IGIHE

Nta cyahindutse ku bucuruzi bw’u Rwanda na Congo kubera Ebola

1 20-08-2019 - saa 10:40, Ferdinand Maniraguha

Minisiteri y’Ubucuruzi n’Inganda (Minicom) yatangaje ko nta cyahindutse ku bucuruzi bw’u Rwanda na Repubulika Iharanira Demokarasi ya Congo nyuma y’aho mu mijyi ya Goma na Bukavu ihana imbibi n’u Rwanda hagaragaye icyorezo cya Ebola.

Minicom yatangaje ko urujya n’uruza rwagabanyutse ariko ko bitahungabanyije ubucuruzi bw’ibihugu byombi.

Mu ntangiriro za Kanama 2019, Minisiteri y’Ubuzima mu Rwanda yasabye Abanyarwanda guhagarika ingendo zitari ngombwa muri RDC nyuma y’uko muri icyo gihugu hagaragaye icyorezo cya Ebola.

Ni nyuma y’uko mu Mujyi wa Goma uhana imbibi n’u Rwanda hari hamaze gupfa abantu batatu bishwe na Ebola.

Mu cyumweru gishize, Abanyarwanda bakorera muri Repubulika Iharanira Demokarasi ya Congo cyane cyane mu Mujyi wa Goma, basabwe kwishyura Visa kugira ngo bakomeze akazi kabo nk’uko bisanzwe.

Abakora nk’ubucuruzi buciriritse, abafundi n’abayede cyangwa abacuruzi bakomeye, ntibemerewe kunyura ku mupaka munini cyangwa umuto uhuza u Rwanda na RDC ku buntu, bagomba kwishyura icyangombwa kibemerera gukorera muri RDC (visa de séjour’) ku $20 ku mwaka, ni ukuvuga asaga ibihumbi 18 Frw.

Mu kiganiro yagiranye n’Umuyobozi Mukuru ushinzwe Ubucuruzi n’Ishoramari muri Minisiteri y’Inganda n’Ubucuruzi, Robert Opirah, yavuze ko Ebola itahungabanyije ubucuruzi bw’u Rwanda na Congo.

Yagize ati “Ubucuruzi nta kibazo buri kugenda nkuko busanzwe bukorwa, icyakozwe ni ukureba uburyo u Rwanda rwagabanya ibibazo Abanyarwanda ashobora guhura nabyo by’uburwayi, ku buryo aho kuba abantu bahoraga bagenda ari benshi ahubwo ibicuruzwa byabo bishyirwa hamwe bikagendera hamwe, bakamenya uko bafashwa kwirinda n’Abanye-Congo baza kubitwara bagafashwa kwirinda.”

Opirah yavuze ko urujya n’uruza rw’abantu rwagabanyutse, ariko ngo mu mibare nta cyahindutse.

Ati “Mu bijyanye n’imibare, mu bijyanye n’ibyoherezwagayo nta cyahindutse. Hanyuma ariko tukareba ko n’ubukungu bw’abacuruzi babikoraga budahagaritswe n’ingamba zigenda zifatwa kugira ngo ubucuruzi bukomeze ariko ubuzima bw’Abanyarwanda n’abatugana bubungabungwe.”

Repubulika Iharanira Demokarasi ya Congo yatangaje ko igiye gutangiza igikorwa cyo gukingira Ebola abakora ubucuruzi bwambukiranya umupaka basaga ibihumbi 60 bo mu Burasirazuba bwayo, babukorera mu Rwanda na Uganda, mu gukumira ikwirakwizwa ry’icyo cyorezo.

Ubusanzwe u Rwanda na Congo ni ibihugu bisanzwe bihahirana, aho ku mupaka muto (Petite Barrière) uhuza ibi bihugu, hanyura abantu hagati y’ibihumbi 40 na 45 buri munsi.

Minisitiri w’Ubucuruzi n’Inganda, Soraya Hakuziyaremye, aherutse kuvuga ko ubucuruzi bwambukiranya imipaka hagati y’u Rwanda na Congo bwabarirwaga agaciro ka miliyoni 120 z’amadolari mu 2018.

Kuva umwaka ushize Ebola yongeye kwibasira RDC kugeza ubu imaze guhitana ubuzima bw’abantu barenga 1900.

Icyorezo cya Ebola ntacyo cyahungabanyije ku bucuruzi bw'u Rwanda na Repubulika Iharanira Demokarasi ya Congo
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Mi 2019-08-20 12:27:58

Yewe byarahindutse pe kuko abatuye gisenyi bakorera muri congo bangiwe kwambuka

Kwamamaza