Ikigo ‘Minerals Supply Africa’ cyijeje impinduka mu bucukuzi bw’amabuye y’agaciro mu Rwanda

1 13-02-2018 - saa 11:25, Emma-Marie Umurerwa

Ikigo Mpuzamahanga ‘Minerals Supply Africa’ gikora ubucukuzi n’ubucuruzi bw’amabuye y’agaciro cyijeje abafite ibirombe by’amabuye y’agaciro kubafasha gucukura mu buryo bugezweho.

Minerals Supply Africa (MSA), imaze imyaka 10 ikorera mu Rwanda ibijyanye n’ubucuruzi n’ubucuruzi bw’amabuye y’agaciro yagaragaje umushinga wo kunoza imikoranire n’abafite ibirombe by’amabuye aho mu myaka icumi iri imbere izabafasha gukora ubucukuzi bujyanye n’igihe no kugura umusaruro wabo ku giciro cyiza.

Umuyobozi Mukuru wa MSA Rwanda, Komarovic Julija yavuze ko bifuza gukora ubucukuzi n’ubucuruzi bufitiye inyungu u Rwanda n’Abanyarwanda.

Yagize ati “Dufite gahunda nyinshi zagenewe ubucukuzi n’abacuruzi mu minsi iri imbere, by’umwihariko uyu mwaka turifuza gukorera hamwe mu buryo bwegeranye cyane, atari ukugira ngo mutugemurire tubagurire gusa ahubwo tubafashe turebe uburyo twatera imbere twese.”

Yavuze ko imikoranire hagati ya ya MSA n’abacukuzi izatanga umusaruro kuko ifite umwihariko. Ati “Tuzabaha serivisi nziza n’ibintu byose bikorwe vuba kuko bijyana n’ibiciro byiza dutanga ku isoko.”

Umuyobozi w’Inama y’Ubutegetsi ya MSA, Heller Markus yavuze ko bagiye gufasha abafite ibirombe gukora ubucukuzi butari ubwa gakondo.

Yagize ati “Muri iyi myaka iri imbere tuzakora cyane ku bijyanye n’ibirombe kugira ngo tubigishe kubyaza umusaruro ibyo mukuramo byose mubashe kubona amafaranga ahagije mwiteze imbere kuko ubwo bumenyi n’ubushobozi turabufite.”

Umunyamabanga Nshingwabikorwa w’Ihuriro Nyarwanda ry’Abacukuzi b’Amabuye y’Agaciro, Butera Frank, yashimiye MSA ko yashyize imbaraga mu gufasha abacukuzi kuko hagaragaraga icyuho.

Ati “Biratunezeza iyo tubonye umwe mu banyamuryango bacu ashobora kwizeza abandi ko yabafasha kongera umusaruro no kuwubonera isoko. Mpura na benshi baza batwizeza ko bazafasha abacukuzi ariko bikarangirira aho ngaha. MSA rero twizeye ko ibyo bavuga bazabikora.”

Umuyobozi ushinzwe Imikoranire n’Abafite Ibirombe, Iyadede Yvette yavuze ko biteguye guha ubumenyi abashaka gukora ubucukuzi bugezweho.

Ati “Hari abantu hano bafite ubushobozi bwo kuba bahindura imikorere bakava mu bucukuzi bwa gakondo bagakora mu buryo bugezweho ariko wenda badafite ubwo bumenyi. Twagira ngo tubabwire ko MSA ifite inzobere mu bijyanye n’ubucukuzi biteguye kubaha ubumenyi bwabafasha gucukura mu buryo bugezweho.”

Minerals Supply Africa yashimiwe intambwe yateye

Umuyobozi wa Big Mining LTD, Hubakimana Mathias yashimiye MSA ihora hafi abakora ubucukuzi bw’amabuye y’agaciro, asaba ko barushaho kubegera.

Ati “Turabashimiye kuri iki gikorwa cyiza mwateguye cyo guhura n’abakiliya banyu, ariko twabasabaga ko mwadufasha kubona imashini zikoreshwa mu bucukuzi kugira ngo umusaruro wacu urusheho kwiyongera.”

Dr Ndindabahizi Aloys ufite ibirombe yifuje MSA ko yarushaho kwegera abakiliya bayo. Ati “Nimurushaho kutwegera nk’uko mubitubwiye nta kabuza imikoranire yacu namwe izarushaho kuba myiza kandi twese tuzunguka.”

MSA yijeje abafatanyabikorwa bayo ko icyo yifuza ari ugukorana kugira ngo ubucukuzi bw’amabuye y’agaciro mu Rwanda burusheho gutera imbere.

Igikorwa cyo guhura no gusabana n’abakiliya hagamijwe kungurana ibitekerezo kizajya kiba buri mwaka.

Ikigo ‘Minerals Supply Africa’ cyijeje abafite ibirombe impinduka mu bucukuzi bw’amabuye y’agaciro mu Rwanda
Umuyobozi Ushinzwe Icungamutungo muri MSA, Baziga Aloys
Umuyobozi wa Gisizi Mining, Rugiramumaro Alphonse aganira n'Umunyamakuru wa IGIHE
Umuyobozi wa Big Mining LTD, Hubakimana Thomas
Umuyobozi Mukuru wa MSA Rwanda, Komarovic Julija yavuze ko bifuza gukora ubucukuzi n’ubucuruzi bufitiye inyungu u Rwanda
Umuyobozi w’Inama y’Ubutegetsi ya MSA, Heller Markus yavuze ko bagiye gufasha abafite ibirombe gukora ubucukuzi butari ubwa gakondo
Dr Ndindabahizi Aloys uyobora Africom International yasabye Ikigo ‘Minerals Supply Africa’ ko cyarushaho kwegera abakiliya bacyo
Umuyobozi ushinzwe Iyamamamazabikorwa muri MSA, Niyoyita Gerard
Abayobozi b'Ikigo ‘Minerals Supply Africa’ mu mushinga uzafasha gukemura ibibazo biri mu rwego rw'ubucukuzi bw'amabuye y'agaciro
Umunyamabanga Nshingwabikorwa w’Ihuriro Nyarwanda ry’Abacukuzi b’Amabuye y’Agaciro, Butera Frank, yashimiye MSA ko yashyize imbaraga mu gufasha abacukuzi
Umuyobozi ushinzwe Imikoranire n’Abafite Ibirombe, Iyadede Yvette yavuze ko biteguye guha ubumenyi abashaka gukora ubucukuzi bujyanye n'igihe
Abakozi bakira amabuye yakuwe mu birombe bakanayatunganya
Ikigo ‘Minerals Supply Africa’ cyahuye kinasabana n’abakiliya bacyo hagamijwe kungurana ibitekerezo

Amafoto: Muhizi Serge

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
emmanuel 2018-02-13 04:19:52

Leta mbanza yaraduteye igipindi baribaratubwiye ngobazadutangariza amabuye yagaciro bafite umwaka uranshize ntakanunukayo. Namidiya yacu ntibaza ukobimeze.

Kwamamaza