IGIHE

Ibigo bito n’ibiciritse bitanu bishobora kwandikwa ku isoko ry’imari n’imigabane ry’u Rwanda

1 11-02-2019 - saa 11:09, HABIMANA James

Ikigo cy’Imari n’imigabane (Rwanda Stock Exchange), cyavuze ko ibigo bito n’ibiciriritse bitanu, mu mezi make ari imbere bishobora kwandikwa kuri iri soko.

Ibi bigo ngo byasanzwe bikora neza mu bigo 10 byasinye ku masezerano y’imikoranire na Rwanda Stock Exchange mu mwaka ushize.

Umuyobozi Mukuru w’Ikigo cy’Imari n’Imigabane mu Rwanda (RSE), Rwabukumba Célestin, yavuze ko ibi bigo bito n’ibiciriritse byagaragaje ibimenyetso byiza ndetse n’imbaraga kugira ngo byuzuze ibisabwa mu nama yahuje impande zombi.

Ibi ngo bije bikurikira ubukangurambaga bw’amezi abiri bwakoze mu 2018, bwateguwe na Rwanda Stock Exchange ku bufatanye n’Ikigo gishinzwe isoko ry’imari n’imigabane ndetse n’Ikigega cya Leta Zunze Ubumwe za Amerika gishinzwe iterambere mpuzamahanga (USAID), bwari bugamije kugera ku bigo bito n’ibiciriritse 300 kugira ngo bibe byagera ku gishoro cy’igihe kirekire.

Ubu bukangurambaga bwakurikiwe no kwandika ibi bigo muri Werurwe 2018, byahuje ibigo bito n’ibiciriritse 100 byavuye mu bice bitandukanye by’igihugu.

Rwanda Stock Exchange ivuga ko ikigamijwe atari uko ibi bigo bigera ku gishoro cy’igihe kirekire gusa, ahubwo ibi bigo bizajya bihabwa amahugurwa ku byerekaranye n’ishoramari ndetse n’ubufasha mu by’amategeko, ubundi bisanzwe bihenze.

Ibikenerwa kugira ngo ikigo cyemerwe harimo kuba icyo kigo gifite imiyoborere myiza kandi kikaba gifite inama y’ubutegetsi ikora, byibuze ifite abanyamuryango batatu.

The New Times cyavuze iki kigo kandi kigomba kuba gikora mu myaka ibiri ishize kandi ibitabo byacyo by’ibarurishamibare bikora neza, bikaba byaragenzuwe n’umugenzuzi wo hanze y’ikigo.

Rwabukumba yavuze ko bafite icyizere ko ibi bigo bigiye kwemezwa bizagira amahirwe yo kugera ku gishoro kandi ku giciro gito.

Iki ni ikibazo abikorera bafite cyo kubona inguzanyo, ikaza iri ku nyungu yo hejuru.

Rwabukumba yatangaje ko uyu aba ari umwanya mwiza wo kongera amafaranga kandi agashyirwa ahantu akoreshwa neza, kuko ngo ubu buryo bufasha guhora hakorwa igenzurwa bituma amafaranga yabo akoreshwa ibikwiriye.

Umuyobozi wa RSE, Rwabukumba yavuze ko ibigo bito n'ibiciriritse bitanu bishobora kwandikwa kuri iri soko
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
kabayiza 2019-02-11 05:13:36

Hazagire unsobanurira amabanga aba mu isoko ry’imari n’imigabane ntabwo bajya bavuga amazina yibigo no mu mwaka ushize muri Serena abantu bari biteze ko hatangazwa ibigo byasinye reka daa none nubu ngo ni ibigo bi 5 iri banga ni iryiki ko byatuyobeye

Kwamamaza