U Rwanda rwaje ku isonga muri Afurika mu kwegereza abaturage serivisi z’imari

6 5-11-2018 - saa 07:36, Ferdinand Maniraguha

U Rwanda rwaje ku mwanya wa mbere muri Afurika n’uwa 11 ku Isi, mu gushyiraho gahunda n’uburyo bugamije korohereza abaturage kubona serivisi z’imari.

Byatangajwe muri Raporo ‘The 2018 Global Microscope’ yasohowe n’itsinda rikora ubushakashatsi ku bukungu bw’ibihugu bitandukanye (Economist Intelligence Unit).

Iyi raporo nshya, yagenzuye uburyo ibihugu 55 hirya no hino ku Isi byorohereza ababituye kugerwaho no gukoresha serivisi z’imari.

Inzobere zasuzumye ibitandukanye birimo iterambere ry’ibigo by’imari nk’amabanki, guhererekanya amafaranga hifashishijwe ikoranabuhanga, uburyo bwo kwishyura kuri za gasutamo, udushya mu ikoranabuhanga rigamije koroshya iby’imari, imitangire y’inguzanyo n’ibindi.

Ku rutonde rusange rw’iyo raporo, u Rwanda rwaje ku mwanya 11, rukaba urwa mbere muri Afurika n’amanota 62 %. Uwo mwanya ruwusangiye na Afurika y’Epfo.

Igihugu kiza ku mwanya wa mbere mu korohereza abagituye kugera kuri serivisi z’imari ni Colombia n’amanota 81, ikurikirwa na Peru naho Uruguay ni iya gatatu.

Ikindi gihugu cyo muri Afurika kiza ku mwanya wa hafi ni Tanzania iri ku mwanya wa 14 ku isi, Nigeria ya 19 na Kenya ya 23.

Bimwe mu byatumye u Rwanda ruza imbere harimo ingufu rushyira mu bukangurambaga bugamije kongerera ubumenyi abaturage mu bijyanye n’imari, ubufatanye hagati y’ibigo bya Leta n’urwego rw’abikorera, gushyigikira imishinga mito y’ikoranabuhanga igamije koroshya serivisi z’imari, guteza imbere ikoranabuhanga mu bijyanye n’imari n’ibindi.

Icyakora, iyi raporo igaragaza ko hakiri byinshi byo gukora kugira ngo serivisi z’imari zigere kuri bose nk’aho imibare ya Banki y’Isi yo mu 2017, igaragaza ko 36 % by’abaturage ari bo bafite konti za banki, mu gihe 31 % ari bo bafite konti zo kubitsa no kubikuza mu bigo by’itumanaho (Mobile Money).

Raporo igaragaza ko bikigoye gufunguza konti ya banki ku bantu baba mu bice by’icyaro, kuba nta mategeko ahamye y’uburyo amakuru y’ikoranabuhanga yerekeye abakiliya abikwa, ubumenyi buke bw’abaturage mu bijyanye n’imari ndetse n’abagore bake bagaragara mu byo kwihangira imirimo.

Sierra Leone niyo iza ku mwanya wa nyuma kuri iyi raporo, mu bihugu byagenzuwe n’amanota 22%.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Ukuri 2018-11-07 12:35:45

Twegerejwe ibigarasha by’imari Ariko twegerezwa n’ibyamunara, kko ntakindi gihugu kw’isi aho uwagujije atezwa cyamunara muminsi 60 y’ubucyererwe gusa! !, kubera abakomissionaires bakorana na bank babifashijwemo na RDB bakagurisha umutungo w’umuntu kukagambane bikarangira mwese ngoferoabaswe n’ubucyererwe n’abamukomokaho

2
Diyani 2018-11-06 03:56:02

Koko ntawushimisha bose umuntu utabona ko urwego rw’imali rwateye imbere mu kwegereza abaturage services z’imali ni INDASHIMA, Muribuka neza ko kera Banki zari nka 3 mu gihugu cyose Ibi bivuze ko nabasirimu bose atari ko baziganaga none ubu ziri hose mu gihugu yewe nawa muturage wo hasi cyane agana UMURENGE SACCO kuko byonyine izi sacco ni 416 zihwanye n’imirenge igize uRwanda niho twese mu byaro tubitsa tukanaka inguzanyo tukiteza imbere, iyi raporo niyo kandi si abanyarwanda bayikoze ngo mubabeshyere ko batekinitse!!!!
mushaka iki kandi KABEHO RWANDA Tera imbere uko bwije uko bukeye

3
Visit Rwanda 2018-11-05 23:09:31

Iyi report ndemeranya nayo 100%, hari amavugura menshi yagiye akorwa murwego rwimari cyane cyane BNR nabafatanya bikorwa nka AFR, AMIR, MINECOFIN nibibindi bigo bitandukanye bagize uruhare rukomeye mugufasha urwego rwimari kurushaho kwegereza service abaturage. iyo abanhanga bapima uburyo service zimari zegereye abantu bibanda kubintu 3. 1. Acess (Branches, agents etc Uburyo amabanki, ibigo byitumanaho byegereye abantu). Kugeza ubu burimurenge murwanda ufite U-SACCO, Branches za mabanki cg ibigo byubwinshingizi byagabye amashami ahantu henshi, banks zifite aba agents, ibigo byitumanaho nuko. 2. Usage(Uburyo abantu bakoresha ibigo byimari), abantu barenga miliyoni 5.5 bafite konti muri bank, MFIs and SACCOs, abantu bafite ubwishingizi nabo bariyongereye, abakoresha mobile money nabo nuko. 3. Quality( uburyo serivise zimari zoroheye abantu kuzikoresha, kwihuta, uburenganzi bwa ba kiriya nibindi. Kugeza ubu mperutse kujya muri bank gusaba inguzanyo bampa inyandiko yerekana amakuru yose yerecyeye inguzanyo, namabwiriza ngo yashyizweho na BNR ( Key facts Statement regulation), ayamakuru nasanze afasha umuntu gufata icyemezo mugihe azanze koko yemeranye nayo mbere yokwihutira gusinya contract yinguzanyo. Ahubwo abantu turusheho kwegera ibigo byimari barusheho kudusobanurira ibyobakora, nabonye BNR yaratangiye iyo gahunda mubanyeshuri( #BNRengage#). Murakoze

4
Habineza 2018-11-05 15:13:31

Urwanda Oyeeee!!!!Urwanda rwacu ruli kw’isonga muli byose...

5
Emile 2018-11-05 10:25:58

Ntegereje kuzareba umwanya tuzabona mu kwegereza abaturage uburyo bwo kubona iyo mari mu gihe imisoro yimuye benshi

6
Akumiro 2018-11-05 04:34:01

"Bimwe mu byatumye u Rwanda ruza imbere harimo ingufu rushyira mu bukangurambaga bugamije kongerera ubumenyi abaturage mu bijyanye n’imari, ubufatanye hagati y’ibigo bya Leta n’urwego rw’abikorera, gushyigikira imishinga mito y’ikoranabuhanga igamije koroshya serivisi z’imari, guteza imbere ikoranabuhanga mu bijyanye n’imari n’ibindi.". IKINTU GIFATIKA KIDASANZWE MURI IBI NI IKI KO MUZI GUCA IGIKUBA?
Servisi z’imari uyu munsi abazegereza abaturage kurusha abandi bose ni companies z’itumanaho. None se hari ibyo zikorera mu Rwanda zidakorera ahandi ziri?

Kwamamaza