IGIHE

Minisitiri Mukeshimana yafunguye uruganda rwa Rugabano ruzajya rutunganya toni 1000 z’icyayi ku mwaka

0 30-08-2019 - saa 17:39, Mukwaya Olivier

Minisitiri w’Ubuhinzi n’Ubworozi, Dr. Mukeshimana Gerardine, yafunguye ku mugaragaro Uruganda rw’Icyayi rwa Rugabano mu Karere ka Karongi, rwitezweho ko mu cyiciro cya mbere ruzajya rutunganya toni 1000 z’icyayi mu mwaka.

Uru ruganda rwafunguwe kuri uyu wa Kane rwabaye urwa 18 rutunganya icyayi mu Rwanda. Rufite intego yo kuzaba rutunganya toni 4000 z’icyayi kimeze neza ku mwaka, mu myaka 10 iri imbere. Muri icyo gihe ikigo rushamikiyeho cya Luxmi Group cyo mu Buhinde, cyiyemeje gushora miliyoni $28 - $30 mu buhinzi bw’icyayi.

Uru ruganda rwahawe ubutaka bungana na ha 438 bwo gukoreraho imirimo itandukanye ari naho rwubatswe, hakiyongeraho imirima y’icyayi igera kuri hegitari 4000.

Guverineri w’Intara y’Iburengerazuba, Munyantwari Alphonse, yavuze ko mu mushinga uru ruganda rwubatswemo, uretse gutuma abaturage bahabwa akazi, banubakiwe umudugudu w’icyitegererezo watujwemo abatishoboye n’abari batuye mu mirima yaguriwemo ubuhinzi bw’icyayi.

Ati “Muri aka gace haberanye n’ubuhinzi bw’icyayi kandi n’icyayi kihava kiba gifite uburyohe, uyu mushinga uzatera hegitari 4000 bizagirira abaturage akamaro kuko abarenga 1000 bamaze kubonamo akazi, babonye amazu meza yo kubamo, uretse icyayi batujwe ahantu heza urabona ko ubuzima bwahindutse kuko bahawe inzu zifite byose zifite agaciro ka miliyoni 12 Frw buri imwe’’

Minisitiri Dr. Mukeshimana yavuze ko uru ruganda ruzongera ibicuruzwa u Rwanda rwohereza mu mahanga, cyane ko rumaze kumenyekana nk’igihugu kiza ku isonga mu gutunganya icyayi cyiza.

Ati “Uru ruri mu nganda za mbere zizaba zitunganya umusaruro mwinshi w’icyayi mu gihugu, ni ukuvuga ko ruzajya rutunganya toni 4,000 ku mwaka, uyu musaruro ukaba uzagira uruhare mu kuzamura icyayi twohereza hanze y’igihugu ho 3% by’umusaruro w’Igihugu mugihe cy’imyaka 10 iri mbere’’.

Luxmi n’ikigo The Wood Foundation ni byo banyamigabane banini mu nganda z’icyayi za Pfunda na Gisovu, bifite 50% mu ruganda rwa Pfunda na 90 ku ijana mu rwa Gisovu.

Umuyobozi wa Luxmi Group, Rudra Chatterjee, yavuze ko bifuza gukomeza kwagura ibikorwa byabo mu bijyanye n’ubuhinzi bw’icyayi, ku buryo uru ruganda rwa Rugabano ruzaba rutanga icyayi gihiga ibindi mu gihugu.

Usibye kohereza icyayi mu mahanga nk’umusaruro, uru ruganda runamaze guha akazi abahinzi hafi 2,000 badahoraho n’abakozi umunani bahoraho.

Icyayi ni kimwe mu bicuruzwa byinjiriza u Rwanda amadevize. Ikigo cy’Igihugu gishinzwe guteza imbere ibyoherezwa mu mahanga bikomoka ku Buhinzi n’Ubworozi (NAEB), kigaragaza ko mu 2016-2017 icyayi cyoherejwe mu mahanga cyari toni 25,128 zavuyemo miliyoni $74,5 mu gihe mu mwaka w’ingengo y’imari wa 2017-2018 habonetse toni 27 824 zasaruwemo miliyoni $88.

Uru ruganda rwubatswe mu karere ka Karongi
Uru ruganda ruzajya rutunganya toni 1000 ku mwaka
Minisitiri Mukeshimana (hagati), Guverineri Munyantwari (iburyo) n'umuyobozi wa Luxmi yubatse uru ruganda, barufungura ku mugaragaro
Minisitiri Mukeshimana yeretswe imikorere y'uru ruganda
Minisitiri Mukeshimana na Guverineri Munyantwali bungurana ibitekerezo mu itahwa ry'uru ruganda
Abashoramari ba Luxmi Group basanzwe bafite inganda za Gisovu na Pfunda bongereyeho na Rugabano
Uretse kwegerezwa uruganda, abaturage batishoboye bo muri aka gace bubakiwe imidugudu y'icyitegererezo
Guverineri w’intara yiburengerazuba Munyantwari Alphonse yavuze ko uyu mushinga uzafasha abaturage kuko uretse guhabwa akazi bahawe inzu zigezweho
Minisitiri w'Ubuhinzi n'Ubworozi, Dr. Mukeshimana Gerardine, yavuze ko uruganda rwa Rugabano ruzagira uruhare mu kuzamura icyayi u Rwanda rwohereza hanze y’Igihugu ho 3%
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza