Umuyobozi ushinzwe Ubukerarugendo mu Kigo cy’Igihugu gishinzwe Iterambere (RDB), Belise Kaliza, yatangaje ko inyungu u Rwanda rwakuye mu bukerarugendo bw’abajya gusura ingagi mu birunga yiyongereyeho 39% hagati ya Gicurasi na Nyakanga 2017 ugereranyije n’amezi nk’ayo mu mwaka ushize.

Kuwa 6 Gicurasi nibwo RDB yatangaje igiciro gishya cyo gusura ingagi mu birunga, kivanwa ku madolari ya Amerika 750 gishyirwa ku 1500 $ kuri buri muntu wese.

Ni icyemezo bamwe batishimiye bavuga ko hari abo kizakumira bifuza gusura ingagi, bitewe n’uko ari igiciro kitapfa kwigonderwa na buri muntu wese.

Nk’uko byagiye bigaragara, abantu ntibahwemye kwishyura uburenganzira bwo kujya gusura ingagi, bakaba baraniyongereye ugereranyije n’umwaka ushize, cyane cyane mu mezi ubukerarugendo buba buri ku rwego rwiza.

Abinyujije kuri Twitter, Kariza yagize ati “Hagati ya Gicurasi - Nyakanga 2016 na Gicurasi - Nyakanga 2017, inyungu yavuye mu gusura ingagi yiyongereyeho 39% n’impushya zo gusura ingagi zaguzwe ziyongeraho 22%.”

Kaliza ntiyavuze umubare nyirizina wa ba mukerarugendo n’amafaranga bishyuye muri icyo gihe ugereranyije na 2017 muri ayo mezi.

RDB ivuga ko abantu basura ingagi ku munsi mbere bari 80 nubwo batangiye kwiyongera, ku mwaka ingagi zikaba zisurwa n’abantu bagera ku bihumbi 29.

U Rwanda ruritegura Kwita Izina

Ku nshuro ya 13 Abanyarwanda bagiye kwifatanya n’abanyamahanga biganjemo inzobere mu kubungabunga urusobe rw’ibinyabuzima, mu muhango wo Kwita Izina ingagi 19 zirimo ingore enye zaje mu zindi ziturutse mu bice by’ishyamba rya Pariki ya Virunga muri Repubulika Iharanira Demokarasi ya Congo cyangwa Uganda.

Ku itariki ya 1 Nzeri 2017 nibwo uwo muhango ukomeye uzabera mu Karere ka Musanze.

Umuyobozi ushinzwe kubungabunga amapariki muri RDB, Bisengimana Eugene, aheruka gusobanura ko uyu mwaka “Kwita Izina” bidasanzwe kuko hazatangwa amazina ku bana b’ingagi 14 bavutse, hakiyongeraho enye zaturutse mu mashyamba n’izindi zirindwi ziyomoye ku miryango yazo zizahabwa izina rishya ry’uwo muryango.

Yagize ati “Hari ingagi dufite dukurikirana dukoreraho ubukerarugendo n’ubushakashatsi ariko hari n’izindi tutigeze tumenyereza ziri mu ishyamba, birashoboka ko hari izavayo zikiyunga na za zindi dukurikirana. Kuzita amazina bidufasha kuzimenya no kuzikurikirana umunsi ku wundi.”

Nyuma yo kuzamura ibiciro byo gusura ingagi, u Rwanda ruteganya kwinjiza miliyoni 444 $ mu bukerarugendo, avuye kuri miliyoni 404 $ yinjjijwe mu mwaka ushize. Bizagendana n’inyungu iva mu bukerarugendo isaranganywa abaturiye pariki, izava kuri 5% ikazaba 10%.

U Rwanda rufite imiryango 20 y’ingagi ivuye ku icyenda mu 2010.

Ingagi ziri mu bikurura ba mukerarugendo benshi mu Rwanda


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved