IGIHE

Gahunda yo kugaburira abana ku mashuri ihagaze ite mu myaka itanu imaze?

7 18-03-2019 - saa 11:59, Emma-Marie Umurerwa

Mu mwaka wa 2014 nibwo leta yatangije gahunda yo kugaburira abana biga mu burezi bw’ibanze bw’imyaka 9 na 12, hagamijwe kubafasha kwiga neza ntawe uguye isari.

Iyi gahunda itaratangira, hari abana bigaga amasomo ya nyuma ya saa Sita basinzira abandi bayura kubera inzara, mu gihe abandi batahaga bakagaruka ku ishuri bakerewe kubera ko basanze ibiryo bitarashya cyangwa se kubera urugendo rurerure.

Kuva iyo gahunda yatangira, ababyeyi bayigize iyabo ndetse abashinzwe uburezi bahamya ko yazanye impinduka mu mitsindire y’abanyeshuri.

Hari ibikoma mu nkokora iyi gahunda

Ababyeyi bo mu bice bitandukanye baganiriye na IGIHE, bavuga ko batanga hagati ya 10.000 Frw na 12.000 Frw buri kwezi, ariko ngo abana babo hari aho barya nabi cyangwa se ntibahabwe ifunguro ribahagije kubera impamvu zitandukanye.

Mukasekuri Marie Rose ufite umwana wiga ku Rwunge rw’amashuri rwa Nduba mu Karere ka Gasabo, yagize ati “Abana bagaburirwa akawunga n’ibishyimbo kuva ku wa Mbere kugeza ku wa Gatanu. Hari n’igihe bataha bavuga ko batahaze.”

Kirenga Damien wo mu Karere ka Gicumbi we yagize ati “Ubundi iriya gahunda yari nziza ariko ikibazo gihari ni uko dutanga amafaranga noneho ugasanga babandi barihirwa na Leta batinze kuyatanga bigatuma abana bacu barya nabi kandi ntibahage.”

Abayobozi b’ibigo by’amashuri bitandukanye baganiriye na IGIHE, bose bashima iyi gahunda kuko ngo yatumye abana bakurikira amasomo neza kandi bagatsinda.

Ku rundi ruhande bagaragaza ko hakiri ikibazo kuri Minisiteri y’Uburezi yemeye kujya itangira buri mwana 57 Frw, akenshi agatangwa bitinze.

Umuyobozi w’Urwunge rw’Amashuri rwa Busanza mu Karere ka Kicukiro, Sewase Jean Claude, avuga ko abana afite bagaburirwa ifunguro rya saa sita ari 931, ababyeyi bakaba basabwa gutanga 12.000Frw mu gihembwe, ubwo ni 4000 Frw mu cyumweru. Leta ibaha 56 Frw ku mwana ahwanye na 3.993.990 Frw ku gihembwe, ariko ngo bayabona impitagihe.

Ati “Gahunda ni nziza cyane kuko yakemuye ibibazo byinshi birimo iby’abana bakererwa, abiga basinzira cyangwa bayura kubera inzara n’ibindi. Ariko kandi irimo ibindi bibazo by’ingutu. Nk’ubu mu bana barenga 900 dufite abamaze kwishyura ni 400 gusa kandi urabona ko igihembwe kibura iminsi mike ngo kirangire. Ayo Leta igomba kuduha nayo ntirayatanga.”

“Usanga ikigo gihora gifitiye amadeni ba rwiyemezamirimo kubera ariya mafaranga Leta idatangira igihe. Ayo mafaranga agiye azira igihe nta kibazo twagira. Nko mu mwaka w’ingengo y’imari wa 2017-2018, ay’igihembwe cya mbere twayabonye muri Kamena, igihembwe cya kabiri cyo ntayo baduhaye kandi abana barariye. Ibi rero bitugiraho ingaruka zikomeye cyane niho usanga n’ababyeyi bavuga ko abana babo badahaga nawe urumva aho biba byapfiriye.’’

Umuyobozi w’Urwunge rw’Amashuri rwa Gihinga mu Karere ka Bugesera, Munyantwari Vedaste, yabwiye IGIHE ko bagerageza kwishakamo ibisubizo bafatanyije n’ababyeyi, ariko hakiri imbogamizi.

Ati “Iyi gahunda ababyeyi bayigize iyabo kandi barayishyimiye cyane. Mu bana 592, abagera kuri 500 barishyuye, naho 65 ni abo mu cyiciro cya mbere cy’ubudehe, abandi basigaye ni abana b’abakene batuye hafi y’ishuri, ababyeyi badusabye ko bajya kurya mu rugo.’’

Uyu muyobozi avuga ko umubyeyi asabwa gutanga 10.000 Frw mu gihembwe, utayaboneye rimwe akayatanga mu byiciro bibiri kandi ko bikorwa neza.

Ati ‘‘Ikibazo gikomeye dufite ni ariya mafaranga agomba gutangwa na Leta ntajya azira igihe, ni iyanga pe ! Hari igihe tuyategereza nk’amezi atandatu kandi abana baba bagomba kurya. Usanga rero tugondoza ba rwiyemezamirimo ngo bakomeze baduhe ibiryo ugasanga ikigo gihora mu madeni.’’

Icyifuzo cy’abayobozi b’ibigo batandukanye ni uko Minisiteri y’Uburezi yajya ibagezaho amafaranga ku gihe, kuko ngo bayaboneye igihe nta kabuza abana barya neza kandi bagafata ifunguro rihagije hatabayeho gusaranganya ibihari.

2019-2020 : Mineduc izakoresha miliyari 7 FRW mu kugaburira abana ku ishuri

Umuvugizi wa Minisiteri y’Uburezi, Serafina Flavia, avuga ko gutinda kw’amafaranga biterwa n’impamvu zitandukanye.

Ati ‘‘Twebwe ibyo dusabwa tuba twabikoze, ariko ugasanga hari nk’ibibazo by’amalisiti ataratunganywa bitewe n’uko iyo umwaka ugitangira imibare y’abana iba yarahindutse.’’

Umuyobozi ushinzwe Igenamigambi na Politiki y’Uburezi muri Mineduc, Rose Baguma, yabwiye IGIHE ko 56 FRW ari yo yagenewe gahunda yo kugaburira abana ku ishuri.

Ati ‘‘Kugaburira abana ku ishuri ni inshingano z’ababyeyi mbere na mbere. Amafaranga 56 niyo nkunga ya leta ku mwana. Bitewe n’ubushobozi buzaboneka, Leta irateganya kuyongera. Ingengo y’imari yagenewe iyi gahunda mu myaka itanu ishize yari miliyari 5.5 Frw mu mwaka, ariko mu ngengo y’imari ya 2019/2020 yariyongereye, hateganyijwe miliyari 7 Frw.’’

Yakomeje avuga ko kugeza ubu abanyeshuri biga mu burezi bw’ibanze bw’imyaka 9 na 12 barya ku ishuri ari 97.3%, Umujyi wa Kigali ukaza ku isonga n’ubwitabire bugera ku 100%, Amajyaruguru 99.4%, Intara y’Uburengerazuba 95.2%, Amajyepfo 97.3%, Intara y’Uburazirazuba nayo ikagira ubwitabire bwa 97.3%.

Umwanzuro wa 7 w’Umwiherero w’Abayobozi Bakuru wa 16, ugira uti “Kuvugurura gahunda yo kugaburira abana ku mashuri ku bufatanye n’inzego zose zibifitemo uruhare.’’

Baguma avuga ko mu gushyira mu bikorwa uyu mwanzuro, hateganyijwe ko ku ifunguro ry’abanyeshuri hongerwamo n’amata, mu biribwa bihabwa abanyeshuri hagomba kwibanda ku byera mu karere ishuri riherereyemo no kuvugurura ibigize ifunguro.

Mu rwego rwo kurushaho kubungabunga ubuzima bw’abana b’u Rwanda, Leta yatangije gahunda ya ‘Inkongoro y’umwana’ ireba abana bo mu mashuri y’incuke kugera mu wa Gatatu w’amashuri abanza, ikaba izashyirwa mu bikorwa na Gahunda y’Igihugu mbonezamikurire.

Minisiteri y’Uburezi yibutsa ababyeyi ko gahunda yo kugaburira abana ku ishuri bagomba kuyigira iyabo, bagatanga imisanzu yagenwe mu nama rusange y’ababyeyi (amafaranga, ibiribwa, umusanzu mu kazi) ku ishuri ku gihe.

Gahunda yo kugaburira abana ku mashuri yazanye impinduka mu burezi mu Rwanda

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
munyazikwiye 2019-03-22 07:08:43

Abana kurirakwishuri nibyiza ariko reta yibukeko nomungo harabaryarimwe kumunsi abacyene bagize abakire ataribo biza ge ndabite.

2
victor N 2019-03-19 03:37:51

Njye mbona iriya gahunda ari nziza pe gusa ni uko itubahirizwa mu bigo bimwe na bimwe aho usanga abana bamwe batinda kwishyurirwa ayo mafaranga nti bagaburirwe gusa ugasanga bishyuzwa kdi batarariye ndetse ugasanga rimwe narimwe ifunguro rigenerwa abakozi bi bigo kurusha abanyeshuri bazategure uburyo bunoze aho kwirirwa babeshya ngo gahunda irakorwa kdi ari ukubeshya bajye bamenyako amagara aramirwa atamerwa bamenyeko hari quantite na qualite runaka ikenewe ku ifunguro ryakagombye guhabwa aba bana bacu aho kubicisha inzara gusa ngo barabatekera.Reba nawe kuri iyo foto iryo funguro abo bana barimo kurya!

3
kody 2019-03-18 23:10:43

Ko ibigo by’amashuri bifite ahantu hanini hadakoreshwa kuki badahinga imboga ngo ribe ifinguro ryuzuye.

4
kody 2019-03-18 23:07:00

isuku nayo irakenewe...uhereye aho bitegurirwa,aho barira,amasahane n’ibindi bikoresho.

5
Murenzi 2019-03-18 10:35:49

N iriya sahani ni muyihishe! Ifunguro rituzuye!

6
Murenzi 2019-03-18 10:35:48

N iriya sahani ni muyihishe! Ifunguro rituzuye!

7
mujyambere 2019-03-18 07:42:58

MINEDUC nibanze inubahirize gahunda yo gutanga izo 56F ku buri mwana mbere yo kuvuga ko iye kwongera inkunga. ni gute izongera inkunga yo kugabura ikongeraho n’amata yo kunywa kd gahunda yambere bigaragarako nayo yayinaniye. uwo wavuze nawe ngo gahunda yo kugabururira abana irareba mbere ababyeyi ninde mubyeyi utabizi ashaka kwigisha? MINEDUC nitange uko bikwiye ibyo yiyemeje nireke kwitanan bamwana n’ababyeyi SVP!

Kwamamaza