IGIHE

Maya EA Ltd na Milimani Entrerpise mu bufatanye buzateza imbere ibikomoka ku ifarini mu Rwanda

0 26-06-2019 - saa 15:15, Iradukunda Serge

Uruganda Maya East Africa Limited rwo muri Kenya rukora ibyifashishwa mu gutunganya ibikomoka ku ifarini, rugiye kurushaho kwegereza Abanyarwanda ibyo rukora, binyuze mu bufatanye n’ikigo Milimani Enterprise.

Maya ikora ibintu binyuranye byifashishwa mu gukora imigati n’ibindi bikomoka ku ifarini nk’imisemburo, ibirungo n’ibindi. Igiye kurushaho kwinjira ku isoko ry’u Rwanda aho ibicuruzwa byayo bizajya biranguzwa na Milimani Enterprise.

Ubu bufatanye bwitezweho guteza imbere ubucuruzi bw’ibikomoka ku ifarini mu Rwanda haba mu buryo bwo kwegereza ababikora ibikoresho nkenerwa byizewe mu bwiza kandi bihendutse, no kubahugura mu buryo banoza ibyo bakora.

Umuyobozi wa Milimani, Toroitich Patricia yavuze ko ubu bufatanye buzorohereza abacuruzi bo mu Rwanda kubona ibyo bashaka hafi kandi bihendutse.

Ati “Dutangira twasanze isukari zikoreshwa mu mahoteli zikurwa i Dubai ndetse hari na hoteli yambwiye ko yayikuraga mu Bubiligi, ubu nababwira ko turi ikigo cyatangiye kuzizana bwa mbere mu Rwanda kuri make aho ikarito yaguraga 30 000Frw ubu igura 15 000 Frw.”

Umuyobozi akaba na nyiri Maya EA Ltd, Musa Abdulrahman, yavuze ko uretse kuba Abanyarwanda bagiye kwegerezwa ibi bicuruzwa, hari na gahunda yo kuzana uruganda rubikorera mu Rwanda.

Ati “Umwaka utaha turashaka gutangira kugira bimwe mu bicuruzwa tuzajya dukorera mu Rwanda. Yego si bibi gukura ibicuruzwa hafi mu gihugu cy’abaturanyi cyane ko mbere byavaga i Burayi, ariko turashaka kuzana uruganda hano.”

Niyongira Thaddée ukorera Bourbon Coffee, yavuze ko hari itandukaniro y’ibicuruzwa bya Maya n’ibindi bisanzwe.

Ati “Ubundi twajyaga dukoresha ibintu tuguze hanze bitavanze, ariko ibi tubonye ko bivanze, urabijyana ugahita ukorera hamwe utiriwe ubyivangira.” Yongeyeho ko ibicuruzwa bya Maya bigira umwimerere ku buryo bitajya bihinduka.

Umukozi mu Rugaga rw’Abikorera mu Rwanda, Ishami ry’Ubukerarugendo, Grace Mutoni, yashimye iyi gahunda ndetse anavuga ko igiye gushyigikira gahunda isanzwe yo guteza imbere ibikorerwa mu Rwanda.

Maya East Africa Limited ni ikigo cyatangiye mu 2009, gisanzwe gikorera mu bihugu byo mu karere birimo Uganda na Tanzania.

Abanyarwanda bakora ubucuruzi bw'ibikomoka ku ifarini bashimye ibicuruzwa bya Maya
Umuyobozi akaba na nyiri Maya EA Ltd, Musa Abdulrahman yavuze ko umwaka utaha bazashinga uruganda mu Rwanda
Mutoni Grace (hagati) na Patricia Toroitich uyobora Milimani Enterprise
bimwe mu birungo bya Maya East Africa limited
Ibicuruzwa bya Maya EA limited byizewe mu bwiza kandi birahendutse
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza