafaranga azakoreshwa mu gutanga serivisi z’ingenzi n’inkunga ku bana bafite Down Syndrome hamwe n’imiryango yabo.

Yagaragaje akamaro ko gutabara hakiri kare kandi hagatangwa ubufasha bwo gukemura ibibazo byihariye by’abantu bavukanye ubwo burwayi.

Kuri ubu Jamie Boiles, akoresha abantu babiri bafite Down syndrome kugira ngo barebe ko babona amahirwe yo kubaho mu buzima busanzwe kandi budahejwe.

Perezida wa KICS Interact Club, Lorena Casey Waihiga Mwangi, akaba n’umuyobozi w’umushinga kuri JoyFest, yashimangiye intego za Gahunda ya Talent4U.

Yasobanuye ko ari porogaramu ishaka guha abantu bafite Down syndrome amahugurwa mu buhanga butandukanye, nko gutunganya ikawa n’ubukorikori.

Lorena yagaragaje ko intego ya Talent4U ari uguhangana imyumvire itari yo ku byerekeye ubushobozi bw’abantu bafite Down syndrome no kubona inkunga n’ubumenyi.

Ku rundi ruhande ariko umuterankunga wa KICS Interact Club, Casey Hughes, yagaragaje uruhare rw’abagize iryo tsinda mu gutoza abayobozi bejo hazaza mu birebana n’imirimo.

Yashimiye abanyeshuri ubushake bwo kumenya no gushyigikira ibikorwa nka Talent4U, nk’imwe muri gahunda y’umuryango wa Rwanda Down Syndrome Organization.

Umuryango wa Rwanda Down Syndrome wiyemeje gutera inkunga imiryango ifite abana bafite Down Syndrome, bafashe iyo miryango kwifasha.

Binyuze mu birori bya JoyFest, habayeho ubukangurambaga no gukomeza ibiganiro n’abaterankunga batandukanye kugira haboneke amahirwe adaheza azafasha buri muntu wese hatagize uhejwe mu iterambere.

RDSO yashimye abafatanyabikorwa bayo bakomeje kugaragaza ko bahangayikishijwe n’abantu bafite imiterere ya Down syndrome.

Hasabwe ubufatanye mu gutera inkunga abafite Down syndrome
Abafatanyabikorwa bagaragaje ko gutera inkunga abafite ubu burwayi bishobora kubafasha
Abafite Down Syndrome bagaragaza ko bafashijwe bashobora kwiyungura ubumenyi
Abanyeshuri bo muri Gashora Girls School nabo bitabiriye iki gikorwa
Abana bafite ubu burwayi basabye kwitabwaho byihariye
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza