Abakurikiranira hafi iby’ihohotera rishingiye ku gitsina bavuga ko hari ibimenyetso simusiga bigaragaza ko rigira uruhare rukomeye mu kongera umubare w’abantu bandura Virusi itera Sida, bagasaba ko hakwiye kongerwa imbaraga mu kurikumira kugira ngo n’ubwandu bushya bukumirwe.

Imibare y’Ikigo cy’Ibarurishamibare (NISR) ya 2015, yerekanye ko ubwandu bushya mu Rwanda bumaze imyaka isaga 10 kuri 3%, ab’igitsina gore bari hejuri kuri 3,6% naho abagabo kuri 2,2%. Iyi mibare kandi igaragaza ko abanyarwanda 22% bakorerwa ihohotera rishingiye ku gitsina, rishobora kuganisha ku bwandu bw’agakoko gatera Sida, naho 45,8% by’abantu bakora uburaya, bafite Virusi itera Sida.

Mu nama Urugaga Nyarwanda rw’ababana na Virusi itera Sida rwagiranye na Polisi, Minisiteri y’Uburinganire n’Iterambere ry’Umuryango, Ikigo cy’Igihugu cyita ku Buzima n’izindi, kuri uyu wa Gatatu, ihohotera rishingiye ku gitsina ryagaragajwe nk’imbogamizi ikomeye ku gukumira ubwandu bushya bwa Virusi itera Sida.

Umwe mu babana n’ubwandu bwa Virus itera Sida, yatanze ubuhamya bw’ukuntu yakorewe ihohotera n’abo mu muryango we, bituma atangira gukora uburaya bwamusigiye Virus Itera Sida, na nyuma muri uwo mwuga yagiye ahuriramo n’abagabo bakamukoresha imibonano idakingiye ku gahato.

Umunyamabanga Nshingwabikorwa w’Urugaga Nyarwanda rw’ababana na Virusi itera Sida, Semafara Sage, yavuze ko nubwo nta bushakashatsi bwihariye burakorwa bugaragaza neza abanduye Sida bitewe n’ihohotera, hari ubuhamya bw’abantu bakora uburaya bafite virus itera Sida bahohoterwa bagakoreshwa imibonano idakingiye kandi ko bishobora kuganisha ku bwandu bushya.

Yakomeje asaba abo bireba guhuza ibikorwa n’ingamba zihariye zigamije gukumira ihohotera na Virus itera Sida.

Yagize ati “Turifuza ko muri gahunda zo kurwanya ihohotera rishingiye ku gitsina zose bazajya batekereza ku baturage, ko hari abana b’abakobwa n’abagore bafite Virus itera sida n’abagore babana n’abagabo badahuje ibisubizo, abo baba bafite ibyago cyane […] Nta mikoranire Migeprof igirana na RPP+ kugira ngo twigire hamwe ikibazo cy’abo bantu mu ihohotera rishingiye ku gitsina ngo dushakire hamwe umuti.”

Umukozi wa RBC ushinzwe ubuzima bw’abari n’abangavu bafite ubwandu bwa Virus itera Sida, Kamali Innocent, yahamije ko ihohotera rishingiye ku gitsina ritera ubwiyongere bwa Virus itera Sida, avuga ko hakenewe ubufatanye bw’inzego zitandukanye mu kurikumira.

Ku munsi mpuzamahanga wo kurwanya Sida uyu mwaka, u Rwanda rwahisemo insanganyamatsiko ishishikariza abantu kwipimisha ubwandu bwa Virus itera Sida no gufata neza imiti igabanya ubukana ku wanduye aho igira iti “Twipimishe Sida, k’uyifite, gutangira no kuguma ku miti ni ubuzima burambye.”

U Rwanda kandi ruri mu bukangurambaga bugamije kurwanya ihohotera rishingiye ku gitsina, aho rwihaye insanganyamatsiko igira iti “Rwanya ihohotera rikorerwa abana b’abakobwa n’abagore, wirihishira.”

Inzego zitandukanye zasabwe gushyira imbaraga mu gukumira ihohoterwa kugira ngo ubwandu bushya bwa Sida bwe kubona icyuho bwinjiramo
Bamwe mu bitabiriye inama Urugaga Nyarwanda rw’ababana na Virusi itera Sida rwagiranye na Polisi, Minisiteri y’Uburinganire n’Iterambere ry’Umuryango, Ikigo cy’Igihugu cyita ku Buzima n’izindi
Umunyamabanga Nshingwabikorwa w’urugaga Nyarwanda rw’ababana na Virusi itera Sida, Semafara Sage

[email protected]


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved