Raporo nshya y’ubushakashatsi bw’ikigo cy’igihugu cy’ibarurishamibare (NISR) ku bikorwa by’ubucuruzi bukorerwa mu gihugu (IBES 2015), igaragaza ko ubucuruzi bwo mu Rwanda bwagutseho miliyari 339 mu myaka ibiri ishize.

Ubu bushakashatsi bukorwa hashingiwe ku kwegeranya no gusesengura imibare yerekana imiterere y’ubukungu bushingiye ku bindi bikorwa bitari ubuhinzi mu gihugu. Bwibanda ku bucukuzi bw’amabuye y’agaciro, inganda, amashanyarazi, gaz, amazi, amacumbi, serivisi z’ibiribwa, ibikorwa by’imari n’ubwishingizi, ubucuruzi bunini n’ubuciriritse n’ibindi.

Nkuko KT Press yabyanditse, kuva muri Kanama 2016 kugeza muri Mutarama 2017, ubu bushakashatsi bwasuzumye imiterere y’urwego rw’ubucuruzi busanga mu 2015 uru rwego rwarinjije mu gihugu miliyari 6,104 zivuye kuri 5,765.2 mu 2014.

Imibare ya NISR yerekana kandi ko mu 2015 hari ibigo by’ubucuruzi 10 172 byakoreraga mu gihugu hose, bigakoresha abakozi 183 663, muri byo ibigera ku 5 255 bingana na 51.7% bikaba byarabaga mu mujyi wa Kigali.

Ubucuruzi bwo kuranguza n’ubuciriritse, gukora ibinyabiziga byangiritse ni byo byihariye igipimo kinini cy’urwego rw’ubukungu kuko bwinjijemo miliyari 1 645.4. Urwego rw’inganda n’ubwubatsi na rwo rwateye imbere mu myaka ishize by’umwihariko mu kwibanda ku bikorerwa mu Rwanda. Mu 2015 ubwubatsi bwinjije miliyari 515.9 na ho inganda zinjiza miliyari 416.9 z’amafaranga y’u Rwanda.

Ku rundi ruhande ariko urwego rw’imari n’ibikorwa by’ubwishingizi byasubiye inyuma mu 2015 ugereranyije na 2014 kuko byinjije miliyari 375.8 naho urwego rw’ubucukuzi bw’amabuye y’agaciro rwinjiza miliyari 106.4 z’amafaranga y’u Rwanda.

Ubu bushakashatsi bunerekana ko mu bigo by’ubucuruzi biri mu gihugu, iby’ubucuruzi bwo kuranguza n’ubuciriritse n’ibikora imodoka zagize ibibazo bigera ku 3 822 bingana na 37.6%, mu gihe ibindi bikorwa bya serivisi bifite 13.1% na ho gucuruza ibiribwa bikaba bifite 8.4%.

Ibijyanye n’inganda bingana na 853 ari nabyo bikoresha abakozi benshi bangana na 14.9% by’abakozi bose. Ibigo by’ubucuruzi 2.3% bikoresha abakozi barenga 100 mu gihe 38.3% bikoresha nibura abakozi batatu cyangwa munsi yabo.

Raporo ya NISR yerekana ko ibigo bigera kuri 90.5% ari iby’abanyarwanda na ho 3.1% ni iby’abanyamahanga. Yerekana kandi ko 50% by’ibigo binini bikorera mu Rwanda byavutse mbere y’imyaka itanu naho 8.4% byabyo bikaba byaravutse mu myaka 20 ishize.


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved