IGIHE

U Rwanda rugiye kwemeza burundu ishyirwaho ry’akarere k’ubucuruzi kazahuza COMESA, EAC na SADC

0 10-07-2019 - saa 20:26, Habimana James

Abagize Inteko Ishinga Amategeko y’u Rwanda, bamazwe impungenge kuri gahunda rurimo yo kwemeza amasezerano ashyiraho Agace k’Ubucuruzi n’Ubuhahirane butagira umupaka gahuriweho n’Isoko Rusange ry’Ibihugu by’Afurika y’Iburasirazuba n’Amajyepfo, (COMESA), Umuryango w’Ibihugu byo mu Majyepfo ya Afurika (SADC) n’Umuryango wa Afurika y’Iburasirazuba, EAC.

Muri Kamena 2015 abakuru b’ibihugu bagize iyi miryango uko ari itatu bahuriye i Sharm El Sheikh mu Misiri, bashyira umukono ku masezerano ashyiraho akarere k’ubucuruzi gahuza COMESA, SADC na EAC, kiswe Tripartite Free Trade Area.

Iyi miryango igizwe n’ibihugu 26 bituwe n’abaturage miliyoni 700, binafite umusaruro mbumbe ugera kuri miliyari 1000 z’amadorali ya Amerika.

Kugira ngo aya masezerano atangire gukora bizasaba ko abanza kwemezwa burundu n’ibihugu 14, ariko kugeza ubu ibihugu 22 kuri 26 nibyo byamaze kuyasinya, naho ibihugu bine aribyo Kenya, Misiri, Uganda na Afurika y’Epfo byamaze kuyemeza burundu.

Zimwe mu nyungu ibi bihugu bivuga ko bizungukira mu ihuzwa ry’iyi miryango harimo koroshya ubucuruzi, gukuraho inzitizi zishingiye ku bicuruzwa, gushyiraho ubwisanzure bw’ubucuruzi bwa serivisi, kunoza ishoramari, inganda n’ibindi.

Kuri uyu wa Gatatu Minisitiri w’Ubucuruzi n’Inganda, Hakuziyaremye Soraya yari imbere y’Inteko rusange y’Umutwe w’abadepite, ayisaba gutora itegeko ryemera kwemeza burundu amasezerano ashyiraho Agace k’Ubucuruzi n’Ubuhahirane butagira umupaka gahuriweho n’Isoko Rusange ry’Ibihugu by’Afurika y’Iburasirazuba n’Amajyepfo, Umuryango w’Ibihugu by’Afurika y’Iburasirazuba.

Yagize ati "Gushyiraho aka gace k’ubucuruzi n’ubuhahirane bitagira umupaka muri iyi miryango itatu bizateza imbere ubucuruzi hagati y’utu turere. Inyungu u Rwanda ruteganya muri aya masezerano ni uko nk’igihugu kidakora ku mazi magari bizagabanya ibiciro, ibicuruzwa bikorerwa mu Rwanda bibashe kugera ku isoko rinini."

Abadepite bagaragaje impungenge kuri uyu muryango aho bavugaga ko imisoro ishobora kuzagabanuka, igihugu kandi kigakomeza gutanga imisanzu myinshi mu miryango kibamo.

Depite Frank Habineza ati "Mwatubwiye inyungu u Rwanda ruzavana muri ubu bufatanye ariko mugomba no kutubwira ibihombo birimo, ko nzi ko hari amafaranga dutanga mu miryango yindi turimo nka EAC, ubu ntitwaba tugiye gutanga andi?"

Depite Senani Benoît we yagize ati "Mu bikorerwa mu Rwanda dusanzwe dufite ikibazo ko ibiciro byabyo biri hejuru ugereranyije n’ibikorerwa muri ibyo bihugu, rimwe na rimwe kandi usanga ibyo dukora ubuziranenge bwabyo butari hejuru ku buryo byahangana n’ibyo kuri iryo soko.”

Minisitiri Hakuziyaremye yavuze ko nta gihombo u Rwanda ruzavana muri ubu bufatanye kuko ngo mbere yo gukora amasezerano, hari ibyo ibi bihugu bibanza kwemeranyaho.

Ati "Iyo tugiye gukora aya masezerano buri gihugu kiba gifite ibyo gikora bitaratera imbere, kikaba kidashobora kwemera ko ibicuruzwa bimeze nk’ibyo biva hanze bidatanze imisoro ku buryo byabangamira bya bindi by’imbere mu gihugu.”

Ku birebana n’uko u Rwanda rushobora kuzajya rutanga umusanzu muri uyu muryango, Hakuziyaremye yavuze ko nta mafaranga ruzatanga kuko hari ayo rusanzwe rutanga muri EAC.

Nyuma yo kumva ibi bisobanuro, Inteko Rusange yatoye itegeko ryemera kwemeza burundu aya masezerano ashyiraho aka gace k’Ubucuruzi n’Ubuhahirane butagira umupaka gahuriweho n’Isoko Rusange ry’Ibihugu by’Afurika y’Iburasirazuba n’Amajyepfo, Umuryango w’Ibihugu by’Afurika y’Iburasirazuba.

Minisitiri Hakuziyaremye yavuze ko u Rwanda ruzungukira byinshi muri aka gace k'ubucuruzi
Inteko Rusange y'Abadepite yatoye itegeko ryemera kwemeza burundu aya masezerano ashyiraho aka gace k’Ubucuruzi n’Ubuhahirane butagira umupaka gahuriweho n’Isoko Rusange ry’Ibihugu by’Afurika y’Iburasirazuba n’Amajyepfo, Umuryango w’Ibihugu by’Afurika y’Iburasirazuba
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza