IGIHE

Hemejwe amasezerano ya Kigali agamije kugeza serivisi z’imari kuri bose

0 12-09-2019 - saa 08:38, Ferdinand Maniraguha

Abanyamuryango bagize Ihuriro rigamije kugeza serivisi z’imari kuri bose, Alliance for Financial Inclusion (AFI) bemeje amasezerano ya Kigali agamije kwifashishwa mu kugeza serivisi z’imari kuri bose.

Isi yari yiyemeje kuba abantu bose bazaba bagerwaho na serivisi z’imari bitarenze 2021, icyakora iyi ntego ishobora kutazagerwaho kuko kugeza ubu ku isi hari abantu miliyari 1.6 batagerwaho n’izo serivisi.

Umuyobozi Nshingwabikorwa wa AFI, Dr Alfred Hannig kuri uyu wa Kabiri yabwiye abanyamakuru i Kigali ko nubwo intego bihaye zishobora kutegerwaho ku gihe, ngo byatanze umurongo w’ibigomba gukorwa kugira ngo mu myaka mike bizabe byagezweho.

Mu nteko rusange y’abanyamuryango basaga ijana ba AFI yateraniye i Kigali kuri uyu wa Gatatu, mbere y’umunsi umwe ngo habe inama mpuzamahanga yiga ku kugeza serivisi z’imari kuri bose, hemejewe amasezerano ya Kigali azifashishwa nk’umurongo ngenderwaho mu kugera ku ntego.

Ayo masezerano y’amapaji abiri akubiyemo ibyo ibihugu bigize AFI byiyemeje mu kongera imbaraga zogamije kuziba icyuho kiri hagati y’abagerwaho na serivisi z’imari n’abo zitageraho cyane cyane hibandwa ku matsinda asa n’ayasigajwe inyuma muri izo gahunda.

Amatsinda akunzwe kutagerwaho na serivisi z’imari harimo abagore, ururbyiruko, abakuwe mu byabo n’abageze mu za bukuru.

Nyuma yo kwemezea ayo masezerano, Guverineri wa Banki Nkuru y’u Rwanda, John Rwangombwa yavuze ko abanyamuryango ba AFI bakwiriye kubera ijwi abatagira kivugira kugira ngo hatagira usigazwa inyuma mu kugerwaho na serivisi z’imari.

Yagize ati “Iyi ni impanda iduhamagarira gushyira ibyo twiyemeje mu bikorwa. Dukwiriye kwita cyane cyane ku matsinda adakunze kwitabwaho, nk’abagore, urubyiruko, abakene, abamugaye, tukababera ijwi.”

Umuyobozi Nshingwabikorwa wa AFI, Dr Alfred Hannig yavuze ko mbere na mbere hakwiriye gushyirwa imbere ikoreshwa ry’ikoranabuhanga mu by’imari kugira ngo serivisi zigere kuri bose.

Ati “Ni iby’ingenzi , by’umwihariko ukurikije ibimaze iminsi bigerwaho mu ikoranabuhanga no mu rwego rw’imari. Intego yacu ni ukugabanya icyuho kirimo gishingiye ku gitsinda twibanda ku by’ingenzi kurusha ibindi.”

Muri iyo nteko rusange, hanatowe umuyobozi mushya w’inama y’ubutegetsi ya AFI, hatorwa Guverineri wa Banki ya Misiri Tarek Amer uzarangiza manda ye mu 2021.

AFI igaragaza ko muri miliyari 1.6 batagerwaho na serivisi z’imari ku isi, abagera kuri miliyari ari abagore.

Kuri uyu wa Kane i Kigali haratangizwa inama mpuzamahanga yiga ku kugeza serivisi z’imari kuri bose, hitabwa ku buryo ikoranabuhanga ryakoreshwa mu kugeza serivisi z’imari ku bagore n’urubyiruko.

Ihuriro AFI ryashinzwe mu 2008, rikaba rigizwe n’abanyamuryango 100 bo mu bihugu 90.

Hemejewe amasezerano ya Kigali azifashishwa nk’umurongo ngenderwaho mu kugera ku ntego
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza