Gakenke: Koperative Umurenge Sacco zahombye miliyoni hafi 58 Frw

0 14-09-2018 - saa 16:25, N.Kubwimana Janvière

Igenzura ryakozwe na Banki Nkuru y’u Rwanda, BNR, mu mpera za Kamena 2018, ryagaragaje ko 57 837 752 Frw ya Koperative Umurenge Sacco muri ako karere yakoreshejwe nabi, inzego zitandukanye zikaba zahagurukiye gukurikirana irengero ryayo.

Ubu bugenzuzi bwakorewe muri Koperative Umurenge Sacco 13, bugaragaza ko aya mafaranga miliyoni 57.8 Frw arimo ayatanzwe mu nguzanyo ntiyishyurwe andi akanyerezwa na bamwe mu bakozi baza Sacco.

Iki kibazo cyanagarutsweho mu nama nyunguranabitekerezo ku mikorere ya koperative Umurenge Sacco mu Karere Gakenke mu cyumweru gishize.

Umuyobozi Wungirije w’Akarere ka Gakenke ushinzwe iterambere ry’ubukungu, Niyonsenga Aimé François, yasabye abafite aho bahurira na koperative umurenge Sacco ko bagomba gukurikirana aya mafaranga akagaruzwa.

Yagize ati "Sacco zishyirwaho zari zigamije gufasha abaturage kwiteza imbere, ariko murabona uko byagenze, mushyize inyungu z’abaturage imbere kurusha izanyu ibintu byagenda neza.”

“Inshingano zanyu muzikore neza n’iki kintu mucyiteho cyane mugaruze aya mafaranga, abaturage bongere babone inguzanyo zibafasha gukora imishinga ibateza imbere, kuko turamutse dukomeje gukora gutya iterambere twifuza ntitwarigeraho."

Umukozi muri Banki Nkuru y’u Rwanda ushinzwe kugenzura ibikorwa bya koperative Umurenge Sacco, Nduhuye Jovith, avuga ko bagiye kongera imbara mu gukora igenzura, abakora nabi bakabiryozwa.

Yagize ati "Amafaranga twahawe gucunga ni ay΄igihugu ntabwo ari ayo gukoresha uko twiboneye mu nyugu zacu bwite, byagaragaye ko hari amafaranga menshi yagiye anyerezwa andi agakoreshwa nabi.”

“Byatumye igipimo cy΄inguzanyo zitishyurwa neza kigera ku 10%, tugiye kurushaho gukora igenzura abakora ibi nk΄aho bitabareba babiryozwe, ibi bigomba gukosorwa hirindwa ko Sacco zagwa mu gihombo."

Imirenge Sacco yo mu Karere ka Gakenke ifite abanyamuryango 106 991.

Abujuje imigabane ni 77 822 mu gihe konti zikora ari 81 376, izisinziriye ni 25 015 nk’uko BNR yabigaragaje mu igenzura iherutse gukora.

Ibiro by'Akarere ka Gakenke
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza