Rusizi: Abahinzi nta cyizere cyo kweza, babuze ubagezaho inyongeramusaruro

0 22-11-2017 - saa 19:03, Sitio Ndoli

Abahinzi bo mu Murenge wa Bweyeye, Akarere ka Rusizi bagaragaje impungenge ko umusaruro utubutse biteze nyuma yo kubura ifumbire mvaruganda kubera imiturire yabo.

Aba bahinzi bavuga ko kuva igihembwe cy’ihinga cya mbere cya 2017/ 2018 cyatangira nta fumbire mvaruganda yabagezeho.

Uwitwa Ngendahimana Daniel yagize ati “Ibigori ntabwo bisaza neza bitewe n’uko ifumbire ntayo twaboneye ku gihe , imvura y’umuhindo yaje ifumbire itaraza bityo nyine biraducanga bamwe duterera aho nta kundi.”

Ahingeneye Saraphine we ati “Uyu mwaka nta fumbire twabonye bitewe n’uko ntayo bigize bazana. Igihe cyararenze, nta musaruro twiteze, twagize ngo ujya kuyizana yabuze amafaranga, ni ukutuvugira ubutaha tukabona ifumbire kare, tugatera kare, wenda twabona umusaruro. Ubushize twari twabonye umusaruro kuko twari tuyifite.”

Abenshi mu bahinzi bafite impungenge z’uumusaruro utaziyongera ni bo mu gishanga cya Matyazo y’Epfo gifite hegitare 32 n’icya Ruguru gifite hegitare hafi 10; bihingwamo ibigori n’ibirayi. Bavuga ko umusaruro wabo ushobora kuzava kuri toni eshatu n’ibice bibiri ukagera kuri ebyiri.

Umuyobozi w’Akarere ka Rusizi, Harerimana Frederic, yavuze ko icyo kibazo abaturage bavuga ari impamo. Asobanura ko ubuyobozi bwakurikiranye busanga umucuruzi wakoranye n’Ikigo cy’igihugu gishinzwe ubuhinzi n’ubworozi (RAB), yaje kugaragaza ko mu Murenge wa Bweyeye ari kure, ifumbire ntiyayibagezaho.

Yagize ati “Ikijyanye n’ifumbire nicyo koko, hari ikibazo cy’ifumbire mvaruganda twakurikiranye impamvu yabyo dusanga umucuruzi wari wakoranye na RAB yaraje kugaragaza ko ari kure, ko atabasha kuhagera bituma iyi fumbire itagera ku baturage. Ariko icyo tugiye gukurikirana ni ukureba icyakorwa kugira ngo icyo kibazo gikemuke mu buryo bwihuse.”

Uhagarariye RAB mu Ntara y’Iburengerazuba, Nduwumuremyi Jeanine, yabwiye IGIHE ko ubundi umucuruzi w’inyongera musaruro agomba kuba atuye hafi y’abaturage kandi ko atoranywa n’ubuyobozi bw’akarere ariko agahabwa amahugurwa na RAB.

Bamwe mu bahinzi bo mu Murenge wa Bweyeye ntibiteze umusaruro kubera ko babuze ifumbire mvaruganda

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza