RwandAir yabonye umufatanyabikorwa w’imena mu kwita ku bakiliya

0 13-06-2018 - saa 10:40, Ishimwe Israel

Sosiyete Nyarwanda ikora ingendo zo mu kirere, RwandAir, yasinye amasezerano y’imikoranire n’Ikigo kizobereye muri Serivisi z’ubwikorezi cya NAS (National Aviation Services), azafasha mu guha abagenzi serivisi zinoze.

Aya masezerano yashyizweho umukono ku wa 11 Kamena 2018, yiswe NAS RwandAir Limited, byahurijwe hamwe nk’ikigo kizagenzura imiterere y’aho abagenzi bategerereza mbere yo kurira indege ku Kibuga Mpuzamahanga cya Kigali i Kanombe.

Mu nshingano z’ibanze za NASRwandAir harimo kubaka ahantu ho kwakirira abagenzi mu byiciro bitandukanye birimo icy’abakiliya b’imena n’icy’abageze ku kibuga bava mu bindi byerekezo. Ibi bizanajyana no kugenzura aho abakiliya bajyanywe n’izindi kompanyi bahagurukira.

Umuyobozi wa RwandAir, Yvonne Manzi Makolo, yatangaje ko imikoranire mishya na NAS nk’ikigo gifite ubunararibonye, igamije kunoza uburyo bwo kwakira no guha serivisi nziza abagenzi.

Yagize ati “Imikoranire ya NAS na RwandAir iri mu mujyo wa gahunda nyinshi zibanda ku kuzamura umwimerere wa serivisi nziza zihabwa ab’imena kuva aho batuye kugera ku kibuga cy’indege, aho bazasanganizwa mu nyubako zivuguruye n’intebe zagutse zo kuruhukiraho bari mu ndege.”

Ahakirirwa abagenzi (lounges) ku kibuga hatangirwa serivisi zirimo WiFi, kuharuhukira, gufata ifunguro n’ibindi. NASRwandAir izajya inatanga ubufasha ku bagenzi mu gihe cyo gusaka imizigo no kugenzura ibyangombwa byabo mu rwego rw’abinjira n’abasohoka.

Umuyobozi wa NAS, Hassan El Houry, yatangaje ko bahisemo gukorana na RwandAir nka sosiyete igaragaza ahazaza heza.

Yagize ati “Gukorana na RwandAir iri mu ziri kuzamuka cyane mu bijyanye n’ubwikorezi bwo mu kirere ni uguha agaciro uburyo uru rwego rutera imbere mu Rwanda. Igihugu cyagaragaje iterambere ridasanzwe ndetse ni izingiro rya NAS muri Afurika. Uko dushinga imizi mu karere, tuzakomeza gukoresha imbaraga mu kongera serivizi nziza mu gihugu no kugira uruhare mu iterambere ryacyo.”

NAS ifite inkomoko muri Kuwait aho yashinzwe mu 2003, imaze gukorera ku bibuga by’indege birenga 30 mu bihugu birimo ibyo mu Burasirazuba bwo Hagati, Afurika n’ibya Aziya.

Iki kigo gifite abakozi barenga 8,000 batanga serivisi zijyanye n’ubwikorezi bwo mu kirere, kigenzura ikompanyi zirindwi zikomeye mu by’indege, n’ahantu abagenzi bategerereza hagera kuri 31.

RwandAir yinjiye mu mikoranire mishya na NAS, imaze kuba ubukombe mu ngendo z’indege muri Afurika no ku yindi migabane, ifite indege 12 zirimo Airbus A330 ebyiri yaguze mu mwaka ushize.

Ubu igana mu byerekezo 26 birimo Uburasirazuba, Uburengerazuba n’Amajyepfo ya Afurika, Uburasirazuba bwo Hagati, u Burayi na Aziya.

Mu mwaka ushize, RwandAir yatangije ingendo zerekeza i Mumbai mu Buhinde, Harare muri Zimbabwe, Londres (Gatwick) mu Bwongereza na Bruxelles mu Bubiligi. Iyi Sosiyete yanatangije ingendo zigana i Dakar muri Sénégal, Abidjan, Libreville na Brazzaville zihagurukiye i Cotonou muri Bénin .

Muri Mata uyu mwaka, RwandAir yakandagiye bwa mbere i Abuja muri Nigeria na Cape Town muri Afurika y’Epfo.

Biteganyijwe ko uyu mwaka uzarangira, RwandAir igana mu Mujyi wa Addis Ababa muri Ethiopia; mu gihe mu 2019 ifite intego zo kwerekeza Guangzhou, Tel Aviv, Bamako na Conakry no kugana ku isoko rya Amerika muri Leta ya New York.

Abagenzi bategereje gufata ingendo bategereje ku Kibuga Mpuzamahanga cy'Indege cya Kigali
Hazajya hanatangirwa serivisi zitandukanye zigamije gufasha abagenzi
Muri ubu bufatanye hazubakwa ahandi hantu abagenzi bategerereza indege
RwandAir yabonye umufatanyabikorwa uzayifasha gutanga serivisi ku bakiliya b'Imena
Umuyobozi wa RwandAir, Manzi Yvonne Makolo
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza