IGIHE

Ibigo by’ubwishingizi mu rugamba rwo kongera ubumenyi bukenewe ku rwego mpuzamahanga

0 31-07-2019 - saa 12:38, Evariste Nsengimana

Ishyirahamwe ry’ibigo by’ubwishingizi mu Rwanda, ASSAR, ryatangije icyiciro cyihariye cy’amahugurwa y’abakora mu bigo by’ubwishingizi, yitezweho kubafasha kugira ubumenyi n’ubunyamwuga, bakabiherwa n’impamyabumenyi zo ku rwego mpuzamahanga.

Aya mahugurwa yafunguwe ku wa 30 Nyakanga 2019, yateguwe na ASSAR ifatanyije n’ibigo birimo Ishuri rya Kenya ry’Ubwishingizi.

Arimo ibyiciro byinshi bizitabirwa n’abasaga 300 barimo 180 bazahabwa amahugurwa y’ibanze. Muri ibyo byiciro harimo icy’abazahabwa ubumenyi fatizo mu by’ubwishingizi kizatangirwamo ubumenyi rusange kandi buri mukozi cyangwa umushoramari muri serivisi z’ubwishingizi.

Hazakurikiraho icyiciro kisumbuye cy’amahugurwa agaragaza ko umuntu afite ubumenyi bwisumbuye mu by’ubwishingizi. Iki kizakurikirwa n’igitanga impamyabumenyi mu by’ubwishingizi.

Ufite iyi mpamyabumenyi azaba yemerewe gukora mu bigo by’ubwishingizi cyangwa abunganira abakiliya mu by’ubwishingizi. Iki kizakurikirwa n’icyiciro cyisumbuyeho nacyo gitangirwamo impamyabushobozi mu by’ubwishingizi.

Biteganyijwe ko aya mahugurwa agenewe abasanzwe bari mu bigo by’ubwishingizi n’abandi bifuza kwinjira mu mwuga badafite ubwo bumenyi biyandikishije, bazajya bahurira ku cyicaro cya ASSAR kiri mu nyubako ya M Peace Plaza.

Umuyobozi wa ASSAR akaba n’umuyobozi wa MUA (Mauritius Union Assurance Company Limited), Gaudens Kanamugire, yabwiye IGIHE ko kugira ngo utange serivisi z’ubwishingizi ugomba kuba ubihugukiwe ku buryo serivisi utanga ziri ku rwego mpuzamahanga.

Yavuze ko aya mahugurwa azafasha gukemura ibibazo bigaragara mu rwego rw’ubwishingizi mu Rwanda birimo ubunyamwuga butaragera ku rwego mpuzamahanga nk’uko byifuzwa.

Ati “Mu gihe isoko ry’ubwishingizi rimaze mu Rwanda, byagaragaye ko harimo icyuho. Twagiye tugirwa inama yo kuzamura ubumenyi n’ubunyamwuga mu kazi dukora ariko twashaka ababifitemo impamyabumenyi tukababura bigatuma akazi kadakorwa neza, abagana ibigo by’ubwishingizi ntibabone serivisi ku rwego mpuzamahanga.”

Kanamugire yavuze ko umuntu ukirangiza kwiga utangiye gukora mu bigo by’ubwishingizi, bisaba nibura imyaka ibiri kugira ngo abe ari ku rwego mpuzamahanga mu gutanga izo serivisi.

Ni amahugurwa kandi atangijwe mu rwego rwo gushyira mu bikorwa inama ASSAR yagiye igirwa na Banki Nkuru y’u Rwanda na Minisiteri y’imari n’igenamigambi, zo kuzamura urwego rwa serivisi z’ubwishingizi.

Aya mahugurwa yitezweho kuganisha ASSAR ku nzira yo gushinga ikigo kihariye gitanga ayo mahugurwa mu Rwanda (Rwanda College of insurance).

Kanamugire yasabye abazahabwa aya mahugurwa kuyabyaza umusaruro ‘n’urubyiriko rwahitagamo amahugurwa rusange, rwahitamo aya yihariye kuko uwayahawe bimwongerera amahirwe yo kubona akazi bitamugoye’.

Umuyobozi Mukuru muri Banki Nkuru y’u Rwanda ushinzwe ubutajegajega bw’urwego rw’imari, Peace M. Uwase, yashimiye intambwe ASSAR iteye yo kongera ubushobozi n’ubunyamwuga bw’abakozi b’urwego rw’ubwishingizi mu Rwanda binyuze muri aya mahugurwa.

Nzanana Emmanuel akora mu ishami ry’ubucuruzi muri Soras, yavuze ko aya mahugurwa bayitezeho kubungura ubumenyi mu gukora akazi kinyamwuga.

Ati “Iyo urebye usanga abakora akazi k’ubwishingizi babyigiye by’umwuga ubona umubare ukiri hasi, cyane ko nta n’amashuri ahari yo kubyiga, abagiye babyiga babyigiye hanze. Kuba bitangijwe rero ni amahirwe ku bakora ibijyanye n’ubwishingizi kuko bagiye kubona ubumenyi bujyanye n’ibyo bakora.”

Kugeza uyu munsi ASSAR igizwe n’ibigo by’ubwishingizi byigenga 12 ariko n’abakora mu bigo by’ubwishingizi bya Leta bemerewe kwitabira aya mahugurwa.

Abakozi b'ibigo by'ubwishingizi n'abayobozi babyo bitabiriye iki gikorwa
Abayobozi barimo kureba ibikubiye mu mahugurwa azatangwa
Abakozi n'abayobozi b'ibigo by'ubwishingizi barimo kumenyeshwa imiterere y'amahugurwa azatanwga
Ubwo hamurikwaga igitabo gikubiyemo amasomo bazahabwa
Bamwe mu bagize ihuriro ASSAR bitabiriye itangizwa ry'aya mahugurwa
Iki gikorwa cyajyanye no gusangira hagati yabo
Nzanana Emmanuel ukora mu ishami ry’ubucuruzi muri Soras, yavuze ko aya mahugurwa bayitezeho kubungura ubumenyi mu gukora akazi kinyamwuga
Umunyamabanga nshingwabikorwa wa ASSAR, Majoro Jean Pierre wari uyoboye ibiganiro
Umuyobozi Mukuru muri BNR ushinzwe ubutajegajega bw'urwego rw'imari, Peace M. Uwase, yashimiye intambwe ASSAR iteye yo kongera ubushobozi bw’abakozi
Gaudens Kanamugire avuga ko kugira ngo utange serivisi z’ubwishingizi ugomba kuba ubihugukiwe

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza