Ambasaderi mushya wa Zambia mu Rwanda, Benson Keith Chali, yasabye Perezida Kagame ko Sosiyete Nyarwanda y’ubwikorezi bw’indege, RwandAir, yakora ingendo Kigali-Livingstone kugira ngo ibihugu byombi bibyaze umusaruro mwinshi amahirwe y’ubukerarugendo bifite.

Kuri uyu wa Kabiri nibwo Amb. Keith Chali yashyikirije Perezida Kagame impapuro zimwemerera guhagararira igihugu cye mu Rwanda, afite icyicaro i Dar es Salaam muri Tanzania.

Amaze kwakirwa, Amb. Chali yahishuriye itangazamakuru ko mu biganiro yagiranye n’Umukuru w’Igihugu yamusabye ko mu ngendo RwandAir ikora zerekeza i Lusaka yakongeramo izijya i Livingstone mu Majyepfo y’Uburengerazuba bwa Zambia, hafi y’umugezi wa Zambezi n’umupaka wa Zimbabwe.

Yasobanuye ko ari ahantu hakurura ba mukerarugendo benshi bikaba byafasha ibihugu byombi kumenyekanisha ahantu nyaburanga ndetse abifuje kuhasura hombi RwandAir ikabafasha kuhagera.

Yagize ati “Nabwiye Perezida ko bagomba gutekereza uburyo izi ndege zakwerekeza i Livingstone kuko hano mufite ingagi zo mu misozi kandi zikurura ba mukerarugendo benshi, natwe dufite isumo rya Victoria rikurura ba mukerarugendo benshi, turashaka gusangira abo bakerarugendo kubw’iterambere ry’u Rwanda n’irya Zambia.”

Aka gace ka Livingstone gakurura ba mukerarugendo benshi bari hagati ya 60-na 70% by’abasura Zambia ku mwaka, kubera isumo rya Victoria na Pariki y’Igihugu ya Mosi-oa-Tunya irimo inyamaswa nini nk’intare, inzovu n’izindi.

Hari kandi inzu ndangamurage ya David Livingstone, Umunya-Ecosse wavumbuye aka gace kakanamwitirirwa. Kuva i Lusaka ujya muri uwo mujyi harimo intera ya kilometero 487, ku bakoresha imodoka bitwara guhera ku amadolari 13 kugera kuri 22; ni urugendo rukorwa amasaha atandatu n’igice.

Umujyi wa Livingstone ufite ikibuga cy’indege cyitwa “Harry Mwaanga Nkumbula International Airport”; indege za British Airways na South African Airways zikora ingendo zihuza Johannesburg na Livingstone. Hari kandi sosiyete y’indege yitwa ProFlight Zambia ikora ingendo hagati ya Livingstone n’ibindi bice bya Zambia, buri munsi ikora ingendo hagati ya Lusaka na Livingstone.

Ubusanzwe RwandAir ikora ingendo zerekeza mu byerecyezo 23 harimo icya Lusaka kigakomeza i Harare muri Zimbabwe. Icyifuzo cya Leta ya Zambia cyemewe, byatanga amahirwe yo kumenyekanisha urwego rw’ubukerarugendo bw’u Rwanda ku basura Livingstone bakaba banoroherwa guhita babona uburyo bagera i Kigali ngo basure aho bifuza.

U Rwanda rubibonyemo inyungu bwaba ubundi buryo bwafasha Guverinoma kugera ku ntego yihaye y’uko mu 2024 ruzaba rwarakubye kabiri inyungu ruvana mu bukerarugendo, ikagera ku madolari y’Amerika miliyoni 800 zivuye kuri miliyoni $404 yinjiye mu mwaka ushize.

Ambasaderi mushya wa Zambia mu Rwanda, Benson Keith Chali, yakirwa muri Village Urugwiro
Ambasaderi wa Zambia yakiriwe mu cyubahiro gihabwa ba Ambasaderi
Ambasaderi wa Zambia mu Rwanda, Benson Keith Chali, ashyikiriza Perezida Kagame impapuro zimwemerera guhagararira igihugu cye mu Rwanda
Ambasaderi Benson Keith Chali aganira na Perezida Kagame
Ambasaderi wa Zambia mu Rwanda, Benson Keith Chali aganira n'itangazamakuru nyuma yo kwakirwa na Perezida Kagame

Amafoto: Moses Niyonzima na Village Urugwiro


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved