IGIHE

Neymar, Kylian Mbappé, Angel di Maria na Sergio Ramos mu bise amazina abana b’ingagi ku nshuro ya 17

0 24-09-2021 - saa 21:11, Iradukunda Serge

Neymar Jr, Kylian Mbappe na Angel di Maria, Sergio Ramos na Marquinhos bakinira PSG na Bukayo Saka ukinira Arsenal ni bamwe mu bitabiriye umuhango wo kwita izina abana b’ingagi 24 baherutse kuvuka mu miryango itandukanye y’izi nyamaswa ziba muri Pariki y’Igihugu y’Ibirunga.

Umuhango wo kwita izina abana b’ingagi ni umwihariko w’u Rwanda. Watangijwe mu 2005 mu rwego rwo kwerekana agaciro ingagi zifitiye igihugu ndetse no gushimira abaturage baturiye Pariki y’Ibirunga, abita ku bayigana n’abavuzi bazo.

Kuri iyi nshuro ubwo uyu muhango wabaga ku nshuro ya 17, wabaye hifashishijwe ikoranabuhanga mu rwego rwo kwirinda icyorezo cya COVID-19. Abana b’ingagi 24 bahawe amazina ni abavutse nyuma y’itariki ya 6 Nzeri 2019.

Abise aba bana b’ingagi barimo ibyamamare mu mikino itandukanye, abayobozi b’imiryango ikomeye ku Isi ndetse n’inzobere mu bijyanye n’ibidukikije n’urusobe rw’ibinyabuzima.

Mu cyiciro cya mbere cy’abise amazina harimo Kapiteni wa Patriots Basketball Club, Arstide Mugabe wise umwana w’ingagi ‘Inkomezi’.

Harimo kandi Umuyobozi wa Federasiyo ya Basketball muri Sudani y’Epfo, Luol Denge wise umwana w’ingagi ‘Rinda’, Mr Eazi wise umwana w’ingagi ‘Sangwa’, Prof Beth Kaplin ukora muri Kaminuza y’u Rwanda wamwise ‘Twirinde’ n’Umuyobozi w’Ikigo cya African Parks Network, Jes Gruner wamwise ‘Ingabire’.

Icyiciro cya kabiri cy’abise amazina kigizwe n’Abanyarwanda b’urubyiruko bakora mu nzego zitandukanye.

Uwamahoro Jeanne d’Arc uri mu bakorerabushake bafasha mu iyubahirizwa ry’amabwiriza yo kwirinda COVID-19 na Alphonsine Niwemugeni, ukora nk’umujyanama w’ubuzima bise umwana w’ingagi ‘Impanuro’.

Clementine Uwamahoro ushinzwe kubungabunga urusobe rw’ibinyabuzima muri Pariki y’Akagera we yamwise ‘Kundumurimo’, mu gihe umuhanzi Bruce Melodie yamwise ‘Kabeho’.

Icyiciro cya gatatu cy’abise izina harimo inzobere mu kuvura ingagi, Dr Deborah Dunham wamwise ‘Nshunguye’, Umuyobozi Mukuru wa Global Environment Facility, Carlos Manuel Rodriguez wamwise ‘Injishi’.

Muri iki cyiciro kandi mu bise amazina harimo inzobere mu gufata amafoto, David Yarrow wamwise ‘Urusobe’, Antony Lynam wamwise ‘Mugwire’ na Yann Arthus Bertrand wamwise ‘Iribagiza’.

Mu cyiciro cya kane, abana b’ingangi bahawe amazina n’abantu batandukanye barimo Perezida wa Toronto Raptors, Masai Ujiri wamwise ‘Umusingi’, Komiseri wungirije wa NBA, Mark Tatum wamwise ‘Rudacogora’, Umujyanama w’Umuyobozi Mukuru wa OMS, Prof Senait Fisseha wamwise ‘Mubyeyi’ n’Umuyobozi Mukuru wa IMEX, Carina Bauer wamwise ‘Byiruka’.

Umuyobozi Mukuru wa Mastercard Foundation, Reeta Roy we yise umwana w’ingagi ‘Zigama’, Ambasaderi w’Umuryango w’Ubumwe bw’u Burayi mu Rwanda, Nicola Bellomo amwita ‘Iratuje’.

Abatanze amazina mu cyiciro cya nyuma ni abakinnyi b’ikipe yo mu Bwongereza ya Arsenal n’aba Paris Saint Germain yo mu Bufaransa. Aba bose bise abana b’ingagi amazina binyuze mu masezerano ya ‘Visit Rwanda’ amakipe yabo afitanye n’u Rwanda.

Bukayo Saka ukinira Arsenal yise umwana w’ingagi ’Kura’, mu gihe Neymar, Kylian Mbappe, Angel di Maria, Sergio Ramos na Marquinhos bakinira PSG bise abana batatu ari bo ’Ingeri’, ’Nshongore’, na ’Mudasumbwa’.

Abise amazina bose bahurije ku kuba atari bo bazabona bagize igihe cyo guhura amaso ku maso n’aba bana b’ingagi bise.

Umuyobozi w’agateganyo ushinzwe ubukerarugendo mu Rwego rw’Igihugu rw’Iterambere (RDB), Ariella Kageruka, yashimye abagize uruhare muri uyu muhango wo kwita abana b’ingagi izina.

Yavuze ko kwita izina mu muco nyarwanda ari ikimenyetso gikomeye cy’urukundo no kwiyemeza kubungabunga imibereho myiza y’umwana.

Yavuze ko kuba abana b’ingagi bahabwa amazina ari ikimenyetso cy’uko nabo bazitabwabo kandi aho baba hakarindwa.

Kageruka yavuze ko kuba ingagi zikomeje kwiyongera no kubaho neza, igihugu kibikesha Abanyarwanda bose cyane cyane abaturiye parike.

Ati “Turashimira cyane Abanyarwanda uruhare rwabo cyane cyane abaturiye parike zose z’igihugu mu kubungabunga urusobe rw’ibinyabuzima;ni wo musingi w’ibyiza twizihiza uyu munsi harimo no kuba ingagi zikomeje kubaho neza kandi zikiyongera.”

Yasabye Abanyarwanda n’abanyamahanga kurushaho gusura ibyiza bitatse u Rwanda.

Kuva mu myaka 15 ishize, abana b’ingagi barenga 300 nibo bamaze kwitwa amazina muri uyu muhango ngarukamwaka. Umuhango w’uyu mwaka wo kwita izina ingagi wahuriranye n’itariki isanzwe yizihizwaho Umunsi Mpuzamahanga wahariwe Ingagi, tariki ya 24 Nzeri. Ni umunsi wagiyeho bigendeye ku bikorwa bya Dian Fossey, Umunyamerikakazi wari wariyeguriye kwita ku buzima bw’inyamaswa by’umwihariko ingagi zo mu misozi.

Kapiteni wa Patriots Basketball Club, Arstide Mugabe yise umwana w’ingagi ‘Inkomezi’
Umuyobozi wa Federasiyo ya Basketball muri Sudani y’Epfo, Luol Denge yise umwana w’ingagi ‘Rinda’
Mr Eazi ukunzwe mu muziki ni umwe mu bitabiriye uyu muhango
Umuyobozi wa African Parks Network, Jes Gruner yise umwana w'ingagi ‘Ingabire’
Prof Beth Kaplin ukora muri Kaminuza y’u Rwanda yamwise ‘Twirinde’
Bukayo Saka ukinira Arsenal yise umwana w’ingagi ’Kura’
Perezida wa Toronto Raptors, Masai Ujiri ‘Umusingi’ niryo zina yahaye umwana w'ingagi
Prof Senait Fisseha yise umwana w'ingagi 'Mubyeyi'
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza