ArmyWeek: Abagore babiri bari bafite ibibyimba by’ibiro bitandatu muri nyababyeyi babazwe n’abasirikare

2 7-06-2017 - saa 07:12, Uwishyaka Jean Louis

Abagore babiri bo mu Karere ka Nyamasheke bashobora kuba batazibagirwa igikorwa cy’indashyikirwa bakorewe n’Ingabo z’u Rwanda binyuze mu cyumweru cyahariwe ibikorwa byazo ‘Army Week’, aho bavuwe ibibyimba bari bamaranye igihe kitari gito muri nyababyeyi.

Aba babyeyi bavuriwe ku Bitaro bya Bushenge muri ako karere ngo bagiye basabwa gutegereza kuvurwa ariko ntibikorwe ahanini kubera umubare munini w’ababaga bategereje ubwo butabazi.

Nyuma y’imyaka itatu afashwe n’ubu burwayi akabwirwa ko bamuroze igituntu cy’ababyeyi, Umuhoza [izina ryahinduwe] w’imyaka 45, yabazwe ikibyimba cy’ibiro bitandatu cyari cyarafashe mu nda ibyara [nyababyeyi] ku buryo ngo atabashaga kugira icyo yikorera. Ni igikorwa cyakozwe n’inzobere z’abaganga mu Ngabo z’u Rwanda, kimara isaha n’igice.

Uretse uwo, undi mubyeyi w’imyaka 41 nawe yagobotswe n’inzobere z’abasirikare mu kubaga indwara zinyuranye, zibasha kumukiza icyo kibyimba cy’ibiro bitandatu yari amaranye umwaka ku gasabo k’intanga ngore, ibyo aba bombi kimwe n’abandi bahawe ubuvuzi bakorewe nta n’iripfumuye batanze.

Inzobere mu kubaga mu Bitaro bya Gisirikare i Kanombe, akaba n’uwari uyoboye itsinda ry’abaganga batanze ubufasha kuri abo babyeyi, Maj Dr Bukuru John, yabwiye IGIHE ko aba babyeyi bombi babashije kuvurwa mu gihe gito gishoboka ndetse habungabungwa ubuzima bwabo dore ko n’uwashaka kubyara nta kibazo yagira.

Atanga urugero kuri umwe muri abo bagore, yagize ati “Twaramubaze ariko umura ntabwo bawukuyemo, icyo gihe iyo bagikuyemo [ikibyimba] cyonyine umuntu ashobora kongera kubyara ariko nyababyeyi yarayisigaranye ikindi tukivanamo kugira ngo tumuhe amahirwe yo gukomeza kubyara.”

Maj Dr Bukuru yasobanuye ko ubu burwayi budakunda kugaragara cyane, buterwa n’uko imisemburo mu mubiri iba yakozwe ku kigero kitangana (Hormone imbalance) ndetse no kuba uturemangingo tw’umubiri dukura mu buryo budasanzwe ku buryo bishobora kuba byagera no ku kigero cyo kurwara kanseri.

Agira inama igitsina gore kujya bitabira cyane gahunda zo kwisuzumisha kugira ngo ugaragayeho ubwo burwayi afashwe hakiri kare. Yavuze kandi ko mu gihe hari umubyeyi wumvise ikibyimba mu nda ye yajya yihutira kujya kwa muganga kugira ngo barebe ikibazo afite ndetse kibashe gukemurwa mu maguru mashya.

Iki gikorwa kije gikurikira ikindi cyabereye mu Bitaro bya CHUK, aho umwana wo mu Murenge wa Rukara mu Karere ka Kayonza, wari waravukanye ikibyimba ku bwonko cyarutaga umutwe we, yakibazwe ndetse igikorwa kigenda neza. Abaganga muri ibyo bitaro batangaje ko kuva mu 2006 abana bagera ku 10 bafite ubwo burwayi bamaze kubivurirwamo ubwo burwayi.

Inzobere mu kuvura indwara zinyuranye akaba ari nawe ushinzwe ibikorwa by’ubuvuzi muri Army Week, Lt Col Dr King Kayondo, yavuze ko abafite indwara nk’izo z’ibyimba bakunda guhura n’ikibazo cyo kutabagwa vuba ahanini bishingiye ku mubare muke w’abaganga b’inzobere mu kubaga ubwo burwayi.

Ibyo wamenya ku burwayi bw’ibyo bibyimba

Ubu burwayi buzwi nka ‘Cyst ovarian’, ni ibintu biba bimeze nk’udufuka turimo amazi dufata muri nyababyeyi y’umugore uri mu myaka yo kubyara. Ubwo burwayi nta bimenyetso bidasanzwe bugira iyo bugifata umuntu uretse kuba ubufite yagira umuriro, kuribwa mu nda, gucika intege gusa akenshi bugaragazwa n’isuzuma rya muganga.

Ibyo bibyimba bishobora gutuma umugore ubirwaye ahorana ububabare bukabije mu kiziba cy’inda ndetse uko iminsi yicuma bikagenda byiyongera mu ngano ku buryo biba ngombwa ko bibagwa kugira ngo bikurwemo.

Umwe muri aba babyeyi mbere yo kubagwa
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Furaha 2017-06-07 17:38:25

Imana ijye ibongerera nukuri kubwitange mutanga.Dr Bukuru ni umuhanga cyane.

2
Ange 2017-06-07 11:09:10

Ingabo Zacu Imana izihe umugisha kdi izongerere ubumenyi bwo Kwita kumbabare

Kwamamaza