Urugaga rw’Abikorera mu Rwanda (PSF) rusanga ibigo by’ishoramari bikorera imbere mu gihugu bikwiye kubyaza umusaruro amahirwe agaragara mu imurikagurisha mpuzamahanga rigiye kubera mu Mujyi wa Kigali kuva ku ya 22 Kanama kugeza ku ya 6 Nzeri 2017.

Ni amahirwe PSF ishingira ku kuba ngo ibyo bigo bizabona ubushobozi bwo kurushaho kwagura isoko ryabyo no kugirana ibiganiro bigamije gusangira ubunararibonye n’ubufatanye n’abanyamahanga bazaba baje kumurika ibikorwa byabo.

Umuyobozi ushinzwe Itumanaho muri PSF, Eric Kabeera, yavuze ko iyo EXPO iha amahirwe akomeye Abanyarwanda bafite ibyo bakora kugira ngo baganire n’abakiliya babo no kugira ngo berekane udushya bafite,banashakira isoko ibikorerwa mu Rwanda.

Yavuze kandi ko ari amahirwe akomeye ku bigo bitandukanye ku kwiga no gusangizanya ubumenyi n’ibigo byo hanze.

Yagize ati “Intego nyamukuru ya Expo ni uguhanga akazi, kugabanya ubukene, kuzana ibikenewe mu gihugu n’iterambere muri rusange. Ibyo bizatuma habaho kongera ibyoherezwa hanze, guhanga imirimo, gucuruza ku kigero cyo hejuru ibikorerwa mu Rwanda, kwigira ku bandi ikoranabuhanga, byose bigakorwa bigamije kwihutisha iterambere ry’ubukungu.’

Kugeza ubu abamurika baturuka mu bihugu 20 bamaze kwemeza ko bazitabira iryo murikagurisha bagera kuri 760 barimo abo muri Leta Zunze Ubumwe z’Abarabu, Misiri, Canada, Iran, Pakistan, Turikiya, Singapore, Malaysia, Nigeria, Leta Zunze Ubumwe za Amerika, abo mu Muryango wa Afurika y’Iburasirzuba n’abandi benshi.

Inzobere zivuga ko hakenewe kongerera agaciro ibikorerwa mu Karere mu gihe byaba bigiye guhangana ku yandi masoko nk’iryo muri EAC, iry’ Umuryango w’Ubucuruzi mu bihugu bya Afurika y’Iburasirazuba n’iy’Amajyepfo (COMESA) n’andi mpuzamahanga.

Umushoramari ukorera ubucuruzi mu Mujyi wa Kigali witwa Justine Ufitikirezi, yavuze ko “imurikagurisha ari urubuga rwiza rwo gusangiriraho ubumenyi n’inararibonye no kuganira kugira ngo bagure amasoko.”

Kuri iyi nshuro ya 20, imurikagurisha rizibanda no ku guteza imbere ibikorerwa mu Rwanda nk’uko byakozwe mu mwaka ushize. U Rwanda ruzungukira mu kumurika ibikorerwa imbere mu gihugu no kurema icyizere mu bakiliya ku bikorerwa mu Karere. Guverinoma y’u Rwanda yatangije gahunda ya Made in Rwanda kugira ngo iteze imbere ireme, ibiciro by’ibicuruzwa no guhuza inganda n’abaguzi.

Mu 2016, uru rwego rwongereye 17% ku musaruro mbumbe w’igihugu. Minisiteri y’Ubucuruzi n’Inganda n’ibikorwa by’Umuryango wa Afurika y’Iburasirazuba itangaza ko Leta ishaka kongera uwo mubare ukagera nibura kuri 20% bitarenze 2020.


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved