IGIHE

Goma: Babiri mu bari bagaragaje ibimenyetso bya Ebola barakize basubira mu miryango yabo

2 13-08-2019 - saa 19:32, Mukwaya Olivier

Inzego z’ubuzima muri Repubulika Iharanira Demokarasi ya Congo (RDC) zemeje ko abarwayi babiri muri bane bagaragaje ibimenyetso by’indwara ya Ebola bakize ndetse basubira mu miryango yabo.

Aya makuru yemejwe n’Umuyobozi w’Ikigo cy’Igihugu cy’Ubushakashatsi mu buvuzi muri RDC, Prof Muyembe Jean-Jacques.

Yagize ati “Mu byishimo byinshi turabamenyesha ko mu barwayi bane twari dufite, babiri bamaze gukira. Ibi ni ukwemeza ko Ebola ari indwara ivurwa igakira kandi imiti iyivura irahari.’’

Abashakashatsi bagaragaje ko Ebola ishobora kuvurwa igakira, nyuma y’uko igerageza rimaze igihe ku miti ibiri muri RDC ryerekanye ko iha umurwayi amahirwe yo gukira ku kigero kiri hejuru, ugereranyije n’isanzwe.

Ishami ry’Umuryango w’Abibumbye ryita ku Buzima, OMS, n’Ikigo cy’Abanyamerika gishinzwe indwara zandura ni byo byateye inkunga igeragezwa ry’imiti mishya irimo REGN-EB3 na mAb114, irwanya virusi ya Ebola mu maraso.

Prof Muyembe yavuze ko “Ni yo tuzakomeza gukoresha tugendeye ku musaruro irimo gutanga, birerekana ko ishoboye guhangana na Ebola.’’

Inkuru yo gukira kw’abantu babiri mu barwayi bari bagaragaweho Ebola yakiranywe ubwuzu n’abaturage bo mu Mujyi wa Goma, bajya kubyinira intsinzi mu mihanda.

Byakurikiye isezererwa ry’umubyeyi n’umusore bari basigaye mu kigo gishinzwe kwakira abarwayi ba Ebola, nyuma yuko bigaragaye ko bakize.

Uyu mugore yavuze ko akomoka muri Teritwari ya Nyiragongo ihana imbibi n’Umujyi wa Goma akaba yavuze ko yitaweho neza mu Kigo cyita ku barwayi ba Ebola muri Hôpital Général de Goma.

Guverinoma ya RDC n’iy’u Rwanda ziheruka kwemeranya ubufatanye mu gushaka uburyo bwo guhagarika Ebola, binyuze mu guhanahana amakuru no gusangira ubunararibonye.

Imibare y’Ishami ry’Umuryango w’Abibumbye ryita ku buzima, igaragaza ko Ebola imaze guhitana abantu hafi 1900 muri Repubulika iharanira Demokarasi ya Congo.

Abaturage b'i Goma bishimiye inkuru yuko abarwayi ba Ebola bakize ndetse bakaba boherejwe mu rugo
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Twin Yeah 2019-08-14 08:26:39

Imana ishimwe cyane kuba bakize icyo cyago! Ebola yanteye ubwoba bitabaho! Ubwo effects z,imiti mishya zagaragaye, nigezwe henshi!

2
Baremmy 2019-08-13 14:05:43

Uwiteka nahabwe icyubahiro!
kandi abigizemo uruhare bose barakoze!

Kwamamaza