Iminsi irabarirwa ku ntoki ngo Abanyarwanda n’abanyamahanga begerezwe ibicuruzwa na serivisi zitandukanye z’imbere no hanze y’igihugu binyuze mu imurikagurisha Mpuzamahanga (Expo 2017) rigiye kubera mu Rwanda ku nshuro ya 20.

Expo nk’igikorwa gihuriza hamwe abantu b’ingeri zose biganjemo abashoramari baturuka mu bihugu byinshi ihuza abakiliya n’abacuruzi aho abayitabira bayungukiramo byinshi by’umwihariko ku bijyanye no gusobanukirwa ibicuruzwa bitandukanye.

Urugaga rw’Abikorera mu Rwanda ari na bo bategura imurikagurisha mpuzamahanga rizwi nka EXPO, bavuga ko iry’uyu mwaka rizabera kuri Expo Ground i Gikondo kuva ku ya 22 Kanama kugeza ku ya 6 Nzeri 2017, rizahurirana no kwizihiza isabukuru y’imyaka 20 rimaze ribera mu Rwanda.

Umuyobozi ushinzwe ibikorwa mu Rugaga rw’Abikorera (PSF), Faustin Karasira, mu kiganiro yagiranye na IGIHE yatangaje ko iri murikagurisha riteguye mu buryo bwihariye kandi burimo udushya twinshi ugereranyije no mu myaka yahise.

Yagize ati “Ni amahirwe akomeye ku bacuruzi b’ingeri zose yo kugaragaza ibyo bakora. Ni isoko ryagutse riha amahirwe abacuruzi kumenya ibyo bafite bagereranyije n’abandi, kubasangiza ubumenyi no kubigiraho. Iri murikagurisha rimeze nka moteri y’ubukungu. Kuri iyi nshuro, ibintu byose ni bishya kuko buri wese aba ashaka kuzana udushya tujyanye n’ikoranabuhanga rigezweho."

Karasira yakomeje ku iterambere bishimira bamaze kugeraho agaragaza ko hatewe intambwe ifatika ituma abanyamahanga biyongera umunsi ku wundi.

Yagize ati “Twatangiye tudafite aho tubarizwa ariko ubu turishimira intambwe twateye. Mbere twakoreraga ahantu hari ivumbi, tunyagirwa n’imvura ariko ubu turi ahantu hasakaye."

Muri iri murikagurisha abantu bakuru, ababyeyi n’abana bazaherekeza na bo batekerejweho ku buryo bwihariye.

Karasira yatangaje ko "Umwihariko uhari ni uko abana bateguriwe uburyo bwo kwidagadura bizatuma barushaho kuryoherwa n’imurikagurisha. Hazaba hari ibikinisho bishya n’impano zitandukanye, imikino n’ibindi. Abakuru bashobora kuzatembera ku mafarasi ndetse na bo hari imikino bateguriwe ishobora kubafasha kugubwa neza.”

Mu gihe imirimo yo gutegura ahazabera iri murikagurisha irimbanyije, abazamurika bazatangira kugera i Kigali mu ntangiriro z’icyumweru gitaha.

PSF itangaza ko iyi Expo ari icyanzu cyafasha abacuruzi bo mu Rwanda kurenga imipaka bakajya guhangana no mu Karere ku isoko rya EAC, COMESA n’andi mpuzamahanga.

Iri murikagurisha ryateguwe ku bufatanye bw’Urugaga rw’Abikorera (PSF) na Minisiteri y’Ubucuruzi, Inganda n’Ibikorwa by’Umuryango wa Afurika y’Uburasirazuba (MINEACOM) biteganyijwe ko rizitabirwa n’abamurika 760 bateguriwe ibibanza bigera kuri 763.

Mu bazamurika umubare munini ni uw’abanyamahanga aho bagera kuri 60% barimo abaturutse mu bihugu 20 birimo Leta Zunze Ubumwe z’Abarabu, Misiri, Canada, Iran, Pakistan, Turikiya, Singapore, Malaysia, Nigeria, Ghana, USA, ibyo mu Karere ka Afurika y’Iburasirazuba n’ibindi. Abantu barenga ibihumbi 270 ni bo bitezwe gusura ibikorwa.

Iri murikagurisha rizajya ritangira saa mbili za mu gitondo rifunge saa yine z’ijoro mu minsi y’akazi no muri weekend kugeza saa sita z’ijoro.

Expo ni kimwe mu bikorwa by’ubucuruzi bikomeye bitegurwa na PSF; byatangiye mu 1978, icyo gihe byategurwaga na Minisiteri y’Ubucuruzi gusa yaje gufungurira imiryango ibihugu by’ibituranyi mu 1998 aho muri uyu mwaka yitabiriwe n’abagera ku 140 n’abanyamahanga 29.

Kuva mu 1997 kugera mu 2005, Expo yaberaga kuri Stade Amahoro, Lycée de Kigali no mu tundi duce tw’Umujyi wa Kigali mbere yo kwimurirwa i Gikondo mu 2006.

Umusaruro ugaragara muri ibi bikorwa ushingiye ku guhuza abamurika ibicuruzwa baba ab’imbere no hanze y’igihugu n’inzego za Leta na MINEACOM.

Intego nyamukuru yayo ni uguhanga imirimo, kugabanya ubukene no kuzamura ubukungu bw’igihugu muri rusange.

Mu myaka umunani ishize iri murikagurisha ryitabiriwe n’abamurika bagera ku 3461, muri bo Abanyarwanda bagera ku 2376.

Imurikagurisha ryaherukaga kubera i Kigali mu 2016 ryitabiriwe n’abamurika 440 barimo Abanyarwanda 269 n’abandi bari baturutse mu bihugu 19. Abagera ku 266,060 basuye iri murikagurisha ryamaze ibyumweru bibiri mu gihe hahanzwe imirimo 2000.

Mu marembo yo kuri Expo Ground i Gikondo hari gutunganywa
Ibibanza bizamurikirwamo ibicuruzwa bitandukanye biri kubakwa
Ugeze i Gikondo ahazabera Expo, usanga imirimo ya nyuma yo kuyitegura irimbanyije
Abantu batandukanye bahawe imirimo mu bikorwa byo kubaka ahazabera Expo
Mu bidasanzwe hazanagaragazwa uburyo bwo kubaka inyubako yatuzwamo abantu benshi ku butaka buto
Mu myaka umunani ishize, Expo yakunze kwitabirwa cyane n'Abanyarwanda


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved