IGIHE

Hagaragajwe uko abakiliya bazungukira mu bufatanye bwa Qatar Airways na RwandAir

0 4-08-2021 - saa 15:43, Muhonzire Sylvine

Sosiyete y’indege ya Qatar Airways iherutse gutangaza ko yinjiye mu bufatanye na RwandAir, yagaragaje ko abakiliya ba sosiyete zombi bagiye kuryoherwa na serivisi bazahabwa kuko buri sosiyete izaziba icyuho cy’iyindi binyuze mu kongera umubare w’ingendo.

Bimwe mu byo bazungukira muri ubu bufatanye, harimo gukora ingendo mu byerekezo byinshi, aho umukuliya wa Qatar Airways wagorwaga no gukorera ingendo muri Afurika kubera ko iyi sosiyete itahagera hose, azajya abasha kujyayo kimwe n’uwa RwandAir wifuzaga kujya aho itagera ariko Qatar Airways ihagera azabasha kugerayo.

Ubu abakiliya bakora ingendo nyinshi bakoresheje RwandAir na Qatar Airways bazajya bahitamo ibyerekezo bashaka birenga 160 by’izi sosiyete zombi banyuze ku kibuga cy’indege mpuzamahanga cya Kigali n’icya Hamad International Airport kiri i Doha muri Qatar.

Umuyobozi mukuru wa RwandAir, Yvonne Makolo, yavuze ko bishimiye kugeza abakiliya babo mu bice bitandukanye by’Isi binyuze mu masezerano mashya bagiranye na Qatar Airways.

Yakomeje agira ati “Gutanga serivisi nziza kandi inoze ku bakiliya bacu ni ingenzi kandi turabizi ko abagenzi bose yaba abazakoresha Qatar Airways cyangwa RwandAir nka kimwe mu bigize amasezerano, bazakomeza kwakirwa neza nk’uko bisanzwe muri sosiyete zombi.”

Umuyobozi mukuru wa Qatar Airways Group, Akbar Al-Baker, yavuze ko ubu bufatanye ari inkingi ikomeye mu guha amahitamo menshi abakiliya ari na ko bahabwa serivisi nziza n’abafite inararibonye mu kuzitanga kuko ari bimwe mu ntego za Qatar Airways na RwandAir.

Yongeyeho ati “Afurika ni isoko rikomeye kuri twe ndetse ubu bufatanye buzadufasha kongera kubura ingendo zo mu kirere mpuzamahanga ndetse budufashe kugera mu bihugu byinshi bishya bya Afurika.”

Mu bunyamwuga bwayo, RwandAir ikorera ingendo nyinshi muri Afurika no ku yindi migabanye y’Isi, ndetse muri Gicurasi uyu mwaka yaciye agahigo ko kuba sosiyete y’ubwikorezi bwo mu kirere ya mbere muri Afurika ishyizwe mu cyiciro cyo hejuru cya ‘Diamond Status’ nka sosiyete ifite indege zitekanye kandi zirimo isuku ishobora gufasha umugenzi kutandura COVID-19.

Qatar Airways na yo ifite inararibonye rihagije mu myaka 27 imaze yagizwe sosiyete y’indege y’umwaka ya 2021 ku Isi na AirlineRatings.

Ikibuga cy’indege igwaho cya Hamad International Airport (HIA) na cyo giherutse kuba ikibuga cy’indege cya mbere muri Aziya no mu Burengerazuba bwo hagati cyashyizwe ku rwego rw’inyenyeri eshanu mu bifite ubushobozi buhagije bwo kurinda abantu Covid-19, igihembo cyatanzwe na sosiyete ikomeye ya Skytrax yo mu Bwongereza.

Iki gihembo cyahaye ubushobozi Qatar Airways gukora ingendo ku migabane yose yo ku Isi kuva i Paris mu Bufaransa ujya i Washington muri Amerika, kuva i New Delhi mu Buhinde ujya Hongkong mu Bushinwa n’ahandi henshi, bikaba bizafasha abagenzi bakoresha RwandAir kugera henshi hashoboka.

Abakiliya bakora ingendo nyinshi muri Qatar Airways na RwandAir bagiye kujya bagera mu byerekezo byinshi bakikesha ubufatanye bwa sosiyete zombi
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza