IGIHE

RRA yasabye abasora kwihutira kwishyura avansi ya mbere y’umusoro ku nyungu

0 20-06-2022 - saa 20:03, IGIHE

Ikigo cy’Imisoro n’Amahoro, RRA, kirasaba abasora bose bafite inshingano zo kumenyekanisha no kwishyura avansi ya mbere y’umusoro ku nyungu muri uyu mwaka wa 2022, kwihutira kubikora badategereje ifirimbi ya nyuma.

Mu ntangiriro za Gicurasi, Ikigo cy’Imisoro n’Amahoro cyasohoye itangazo ryibutsa abasora ko igikorwa cyo kumenyekanisha no kwishyura avansi ya mbere y’umusoro ku nyungu gikorwa mu gihe cy’amezi atatu, kikaba cyaratangiye muri Mata kugeza muri Kamena 2022.

Itariki ntarengwa yo kumenyekanisha no kwishyura avansi ya mbere y’umusoro ku nyungu ni ku wa 30 Kamena 2022.

Ubuyobozi bwa RRA buvuga ko kuba ikigo cyibutsa abasora kurangiza inshingano zabo hakiri kare ari ukugira ngo nihagira ukenera ubufasha abuhabwe mu buryo bwihuse kandi neza, bityo bimurinde kugwa mu bihano by’ubukererwe.

Mu kiganiro n’itangazamakuru ku wa 15 Kamena 2022, Komiseri w’Imisoro y’Imbere mu gihugu, Batamuliza Hajara, yasobanuye ko avansi ya mbere y’umusoro ku nyungu ireba abakora ibikorwa bibyara inyungu bose bishyuye umusoro ku nyungu z’umwaka wa 2021 muri Werurwe 2022.

Ati “Abakoze imenyekanisha rya zero cyangwa bagaragaje igihombo mu gihe bakoraga imenyekanisha ry’umusoro ku nyungu zabonetse mu 2021 ndetse n’abafunguje ibikorwa by’ubucuruzi muri uyu mwaka wa 2022 ntibarebwa n’iyi avansi.”

Muri icyo kiganiro kandi Batamuliza yakomoje no ku buryo bukoreshwa mu kubara avansi y’umusoro ku nyungu.

Yagize ati “Nk’uko byemejwe na Guverinoma y’u Rwanda nk’imwe mu ngamba zo gufasha abacuruzi guhangana n’ingaruka z’icyorezo cya Covid-19, kuva mu mwaka wa 2020 avansi ya mbere y’umusoro ku nyungu ibarwa hashingiwe ku gaciro k’ibyacurujwe mu gihembwe gikorerwa imenyekanisha. Ni ukuvuga ko iyi avansi y’umusoro ku nyungu irimo kubarwa hashingiwe ku byacurujwe mu mezi ya Mutarama, Gashyantare na Werurwe 2022.”

Imibare yasohowe na RRA muri Tax Statistics 2021, igaragaza ko mu Rwanda hari abakora ibikorwa bisoreshwa bishyura umusoro ku nyungu bari mu byiciro bitatu.

Hari icyiciro cy’abasora banini bagera kuri 375, abari mu cyiciro cy’abaciriritse 840, ndetse n’abasora bato ari na bo benshi basaga ibihumbi 230. Kugeza ubu, umusoro ku nyungu igera kuri 20% ugereranyije n’imisoro yose ikusanywa n’Ikigo cy’Imisoro n’Amahoro.

Komiseri w’Imisoro y’Imbere mu gihugu, Batamuliza Hajara, yasobanuye ko avansi ya mbere y’umusoro ku nyungu ireba abakora ibikorwa bibyara inyungu bose bishyuye umusoro ku nyungu z’umwaka wa 2021 muri Werurwe 2022
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza