IGIHE

Kuva St André kugera i Gikondo! Irandaranda ry’Imurikagurisha Mpuzamahanga kuva mu 1998

0 24-07-2022 - saa 18:38, Akayezu Jean de Dieu

Ku wa 17 Nyakanga 1998 ni bwo muri Collège Saint André i Nyamirambo habereye ku nshuro ya mbere Imurikagurisha Mpuzamahanga ryari ryateguwe na Minisiteri yari ifite Ubucuruzi mu nshingano.

Abacuruzi baciriritse, abikorera ndetse n’ibigo bya Leta byari byabukereye mu kumurikira Abanyarwanda n’abanyamahanga ibyo bakora.

Nibura ibigo n’abantu ku giti cyabo 140 baturutse mu Rwanda n’abandi 29 bo mu mahanga ni bo bamuritse ibyo bakora. Ni mu gihe abagiye guhaha cyangwa gusura ibyamurikwaga bo bari 101.344.

Byari ibihe bikomeye kuko igihugu cyari kimaze imyaka ine gisohotse muri Jenoside yakorewe Abatutsi mu 1994. Imurikagurisha ni kimwe mu bikorwa byahuzaga abantu benshi bari baratatanyijwe n’ayo mahano yasize Abatutsi barenga miliyoni bishwe.

Icyo gihe mu Rwanda habarizwaga radio imwe rukumbi na televiziyo yayo. Telefone yabonwaga n’abifite ndetse icyo gihe muri Kigali kubona umuriro w’amashanyarazi byari ingorabahizi.

Ni ukuvuga ko kwamamaza imurikagurisha byakorerwaga kuri radio na Televiziyo ahanyuragaho itangazo ndetse imodoka ikanyura mu bice bitandukanye by’Umujyi wa Kigali igenda ibwira abantu ko rigiye kuba.

Muri Collège Saint André, abamurika bashyirwaga mu byumba by’amashuri, abandi bakajyanwa hanze mu mbuga cyangwa mu bibuga bya Basketball na Volleyball. Umuntu yaragendaga agafata ikibanza akubaka, icyo gihe icya metero eshatu kuri eshatu cyaguraga 10 Frw.

Ibijyanye no kubaka n’amasuku, umuntu ni we wabyikoreraga ku buryo hari n’abubakishaga amashitingi asanzwe cyangwa imbingo.

Sulfo Rwanda Industries ni kimwe mu bigo byari bikomeye icyo gihe kubera ko yacuruzaga amasabune, amavuta, wasangaga abantu babikeneye ku bwinshi ari na yo mpamvu yabaga ifite ahantu hanini.

Mutesa Shaffy wacuruje resitora muri iyi ‘Expo’ avuga ko yari irimo amafaranga, ibimurikwa byari byinshi ku buryo wasangaga n’abantu ari uruvunganzoka. Yatangiraga saa Mbili za mu gitondo igafunga saa Moya z’umugoroba.

Aganira na IGIHE yagize ati “Icyo gihe nacuruzaga muri resitora yitwaga ‘Great Generation’, nabaga mfite na tagisi yakoraga Nyamirambo yitwaga iryo zina. Mu gihe cy’ibyumweru bibiri nabaga ncuruza nka miliyoni y’inyungu.”

Mutesa avuga ko urwibutso afite kuri iryo murikagurisha ryo mu 1998, ari uko ibiciro by’ibyo kunywa, ibikorerwa mu nganda n’ibindi bicuruzwa bitandukanye byabaga bihendutse.

Ati “N’ibicuruzwa byabaga byagabanyirijwe ibiciro kuko wajyaga nko kuri Sulfo nk’isabune ya ‘Tembo’ niba yaraguraga 100 Frw ugasanga bayishyize kuri 50 Frw. Ni ukuvuga ko ibicuruzwa hafi ya byose byabaga byagabanyije ibiciro.”

Avuga ko ubwo iri murikagurisha ryabaga ririmo kuba Isoko rya Nyamirambo ryabonaga icyashara cy’abajya kugurayo ibirayi.

Mutesa akomeza avuga ko ikindi atajya yibagirwa ngo ni uko icyo gihe ari bwo imodoka za tagisi zitwara abantu mu buryo rusange zabonaga abakiliya benshi.

Ibigo byitabira imurikagurisha mpuzamahanga bimaze kuba byinshi kandi byiyongera buri mwaka

  Ukwaguka kwa Expo mu mibare

Muri rusange imurikagurisha ku nshuro ya mbere n’iya kabiri ryabereye muri Collège Saint André mu gihe ku ya gatatu ryabereye muri Lycée de Kigali [LDK].

Indi myaka yose, kuva mu 2001, ryagiye ribera muri Stade Amahoro kugeza mu 2006, ubwo ryimurirwaga i Gikondo mu Karere ka Kicukiro.

Muri rusange ku nshuro ya Mbere ubwo Imurikagurisha Mpuzamahanga ryabaga, ryari ryateguwe na Minisiteri y’Ubucuruzi, Inganda, Ubukerarugendo n’Amakoperative, ifatanya n’abikorera bari mbarwa muri icyo gihe.

Imibare IGIHE ifite igaragaza ko ku nshuro ya mbere [mu 1998], abamurika bitabiriye bari 169 barimo ab’imbere mu gihugu 140 mu gihe abaturutse ahandi bari 29. Icyo gihe imurika ryitabiriwe n’abantu barenga ibihumbi 101.

Mu 1999, abamurika b’imbere mu gihugu biyongereyeho batanu baba 145 mu gihe abaturutse hanze yacyo bari 18 naho abasuye bagera ku bihumbi 146.

Mu 2000 ari nawo mwaka wa nyuma imurikagurisha ryateguwe na Guverinoma y’u Rwanda binyuze muri Minicom [Minisiteri y’Ubucuruzi n’Inganda y’uyu munsi], abamurika b’imbere mu gihugu bageze ku 219, mu gihe abanyamahanga bari 49 naho abaje gusura cyangwa kugura bari ibihumbi 150.

Mu 2001, Urwego rw’Abikorera, PSF [Private Sector Federation] rweguriwe ibijyanye no gutegura iri murikagurisha, rutangira gukora ubukangurambaga hirya no hino mu gihugu, abacuruzi, abafite inganda n’ibigo bitandukanye bishishikarizwa kuryitabira nk’uburyo bwo kwamamaza ibikorwa.

Muri uwo mwaka, abamurika 260 b’imbere mu gihugu ni bo bitabiriye mu gihe abanyamahanga bari 45 naho abitabira baje kugira cyangwa gusura bari ibihumbi 140.

Uko ibihe byasimburanye, umubare w’abikorera mu bucuruzi, inganda n’ibindi wariyongereye ari na ko urugendo rwo kongera kwiyubaka k’u Rwanda rwari rurimbanyije.

Muri za 2000 ni bwo mu Rwanda hatangiye gusakara telefone zigendanwa ku buryo umuntu yashoboraga guhamagara mugenzi we akamusaba ko bazahurira muri ‘Expo’. Ibi biri mu byafashaga mu bukangurambaga bwo kongera umubare w’abayitabira.

Mu 2006, ubwo Expo yajyanwaga i Gikondo byari bimaze kugaragara ko hari ibikorwa bibangamira imigendekere yayo by’umwihariko mu bijyanye no kubaka aho abamurika bashyira ibicuruzwa byabo n’ibindi.

Muri uwo mwaka hitabiriye abamurika 271 barimo ab’imbere mu gihugu 186 n’abanyamahanga 85. Ni mu gihe abaza gusura cyangwa kugura bo bari ibihumbi 165.

Ubuyobozi bwa PSF bugaragaza ko kuva icyo gihe habayeho ubwiyongere bw’abamurika n’abaturage bahaha ibimurikwa ariko byose bikajyana n’uko igihugu cyari gitangiye gutera imbere.

Umuvugizi wa PSF, Ntagengerwa Théoneste, avuga ko muri iyo myaka kandi abamurika wasangaga ari abafite ibikorwa by’ubukorikori n’ibindi bikomoka ku buhinzi n’ubworozi kuko nta nganda nyinshi zari mu Rwanda.

Ati “Icyo gihe ntiwavuga ko twari dufite inganda nyinshi cyangwa ibigo by’ubucuruzi bikomeye n’ibyari bihari byari bitarasobanukirwa neza akamaro ko kumurika ibyo bakora, ariko uko imyaka yagiye ishira ibintu byarahindutse kandi impinduka nziza zaragaragaye.”

Mbere gato y’uko icyorezo cya Covid-19 kigera mu Rwanda, ubwo ni mu 2019, imibare igaragaza ko muri uwo mwaka hamuritse abantu 462 barimo ab’imbere mu gihugu 340 n’abanyamahanga 122. Ni mu gihe abaguzi n’abasura bo bari ibihumbi 329.

Mu mwaka wabanje wa 2018, abamurika bose bari 451 barimo ab’imbere mu gihugu 316 n’abanyamahanga 135 naho abaguzi n’abasura bari ibihumbi 369. Mu 2017 abamurika bari 433 naho abaza kugura cyangwa gusura bari ibihumbi 272.

Ntagengerwa agaragaza ko muri rusange ‘Expo’ igaragaza ishusho rusange y’uko ubukungu bw’igihugu bugenda bukura buri munsi kuko uko abamurika biyongera akenshi byajyanye n’ibikorerwa mu gihugu n’ubwiza bwabyo.

Ati “Navuga ko iyo umuntu akoze isesengura bigaragaza ko imibare y’abitabira yagiye izamuka kuva twatangira kugeza mu 2019, mbere ya Covid-19. Ikindi bigaragaza ni uko ubukungu bw’u Rwanda bwagendaga buzamuka ari na ko rugerageza gukurura abanyamahanga.”

Yakomeje agira ati “Imibare igaragaza ugukura k’ubukungu bw’u Rwanda n’abantu navuga ko biyongereye ariko iyo witegereje n’ubwiza bw’ibyo bakora bwagiye buhinduka; ubona ko bashobora no guhangana ku isoko mpuzamahanga. Muri rusange habayeho ubwiyongere bw’ibicuruzwa mu bwinshi no mu bwiza ndetse n’abamurika bariyongera.”

Mu zindi mpinduka zakomeje kuranga iri murikagurisha zirimo ikoranabuhanga haba mu kwiyandikisha ku bamurika ibikorwa byabo n’abagura amatike, cyane ko ubu abantu batagitonda imirongo bagura tike cyangwa bashaka kwinjira.

Muri rusange abanyamahanga bakunze kwitabira iri murikagurisha, ni ukuvuga abantu ku giti cyabo cyangwa ibigo n’inganda bagura amatike y’indege berekeza i Kigali kumurika ibyo bakora ni abaturutse mu bihugu byo mu Karere ndetse n’ibya Misiri, Ghana, Malaysia na Singapour.

Mu 2017, Imurikagurisha Mpuzamahanga ryari risigaye ryitabirwa n'abamurika benshi ndetse n'aho ribera hakaba hari uruvunganzoka rw'abantu
Rwiyemezamirimo Sina Gérard ni umwe mu bamaze igihe bitabira Imurikagurisha Mpuzamahanga
Aha ni mu 2018, ubwo Minisitiri w'Intebe, Dr Ngirente Edouard, yasuraga ibikorwa byamurikwaga i Gikondo
Buri mwaka ibigo byitwaye neza bisigaye bihembwa na PSF
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza