IGIHE

U Rwanda rwashyize ku isoko impapuro mpeshwamwenda zifite agaciro ka Miliyari 15 Frw

1 16-08-2019 - saa 11:10, Evariste Nsengimana

Guverinoma y’u Rwanda ibinyujije muri Banki Nkuru y’Igihugu (BNR), yashyize ku isoko impapuro mpeshwamwenda z’imyaka 20 (Treasury Bonds), zifite agaciro ka Miliyari 15 z’amafaranga y’u Rwanda.

BNR igaragaza ko amafaranga azava muri izo mpapuro mpeshwamwenda azifashishwa mu gushyira mu bikorwa imishinga yo guteza imbere ibikorwa remezo mu gihugu.

Kwakira ubusabe bw’abifuza kugura izo mpapuro mpeshwamwenda ni uguhera ku wa gatatu w’icyumweru gitaha, tariki ya 21 Kanama kugera kuwa 23 Kanama 2019.

BNR igaragaza ko inyungu ku bazagura izo mpapuro mpeshwamwenda bazajya bazihabwa kabiri mu mwaka guhera muri Gashyantare umwaka utaha kugeza muri Nyakanga 2039.

Umusoro ku nyungu uzatangwa mu buryo butandukanye, abo mu muryango wa Afurika y’Iburasirazuba bazatanga 5% naho abannyamahanga bandi bagatange 15%.

BNR isaba abashoramari bifuza kugura izo mpapuro kuzuza ibisabwa banyuze ku rubuga rwayo.

Impapuro mpeshwamwenda BNR yagiye ishyira hanze mu bihe byashize zagiye zigurwa mu gihe gito, bigaragaza icyizere ishoramari ryo mu gihugu rifitiwe.

Kugurisha impapuro mpeshwamwenda hagamijwe gushaka amafaranga yo guteza imbere ibikorwa remezo no guteza imbere isoko ry’imari n’imigabane ni gahunda Leta yatangije mu 2014.

Mu cyumweru gishize nibwo Ikigo mpuzamahanga cy’ubushakashatsi cy’Abanyamerika, Standard & Poor’s (S&P), cyazamuye igipimo cy’ubukungu bw’u Rwanda kibuvana ku inota rya B kirushyira ku rya B+, ku kuba bwifashe neza cyane, bikaba byongera icyizere ku ishoramari mu gihugu.

Impapuro mpeshwamwenda ni impapuro abashoramari batandukanye bashobora gushoramo amafaranga baguriza Leta, mu gihe izo mpapuro zishyizwe ku isoko, bakajya bahabwa inyungu zibarwa ku mwaka, bakazasubizwa amafaranga batanze bagura izo mpapuro igihe zagenewe kirangiye.

Izo mpapuro uwaziguze ashobora kuzitangaho ingwate muri Banki agahabwa umwenda. Uwaziguze ashobora kuzigurisha kw’isoko ryimari n’imigabane ry’u Rwanda akabona amafaranga ye.

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Semusambi 2019-08-16 08:00:57

Ubwo nukongeraho ninguzanyo yubuyapani mu kurwanya igwingira. Umuntu wese uzajya kubutegetsi mu myaka 30 irimbere azahura nibibazo tu.

Kwamamaza