Minisitiri w’Intebe Ngirente yahamagariye Abanya-Turikiya gushora imari mu Rwanda

0 10-10-2018 - saa 20:05, IGIHE

Minisitiri w’Intebe, Dr Ngirente Edouard, yeretse Abanya-Turikiya amahirwe y’ishoramari ari mu Rwanda ubwo yitabiraga Inama y’Ihuriro ry’Ubukungu ihuza Turikiya na Afurika.

Yabitangaje kuri uyu wa 10 Ukwakira 2018 mu nama yayobowe na Perezida wa Turikiya, Recep Tayyip Erdoğan, yitabiriwe n’abarenga 3000.

Iyi nama iribanda ku ngingo zirimo ibikorwa remezo, ubwubatsi, gutunganya ibiva mu nganda n’ubukerarugendo n’imideli.

Dr Ngirente uhagarariye Perezida Kagame uyobora Umuryango wa Afurika Yunze Ubumwe (AU), yashimye umubano uri hagati ya Turikiya na Afurika wubakiye ku mikoranire mu bucuruzi n’ishoramari.

Yagize ati “Ndasaba ko iyi nama yazamura ubukungu n’amahirwe y’ishoramari hagati ya Turikiya na Afurika. Dukorana ngo tugere ku iterambere ribereye abaturage bacu. Ndizeza ko tuzakomeza kwagura imikoranire ndetse twiteguye gushyira mu bikorwa imyanzuro izava muri iyi nama.”

Yavuze ko Turikiya izungukira ku mavugurura ari gukorwa muri Afurika arimo isoko rusange rihuriweho n’ibihugu biyigize rizafungura ubucuruzi mu mfuruka zose.

Iyi nama kandi igamije kunoza imikoranire hagati y’abashoramari, inzego z’abikorera, abahagarariye guverinoma ndetse no kugaragaza ibyitezwe mu Cyerekezo Afurika yihaye cya 2063 kigamije kuyigira umugabane wigenga.

Dr Ngirente yanagaragaje ko u Rwanda rwashyize imbaraga mu kuzamura ishoramari ryatumye ubukungu bw’igihugu bwiyongeraho 7% mu myaka 15.

Yagize ati “Duhaye ikaze ishoramari riva muri Turikiya mu bijyanye n’itunganywa ry’ibikoresho by’ubwubatsi, imyenda, ibikomoka ku buhinzi n’ibicanwa, serivisi zo kwakira neza abakugana n’ibindi. Ikigo cy’Igihugu cy’Iterambere gihagarariwe hano cyiteguye kubafasha.”

Raporo ya Banki y’Isi ya ‘Doing Business 2018’ yerekanye ko u Rwanda ruri ku mwanya wa kabiri muri Afurika yo munsi y’Ubutayu bwa Sahara mu korohereza abashoramari, rukaza ku wa 41 ku Isi.

Mu 2008, Umuryango wa Afurika Yunze Ubumwe watangaje ko Turikiya ibaye umufatanyabikorwa wayo.

Turikiya imaze imyaka 15 ishyizeho uburyo bw’imikoranire hagati yayo na Afurika ndetse abashoramari benshi barayiyoboka.

Mu 2017, ibihugu 45 bya Afurika byasinyanye amasezerano mu by’ubucuruzi na Turikiya mu gihe byari 23 mu 2003. Ubucuruzi hagati y’impande zombi bwageze kuri miliyari $20.6 buvuye kuri miliyari $5.4 mu myaka 14.

Ikindi kandi ibihugu 20 bya Afurika bimaze gusinyana amasezerano yo gufashanya mu rwego rw’ubuzima.

Minisitiri w’Intebe, Dr Ngirente Edouard, yahamagariye Abanya-Turikiya gushora imari mu Rwanda
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza