IGIHE

Kayonza: Akanyamuneza ku bahinzi b’urutoki begerejwe uruganda rwenga urwagwa

2 12-08-2019 - saa 10:11, Hakizimana Jean Paul

Mu myaka mike ishize mu Ntara y’Iburasirazuba ibitoki byakundaga guhira mu mirima bikaribwa n’inyoni ibindi bigatemerwa inka bitewe no kutabiha agaciro kubera kubura isoko.

Ibi byatumaga benshi batera insina z’inyamunyo dore ko ari nazo ziri guterwa na benshi muri iki gihe bitewe n’uko abarya ibitoki batajya babura haba muri restaurant, amahoteli no mu ngo.

Igitoki cy’imbihire kivamo umutobe cyangwa urwagwa, kuri ubu bijyanye na gahunda ya leta yo gushishikariza abaturage gushinga inganda nto zitunganya urwagwa, ubu bwoko bwahise butangira kubona isoko.

Mu mezi abiri ashize mu nkengero z’Umujyi wa Kayonza hafunguwe uruganda rwitezweho gukora inzoga zo mu bitoki, imitobe na waragi, ni uruganda rufite agaciro ka miliyoni 900 Frw, arimo miliyoni 450 Frw yatanzwe na leta biciye mu mu kigega IFAD cyateye inkunga uyu mushinga.

Uruganda rwa Rugali Agro processing ku ikubitiro rwatangiye rukorana n’abacuruzi b’ibitoki 10 bagemura toni ziri hagati y’icumi na 15 ku munsi, bikavamo litiro ibihumbi 21 rw’urwagwa.

Ibi byatumye abahinzi b’urutoki bagarura akanyamuneza kubera za nsina basaga n’abatereranye bongera kuzigarukira.

Habumukiza Jean Bosco uturuka mu Murenge wa Jarama mu Karere ka Ngoma ni umwe mu bagemura ibitoki kuri uru ruganda. Yavuze ko ahinga urutoki ku buso bungana na hegitari eshanu, urutoki rwe rwajyaga rumuha amafaranga ibihumbi 100 Frw mu kwezi ariko aho yatangiriye gukorana n’uruganda rwa Rugali amafaranga yarikubye.

Ati “Uru ruganda rutaraza ibitoki by’imbihire byahiraga mu mirima inyoni zikirira none ubu nk’abahinzi twarasubijwe, twabonye uruganda rubigura, mu kwezi njye nshobora kwinjiza amafaranga ari hagati y’ibihumbi 400 Frw cyangwa 500 Frw.”

Kayizere Dancille utuye mu mudugudu wa Kayonza we yagize ati “Uruganda rwatubereye igisubizo, mbere twahingaga ibitoki by’imbihire bigahira mu mirima kuko wabonaga bidafite agaciro, ukaba ubifite ariko ku isoko nta gaciro bifite none ubu byabonye uruganda rubiha agaciro, ubu mu cyumweru nshobora kugemura toni icumi z’ibitoki by’imbihire.”

Umwanditsi wa Koperative Rugali Agro Processing, Mulisa John Bosco, yavuze ko kuri ubu imirimo uruganda rukora ari 30% by’ibyo bifuza kugeraho ashishikariza abahinzi gukomeza kwita cyane ku guhinga ibitoki by’imbihire ngo kuko bifite isoko.

Ati “Uru ruganda rumaze iminsi 45 rutangiye ariko uyu mwaka uzarangira nibura twakira toni 50 ku munsi z’ibitoki mu gihe ubu twakira toni ziri hagati 10 na 15.”

Uyu muyobozi yavuze ko bafite gahunda yo gukorana n’amakoperative mu kuzamura umuhinzi w’ibitoki by’imbihire.
Ati “ Ubu turi gukorana n’abacuruzi bigenga 10 ariko turashishikariza abanyarwanda guhinga ibitoki by’imbihire kuko bafite isoko rihoraho mu ruganda rwacu.”

Umuyobozi w’Ikigo cy’Igihugu gishinzwe iterambere ry’Ubuhinzi n’Ubworozi RAB, Dr. Karangwa Patrick, yavuze ko kuri ubu leta yunganira abashaka gushinga inganda zitunganya umusaruro w’ubuhinzi n’ubworozi ku kigero cya 50% agasaba n’abandi ba rwiyemezamirimo gutinyuka.

Ati “Ntabwo leta iza ngo yubake uruganda yo ubwayo ahubwo ifatanya n’abikorera, niyo mpamvu dusaba abikorera gukomeza gushora mu kubaka inganda leta nayo ikabashyigikira.”

Ibitoki byari byarabuze isoko, none ubu ni imari ishyushye kubera uruganda
Uru ruganda rufite ubushobozi bwo gutunganya litiro 23700
Abayobozi batandukanye bitegereza uburyo uru ruganda rutunganya ibitoki bikavamo urwagwa
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
zogeye 2019-08-13 18:39:13

ko ntuye aha hantu uru ruganda nkaba ntarubona?

2
J d Amour 2019-08-12 05:13:48

Mwatubwira umurenge, Akagali, umudugudu uru ruganda ruherereyemo. Akarere ko twakumvise

Kwamamaza