IGIHE

Impapuro mpeshamwenda za miliyari 15 Frw BNR yashyize ku isoko zahataniwe kuri 141 %

0 23-08-2019 - saa 11:36, Ferdinand Maniraguha

Guverinoma y’u Rwanda ibinyujije muri Banki Nkuru y’Igihugu yatangaje ko impapuro mpeshamwenda za mbere za miliyari 15 Frw zizamara imyaka 20 yari yashyize ku isoko, zitabiriwe ku kigero gishimishije.

Abashoramari bitabiriye kuzigura kuko biri ku kigero cya 141.o3 % , ni ukuvuga habonetse abashoramari 80 bo mu ngeri zitandukanye.

Kwakira ubusabe bw’abifuza izo mpapuro byafunguwe kuwa Mbere tariki 19 Kanama 2019 saa mbiri za mu gitondo, bisozwa kuwa Gatatu tariki 21 Kanama saa kumi z’umugoroba.

Mu batsindiye izo mpapuro, abantu ku giti cyabo babonyemo 14.97 %, ibigo by’ishoramari bibona 47.39 % mu gihe amabanki yabonye 37.64%.

Inyungu kuri izo mpapuro zizajya zishyurwa kabiri mu mwaka ndetse ziratangira gushyirwa ku isoko ry’imari n’imibagane ry’u Rwanda.

Ubwitabire bw’igurwa ry’izo mpapuro BNR ivuga ko byaturutse ku bukungu bwifashe neza n’ubukangurambaga bwagiye bukorwa hirya no hino mu gihugu ku gushora mu imari mu by’imigabane.

Izindi mpapuro mpeshamwenda z’imyaka itanu zizatangira gushyirwa ku isoko ku wa 25 Nzeri 2019.

BNR iherutse gutangaza ko amafaranga azava muri izo mpapuro mpeshwamwenda azifashishwa mu gushyira mu bikorwa imishinga yo guteza imbere ibikorwa remezo mu gihugu.

Mu cyumweru gishize nibwo Ikigo mpuzamahanga cy’ubushakashatsi cy’Abanyamerika, Standard & Poor’s (S&P), cyazamuye igipimo cy’ubukungu bw’u Rwanda kibuvana ku inota rya B kirushyira ku rya B+, ku kuba bwifashe neza cyane, bikaba byongera icyizere ku ishoramari mu gihugu.

Impapuro mpeshwamwenda ni impapuro abashoramari batandukanye bashobora gushoramo amafaranga baguriza Leta, mu gihe izo mpapuro zishyizwe ku isoko, bakajya bahabwa inyungu bakazasubizwa amafaranga batanze bagura izo mpapuro igihe zagenewe kirangiye.

Izo mpapuro uwaziguze ashobora kuzitangaho ingwate muri Banki agahabwa umwenda. Ashobora kuzigurisha ku isoko ry’imari n’imigabane ry’u Rwanda akabona amafaranga ye.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza