Skol ikomeje gukabya inzozi za ba ‘Mugisha’ b’ejo hazaza ibaha amagare ku buntu

0 9-08-2018 - saa 08:38, Manzi Rema Jules

Uruganda rwa Skol rushyigikira umukino w’amagare mu buryo bwihariye ndetse rukaba n’umuterankunga w’imena wa Tour du Rwanda 2018 rukomeje gukabya inzozi z’abakiri bato bifuza kuzagera ikirenge mu cya Mugisha Samuel ukomeje kwigaragaza muri Tour du Rwanda 2018 rubaha amagare ku buntu.

Kuva iri rushanwa ryatangira tariki 5 Kanama, ahantu hose risorejwe, uruganda rwa Skol rumaze kubaka izina mu gukora ibinyobwa bisembuye n’ibidasembuye mu Rwanda, rushyiraho irushanwa ry’abakiri bato biyizera ko bafite impano yo kunyonga igare.

Bahabwa amagare [yihariye anyongwa atava aho ari kenshi akoreshwa n’abakinnyi b’uyu mukino bishyushya], bakarushanwa kunyonga babiri babashije kubikora igihe kirekire kandi bihuta cyane kurusha abandi bagahabwa igare rishya, ryiza mu rwego rwo kubafasha gukabya inzozi bazo.

Igiraneza Patrick w’imyaka 19, umwe mu begukanye iri rushanwa mu Karere ka Karongi kuri uyu wa Gatatu nyuma y’agake ka kane ka Tour du Rwanda, aganira na IGIHE yagaragaje ibyishimo bidasanzwe ashimira uru ruganda rumufashije kugera ku nzozi yari amaranye igihe zo gutunga igare rye, anashimangira ko rizamufasha kuba nawe yaba umwe mu bakinnyi b’uyu mukino.

Yagize ati “Biranshimishije cyane gutsinda iri rushanwa nkabasha kwegukana igare. Iyi ni siporo nkunda cyane no mu rugo tugira igare, uko mbonye rihari ntawarijyanye njya mu muhanda gukora imyitozo kuko ndayikunda cyane. Nahoraga nibaza uko nzabona iryanjye none ndashimira Skol, navuga ngo iragahoraho.”

Uyu musore usanzwe ari n’umukanishi wabyize mu mashuri yisumbuye akaba anitegura kujya muri kaminuza, yashimangiye ko ku myaka 19 igihe kitaramurengana, nawe ashobora kuzaba umukinnyi usiganwa ku magare cyane ko mu Karere ka Karongi bafite n’amahirwe ko hari ikigo cyigisha uyu mukino “Karongi Vision Spots Center” kinafite ikipe ikina amasiganwa ya Ferwacy.

Umuyobozi wa SKOL mu Rwanda, Ivan Wullfaert wari i Karongi ndetse ujyana na Tour du Rwanda mu gihugu hose, yabwiye IGIHE ko nk’uko umukino w’amagare usanga Abanyarwanda aho bari ukabashimisha, ari nako Skol ihora ibazirikana inabifuriza ibyiza.

Yagize ati “Iyo urebye uburyo abantu baba baje kureba amagare ari benshi cyane, uhita ubona ko ari umukino ukunzwe kandi worohera abantu kuko ntibisaba kwishyura. Umuntu aba ashobora gukora cyangwa kureba umukinnyi akunda amwegereye.”

Yakomeje agira ati “Na Skol isangiye indangagaciro n’uyu mukino kuko nitwe ruganda rwegera abantu aho bari kandi tukabaha ibyo bashaka byose mu buryo bworoshye kuko intego yacu ni uguhuza abantu kandi bakishima.”

Avuga kuri tombola Skol yashyizeho muri Tour du Rwanda, Wullfaert yagize ati "Ntabwo ari amagare gusa dutanga, harimo n’ibindi bikoresho bitandukanye nka telefone zigezweho. Amagare twayashyizemo mu rwego rwo gufasha urubyiruko rukunda uyu mukino kubona ibikoresho kandi twizera ko hashobora kuzagira abayakoresha neza wenda mu gihe kiri imbere nabo bakazaba bambaye umwenda w’igihugu.”

Skol yafashe iya mbere, ibanziriza abandi baterankunga kongera amasezerano n’Ishyirahamwe ry’umukino wo gusiganwa ku magare (Ferwacy) yo kuzakomeza gutera inkunga Tour du Rwanda kuva umwaka utaha ubwo izaba imaze kuzamurwa mu byiciro ibaye imwe muri ebyiri zikomeye muri Afurika kimwe na La Tropical Amissa Bongo.

Uru ruganda rufite icyicaro gikuru mu Nzove mu Murenge wa Kanyinya mu karere ka Nyarugenge ariko rukagira abaruhagarariye muri buri gace ko mu Rwanda, rukora ibinyobwa by’umwimerere bitandukanye birimo Panache Lemon, Skol Lager, Skol Malt, Skol 5, Virunga Mist, Virunga Gold n’ibindi kandi byose biboneka mu macupa abereye ijisho bikagira n’icyanga ntagereranywa.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza