IGIHE

Ba rwiyemezamirimo bafite inganda bahishuriwe uko GroFin yabafasha gukabya inzozi bakirinda ibibadindiza

0 30-07-2019 - saa 10:43, Evariste Nsengimana

Inzobere mu by’ubukungu n’ishoramari zigaragaza ko rwiyemezamirimo nyawe ari uhorana inzozi zo gutera imbere no kugera kuri byinshi byisumbuye ariko ko kubigeraho bimusaba kugira abafatanyabikorwa beza bamugira inama z’ingirakamaro zimurinda ibibazo byose byamukoma mu nkokora.

Muri abo bafatanyabikorwa akeneramo abamwunganira mu buryo bw’amafaranga ariko ntabwo bihagije gusa aba anakeneye n’inama zitandukanye zijyanye n’uko ishoramari rikorwa, imbogamizi zibamo n’uko yazirinda n’ibindi.

Ni muri urwo rwego ikigo cy’imari gitanga inguzanyo n’ubufasha buhoraho bwo gukurikirana imishinga y’ubucuruzi, GroFin, ku wa 26 Nyakanga, cyateguye inama yihariye kuri ba rwiyemezamirimo bakora mu bijyanye n’inganda nto n’iziciriritse.

Iyi nama yabereye muri Marriott Hotel igamije kurebera hamwe uko bagera ku ndoto zabo bakagura ibikorwa byabo by’ubucuruzi.

Umukozi wa GroFin ushinzwe ishoramari, Tambineza Richard, yagaragaje ko mu mbogamizi ba rwiyemezamirimo bahura nazo harimo kugorwa no kubona igishoro, kutagira imishinga inoze ishobora kwishimirwa n’ibigo by’imari yatuma bahabwa inguzanyo, kubura ingwate, kutagira ubumenyi buhagije n’ibindi.

Tambineza yavuze ko benshi mu bashoramari, ibigo byabo bifunga bitamaze imyaka itatu bikora.

Mu busesenguzi iki kigo cyakozwe ku bashoramari 9000, cyasanze 72% bakora batagira ibitabo bigaragaza ibyo bakora, 42% badakurikiza amategeko ajyanye n’ubucuruzi bwabo, 66% batubahiriza ibipimo ngenderwaho bijyanye n’ibidukikije, ubwirinzi n’imiyoborere ihamye, 57% nta nyigo igaragaza icyerekezo cy’ibikorwa by’ubucuruzi naho 63% ishoramari ryabo riri mu manegeka (Capital at risk).

Umuyobozi mukuru wa GroFin Rwanda, Christian Bugabo, yavuze ko “Mu byiciro bitandukanye duha inguzanyo n’ubufasha buhoraho, harimo n’inganda ariko tunagamije gushyigikira gahunda y’ibikorerwa mu Rwanda (Made in Rwanda), ubuyobozi bw’igihugu bwahaye umurongo kandi bukomeje gushyigikira”.

Yakomeje agira ati “Twabahurije hano ngo tubereke icyo GroFin yabafasha mu kwagura no guteza imbere ubucuruzi bwabo ariko natwe nk’ikigo cy’imari gifite inshingano zo guteza imbere ba Rwiyemazirimo, , ni umwanya wo kureba uruhare twagira mu guteza imbere gahunda y’ibikorerwa mu Rwanda.”

Yavuze ko mu bishingirwaho kugira ngo umushoramari ahabwe inguzanyo na GroFin harimo kuba Rwiyezamirimo afite ubushake n’ubushobozi bwo gushyira mu bikorwa indoto ze kandi agomba kuba ari inyangamugayo.

Umushinga we ugomba kuba wumvikana kandi washyirwa mu bikorwa ukunguka mu buryo burambye; iryo shoramari rigomba kuba rifitiye abaturage akamaro mu bijyanye no kubaha akazi no guteza imbere igihugu muri rusange, itanga imisoro igihugu gikoresha mu kongera ibikorwaremezo nk’amashuri, amavuriro, imihanda n’ibindi.

Bugabo yavuze ko ari amahirwe kuba igihugu gishyiraho guhunda zo guteza imbere ubucuruzi mu gihe ibihugu bya Afurika byiyemeje gushyiraho isoko rusange, rizahuza abasaga miliyari 1.2.

Ati “Ni amahirwe kuri ba rwiyemezamirimo bari mu nganda bakwiye kwitegura kubyaza umusaruro kugira ngo iryo soko bazarigiremo uruhare rugaragara.”

Yasobanuye ko ayo ari imwe mu mpamvu zatumye bahuzwa kugira ngo baganire ku mbogamizi bagira zijyanye n’iz’amafaranga n’ubundi bufasha buhoraho mu bijyanye n’ishoramari nk’uko ikigo cyabyiyemeje.

Umuyobozi ushinzwe gutanga ibirango by’ubuziranenge mu Kigo cy’igihugu gitsura ubuziranenge, RSB, Mbabazi Antoinette, yishimiye igitekerezo GroFin yagize cyo gutumira RSB kugira ngo baganirize ba rwiyemezamirimo bafite inganda nto n’iziciriritse ku bijyanye n’ubuziranenge n’inzira binyuramo kugira ngo ibigo by’ubucuruzi bibone ibyangombwa by’ubuziranenge.

Yifuje ko n’ibindi bigo by’imari byafata urugero bikajya bihugura ababigana ku bijyanye n’ubuziranenge kugira ngo ibicuruzwa byabo bihangane ku isoko kandi ibigo byabo bikomeze kunguka mu buryo burambye.

Ati “Nashimishijwe n’uko GroFin usibye kuba bakuguriza, mbere yo kubikora babanza gufata umwanya wo kureba ko ibyo ushaka gukora uzabikora mu buryo butanga icyizere, ko bizaramba, bitewe n’uko iby’ibanze bisabwa wabyitateho. Bafite ubuhanga bugufasha kumenya iby’ibanze bitanga icyizere cy’ishoramari ryawe mu gihe kirekire.”

Yashimye ko GroFin iguhaye inguzanyo itagutererana nk’uko ibindi bigo by’imari bibigenza. Ati “Ni nabwo buvugizi mpora nkorera abafite inganda ko ibigo by’imari bikwiye kureka kwihutira gusaba ingwate bititaye ku burambe umushinga ufite.”

Umuyobozi w’Agasaro Organic Ltd, Uzamukunda Isabelle, wahawe inkunga na GroFin, yatanze ubuhamya bw’uko yabanje gusiragira mu bigo by’imari bitandukanye ntibihe agaciro umushinga we.

Yavuze ko nyuma yagannye GroFin akayigezeho umushinga, abakozi bayo bakamufasha kuwukorera ubugorongingo, bakamuha amafaranga awushyirisha mu bikorwa uyu munsi akaba ahagaze neza.

Ba rwiyemezamirimo bashimye imikorere ya Grofin, by’umwihariko ubufasha bw’inama mu gutegura umushinga no gukurikirana uko uwahawe inguzanyo ayikoresha.

Andrew Kanyonyo waturutse muri New Kigali Designers & Outfitters yagize ati “Nshimiye GroFin yaduhurije hano, cyane cyane kuri buriya bufasha itanga mu ishoramari. Ikintu kiri kwica ishoramari ni uburyo ibigo by’imari bitanga inguzanyo, biheruka bigusura bireba ingwate, bikazagaruka bije kugukingira ariko aba batweretse ko bafashanya.”

GroFin itanga inguzanyo zihera kuri miliyoni 90 Frw kugeza kuri miliyari 1.3 Frw. Kuva muri Werurwe 2007, GroFin yatanze inguzanyo zirenga miliyoni $20 kuri ba rwiyemezamirimo bakorerera mu Bukerarugendo, Ubuvuzi, Uburezi, Inganda, Ubuhinzi, Ubwikorezi, Ubwubatsi n’ibindi. Arenga 50% amaze gutangwa mu myaka ine ishize kandi GroFin ifite gahunda yo gukomeza kuzamura inguzanyo itanga n’ubufasha buhoraho, intego ari ukuzamura ibigo by’ubucuruzi bito n’ibiciriritse.

Bugabo yavuze ko mu bishingirwaho kugira ngo umushoramari ahabwe inguzanyo na GroFin harimo kuba Rwiyezamirimo afite ubushake n’ubushobozi bwo gushyira mu bikorwa indoto ze kandi agomba kuba ari inyangamugayo
Hatanzwe ibitekerezo bigaruka ku nkunga GroFin igenera abikorera
Umuyobozi mukuru wa GroFin Rwanda, Christian Bugabo, yavuze ko batanga inguzanyo mu byiciro bitandukanye by'abikorera
Andrew Kanyonyo waturutse muri New Kigali Designers & Outfitters , ni umwe mu bitabiriye
Bamwe mu bitabiriye amahugurwa bashimye uburyo GroFin ifasha ba rwiyemezamirimo
Andrew Kanyonyo waturutse muri New Kigali Designers & Outfitters yashimye serivisi za GroFin
Umuyobozi Mukuru wa GroFin Rwanda, Christian Bugabo (iburyo) aganira n'umwe mu bitabiriye iki gikorwa
Umuyobozi ushinzwe gutanga Ibirango by’Ubuziranenge mu Kigo cy’Igihugu gitsura Ubuziranenge (RSB), Mbabazi Antoinette, ari gutanga ikiganiro
Umwe mu bakozi ba GroFin atanga ikiganiro
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza