Uruganda rukora inzoga n’ibinyobwa bidasembuye, Bralirwa, rwatangaje ko mu mezi atandatu ya mbere ya 2017, mbere yo kwishyura umusoro rwabonye inyungu ingana na miliyari 2,910 Frw, ikaba ihwanye n’izamuka rya 213.2% ugereranyije n’igice cya mbere cya 2016, kuko bwo zari miliyoni 929 Frw.

Imibare uru ruganda rwashyize ahagaragara kuri uyu wa Gatanu, yerekana ko mu mezi arindwi ya mbere ya 2017 rwinjije miliyari 41.3 Frw zivuye kuri miliyari 43Frw zo mu gice cya mbere cya 2017, bingana n’igabanuka rya 3.8%.

Bralirwa ivuga ko amafaranga yinjije yagabanutse bitewe n’ingano y’ibinyobwa yacuruje byagabanutseho 15.4%, byavuye kuri hl 888 000 zacurujwe mu gice cya mbere cya 2017 bikagera kuri hl 751 000 muri uyu mwaka.

Umuyobozi Mukuru Wungirije w’Inama y’Ubutegetsi akaba n’umuyobozi wa Bralirwa, Victor Madiela, yagaragaje ko ingano y’ibinyobwa Bralirwa yacuruje yagabanyijwe n’izamurwa ry’ibiciro riheruka gukorwa ku nzoga n’ibinyobwa bidasembuye.

Yakomeje agira ati “Ishoramari mu ruganda ubu ryasubiye ku murongo nyuma yo gusoza imyaka itanu twari tumaze dukora ishoramari kugeza mu 2016. Iryo shoramari ryadufashije kudahendwa mu byo dukoresha mu ruganda, wabihuza na gahunda yacu yo kugenzura uko dukoresha amafaranga, bikaba byaragize uruhare mu nyungu twabonye.”

“Ibyo byagezweho nubwo ingano y’ibinyobwa byacurujwe yagabanutseho 15.4%. Byatewe ahanini n’izamurwa ry’ibiciro ku binyobwa bidasembuye hamwe n’inzoga, byakozwe muri Kanama 2016 na Mutarama 2017, ariko bikaba bikomeje kumera neza. Kugabanuka kw’ingano y’ibinyobwa twacuruje twari tubyiteze.”

Bralirwa ivuga ko ifite icyizere ko 2017 izaba imeze neza kuri uru ruganda ndetse n’isoko ry’ibinyobwa bidasembuye rikaba ritanga icyizere.

Iteganya ko kuwa 29 Kanama 2017 hazategurwa inama izaganirwamo inyungu ya Bralirwa mu gice cya mbere cya 2017, aho biteganywa ko inyungu ku mugabane mu nyungu yabonetse mu mezi atandatu ashize, izaba ingana na Frw 2.03 ku mugabane, mu gihe mu gice cya mbere cya 2016 yari 0.58 Frw.

Uru ruganda ubu rukora inzoga zirimo Primus, Mützig, Legend, Amstel, Huza na Turbo King bikorerwa ku Gisenyi zo zikaba zitumizwa mu Buholandi.

Kuva mu 1974 kandi uru ruganda rukora ibinyobwa bidasembuye birimo ibikorwa mu masezerano na Coca Cola Company birimo Coca Cola, Fanta Orange, Fanta Citron, Fanta Fiesta, Sprite, Krest na Stoney, Bralirwa ikaba ifite iyayo yitwa Vital’O.


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved