U Rwanda rwakubye kabiri umusaruro w’indabo rwohereza mu mahanga mu mezi umunani

1 16-05-2018 - saa 10:34, Evariste Nsengimana

Ikigo cy’Igihugu gishinzwe kohereza mu mahanga ibikomoka ku buhinzi (NAEB) cyatangaje ko umusaruro w’indabo u Rwanda rwohereza mu mahanga wikubye kabiri ukava ku madolari y’Amerika miliyoni 1,2 ukagera kuri 2,8 $ mu gihe cy’amezi umunani gusa kandi ko cyiteze ko uziyongera cyane bitewe n’uko hari abashoramari mu buhinzi bwazo.

Iyi mibare NAEB yayitangaje ku wa Mbere mu muhango wo gutangiza ku mugararo kohereza ku mugabane w’u Burayi, indabo za ‘Gentian’ zimenyerewe cyane mu Buyapani nk’uko New Times yabitangaje.

Imibare ya NAEB igaragaza ko hagati ya Nyakanga 2017 na Werurwe 2018, u Rwanda rwohereje mu mahanga indabo zifite agaciro ka miliyoni 2,8 $, mu gihe mu mwaka w’ingengo y’imari wa 2016/2017 rwari rwoherejeyo izifite agaciro ka miliyoni 1,2 $.

Umushinga wo guhinga indabo mu Rwanda za ‘Gentian’ ushyirwa mu bikorwa n’Ikigo Bloom Hills Rwanda Ltd ku bufatanye n’umujyi wa Hachimantai wo mu Buyapani.

Biteganyijwe ko uyu mwaka uzarangira izo ndabo zihinzwe kuri hegitari enye, mu 2020 bakazaba bafite ubushobozi bwo kohereza gentian ibihumbi 430 buri gihembwe cy’ihinga.

Uyu mushinga uri gushyirirwa mu bikorwa mu gishanga cya Nyacyonga, Akarere ka Gasabo, wahaye akazi Abanyarwanda basaga 50, bikaba biteganijwe ko baziyongera bakagera ku 100.

Umuyobozi mukuru wa NAEB, Amb. George Kayonga, yagize ati “Nyuma y’umwaka umwe n’amezi atatu y’igerageza, ubu indabo za Gentian zirahingwa neza mu Rwanda kandi zirakenewe cyane ku isoko ry’i Burayi, baratangira kuzoherezayo mu kwezi gutaha.”

Uyu muyobozi yavuze ko ururabo rwa Gentian ku isoko ry’i Burayi ruri kugura amafaranga y’u Rwanda ari hagati ya 500 na 700, ndetse ko umusaruro wazo wa mbere uzaba ufite agaciro k’amayero ibihumbi 400.

Umuyobozi Mukuru wa Bloom Hills Rwanda Ltd, Shungo Hudara, yavuze ko umusaruro mwinshi wazo witezwe mu Ugushyingo 2018.

Yanavuze ko izi ndabo zabashije kugendana n’ikirere cy’u Rwanda ku buryo zizaba zikenewe cyane i Burayi kuko ho nta gihugu cyaho kizaba kizejeje.

Minisitiri w’Ubuhinzi n’Ubworozi, Dr Mukeshimana Geraldine, yavuze ko bishimishije kuba izo ndabo zarishimiye ikirere cy’u Rwanda, zikaba zujuje ibisabwa ngo zijyanwe ku masoko y’amahanga.

Minisiteri y’Ubuhinzi yahamagariye abikorera gushora imari mu buhinzi bw’indabo.

Umuyobozi Mukuru wa Bloom Hills Rwanda Ltd, Shungo Hudara, mu ndabo za ‘Gentian’ ziri guhingwa mu Rwanda
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
k 2018-05-16 03:57:55

ariko ubwobuhinzi mwabuteje imbere ahantu hose mugihugu,

Kwamamaza