IGIHE

Abantu umunani bamaze gutsindira miliyoni 8 mu ‘IKOFI’ ya Banki ya Kigali

1 10-07-2019 - saa 15:51, Habimana James

Nsengiyumva Buntu Ezechiel umuturage wo mu karere ka Rubavu mu Ntara y’i Burengerazuba, ni we wabaye umuntu wa munani watsindiye miliyoni 1 Frw binyuze muri serivisi ya ‘IKOFI’ ya Banki ya Kigali ifasha abahinzi kubitsa, kubikuza, kohereza amafaranga ku buntu, kwishyura imbuto, inyongeramusaruro n’ibindi.

Kuri uyu wa Kabiri nibwo Nsengiyumva yahawe sheki ya miliyoni 1 Frw ku cyicaro gikuru cya Banki ya Kigali, ayishyikirizwa n’abayobozi barimo Umuyobozi ushinzwe iyamamazabikorwa muri BK, Thierry Nshuti.

Yabaye umuntu wa munani utsindiye amafaranga muri iyi gahunda yatangijwe muri Gicurasi.

Tariki 16 Gicurasi uyu mwaka nibwo Banki ya Kigali (BK) yatangije serivisi nshya y’ikoranabuhanga yise IKOFI, ifasha abahinzi bajyaga bagorwaga no kubona serivisi z’imari. Iyi serivisi yatangijwe mu nama ya Transform Africa Summit.

Ni gahunda y’ibyumweru 30, buri cyumweru umuhinzi watoranyijwe kubera gukoresha cyane ubwo buryo ahembwa miliyoni.

Ni igikorwa gikomeye ku banyarwanda kuko hejuru ya 70% byabo bakora ubuhinzi, uru rwego rugatanga umusanzu usaga 30% mu bukungu bw’igihugu nyamara abahinzi benshi ntibabasha kugera kuri serivisi z’imari, kuko amafaranga banki zishora muri uru rwego akiri munsi ya 6%.

Mu mpamvu ziza imbere harimo ko banki zitabasha kubona uburyo umuhinzi yunguka ngo bishingirweho mu kumuha inguzanyo, cyangwa ugasanga hari ingorane zikiri mu buhinzi ku buryo hari igihe butagaragara nk’ishoramari ryunguka.

Umuyobozi Mukuru wa BK Group PLc, Dr Diane Karusisi, yavuze ko ubu buryo bufasha abahinzi kujya bagaragaza neza ishusho y’ubuhinzi bwabo, bityo ayo makuru akaba yashingirwaho mu kubafasha kwagura ishoramari.

Yagize ati “Twizera ko IKOFI ari uburyo bugezweho bwafasha mu by’imari kandi uretse ubundi buryo bwo kubika amafaranga kuri telefoni buri ku isoko, twifuza ko IKOFI yafasha no mu buryo busanzwe bwo gukorana na banki ku bahinzi bose mu gihugu, tukaba twarateganyije uburyo bwafasha buri muhinzi kwitabira ngo ajye abona inguzanyo mu bikorwa bye.”

Mu bamaze gutsinda agahabwa miliyoni 1 Frw muri izi miliyoni umunani zimaze gutangwa, harimo Uwizera Devotha wo mu Karere ka Rusizi, Umurenge wa Nyakabuye.

Uwizera w’imyaka 30 yavuze ko ubusanzwe yumvaga babivuga kuri radiyo nyuma na we aza gufunguza iyi konti ndetse atangira kujya abitsa cyangwa akoherereza amafaranga abantu batandukanye, ku bw’amahirwe atombora miliyoni.

Yagize ati “Nagiye kumva numva barampamagaye barambwira ngo ni kuri Radiyo Rwanda, bambaza niba narakinnye muri gahunda ya Ikofi mbabwira ko nabikoze, niko kumbwira ko natsindiye aya mafaranga.”

Yavuze ko ajya kubitsa yabikije amafaranga ibihumbi 30 Frw mu bihe bitandukanye kandi akanabikuza.

Yagize ati “Bamwe baravugaga ngo ni ukubeshya ariko njye icyizere nari nkifite, ubu aya mafaranga ngiye kuyakoresha kuko mu gihe cy’impeshyi byamvunaga kuvomerera imboga, ubu ngiye kuguramo imashini. Iyi gahunda ni nziza kuko ituma twizigama kandi tutagiye kure, tukaguramo ibicuruzwa amafaranga tutayafashe mu ntoki, nabwira n’abandi gufunguza konti kuko ni Ubuntu, bisaba indangamuntu gusa.”

Ndikubwimana Emmanuel uvuka mu karere ka Ngoma na we umaze gutsindira miliyoni 1 Frw muri gahunda ya IKOFI, yavuze ko iyi serivisi yayimenye nyuma yo gutega amatwi radiyo agahita afungura kuri telefoni akurikije uko bari bamaze kubisobanura.

Ati “Kuva ngiye mu IKOFI nari maze kubikaho ibihumbi 24, nyuma ngura imiti y’amatungo nkoresheje IKOFI hashize iminsi bambwira ko natsindiye miliyoni.”

Yakomeje agira ati “Nari nsanzwe ndi umuhinzi uciriritse ariko mu by’ukuri iyi gahunda ya BK ubona ko yaje gufasha abanyarwanda cyane cyane batishoboye kuko ubundi kubona miliyoni byari bigoye. Ubu ngiye kwagura ubuhinzi bwanjye kandi ngiye gukodesha andi masambu kuko nta bushobozi nagiraga.”

Umuyobozi Mukuru ushinzwe ikoranabuhanga muri Banki ya Kigali, Regis Rugemanshuro, yavuze ko BK yafashe umwanzuro wo kuzamura inguzanyo y’imari ihabwa ubuhinzi ariko bakabikora bakoresheje ikoranabuhanga.

Yagize ati “Uru ni urugendo twatangiranye kandi tuzarukomezanya, icyo twifuza ni uko umuhinzi wese ukoresha IKOFI ubuzima bwe buzakomeza kugenda butera imbere abifashijwemo na Banki ya Kigali.”

Yavuze ko mu byo IKOFI ikora ubu harimo koherezanya amafaranga no kwiyandikisha kandi aho batandukaniye n’izindi serivise za Mobile Money, byose bikorwa ku buntu.

Imikorere ya IKOFI

IKOFI ikoreshwa kuri telefoni aho umuhinzi yiyandikisha akoresheje *334*2# na nimero y’indangamuntu; yegera umucuruzi w’inyongeramusaruro ugomba kubyemeza, akamuha umubare w’ibanga akoresha.

Udafite telefoni abifashwamo n’umucuruzi w’inyongeramusaruro akandikwa, agahabwa agafunguzo (Near Field Communications, NFC) gafite ikoranabuhanga ribikwamo amakuru ye, akakifashisha mu kubitsa no kubikuza kuri telefoni.

Impamvu y’umucuruzi w’inyongeramusaruro ni uko ari serivisi igenewe abahinzi gusa, nk’urwego rurimo amahirwe menshi ariko rudashorwamo imari uko bikwiye. Uyu mucuruzi akora nk’aba ‘agent’ batanga serivisi za mobile money, kuko IKOFI ikora nka zo.

Muri iyi serivisi umuhinzi ashobora kubitsa, kubikuza, kohereza amafaranga ku buntu mu Rwanda, kwishyura imbuto n’inyongeramusaruro. Indi serivisi IKOFI itanga ni iyo kugura umusaruro no kwishyura ubwiteganyirize bwa ‘Ejo Heza’.

Nsengiyumva yatsindiye miliyoni bituma amafaranga amaze gutangwa mu ‘IKOFI’ ya BK aba miliyoni umunani
Umuyobozi Mukuru wa BK Group PLc, Dr Diane Karusisi, yavuze ko ubu buryo bufasha abahinzi kujya bagaragaza neza ishusho y’ubuhinzi bwabo
Abatsindiye miliyoni mu ‘IKOFI’ ya Banki ya Kigali bagaragaje uko bigiye guhindura ubuzima
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Théoneste 2019-07-11 09:59:21

ni gute umuntu abitsa ku ri konti ya Ikofi? cyangwa muduhe numero y’ ubufasha twabarizaho.

Kwamamaza