Umuyobozi ushinzwe iterambere ry’ikigo Carlson Rezidor Hotel Group mu bihugu by’Afurika bivuga Icyongereza, Simone Kuhn, yahishuriye abagore ibanga ryo kuba indashyikirwa mu bikorwa byo kwakira abantu birimo amahoteli n’ubukerarugendo.

Ubusanzwe bisa nk’ibigoranye kubona umugore mu buyobozi bwo hejuru bw’ibigo byakira abantu ndetse bikabera isobe abagore kwigaragaza ariko Simone asanga nta kindi bisaba kitari ukwiha intego y’aho ushaka kugera maze ukayikurikirana ubudahuga.

Carlson Rezidor ni ikigo kabuhariwe mu gucunga amahoteli ku isi kikaba ari cyo gicunga Radisson Blu Hotel & Convention Centre Kigali na Park Inn by Radisson Kigali iherereye mu Kiyovu.

Simone ari mu bagore b’indashyikirwa mu rwego rw’amahoteli muri Afurika, mu kwezi gushize akaba yarashyizwe ku rutonde rw’abagore 100 bateje imbere uru rwego ku mugabane.

Ubwo yari yitabiriye Inama y’Ihuriro ry’Abashoramari mu by’Amahoteli muri Afurika (AHIF) yaberaga i Kigali mu cyumweru gishize, Simone yaganiriye na IGIHE maze asobanura uko umugore yashobora kuba indashyikirwa mu guteza imbere inzego za serivise, anavuga ku ntego za Carlson Rezidor zo gukomeza kwagurira ibikorwa ku mugabane wa Afurika.

Simone amaze igihe akora ibikorwa by’indashyikirwa mu rwego rw’ubukerarugendo n’amahoteli muri Afurika, mu mezi 16 ashize akaba yarashoboye kongera amahoteli atatu ku rutonde rw’acungwa na Carlson Rezidor.

Yagize ati “Ndatekereza ko ntacyo bivuze kuba umugabo cyangwa umugore muri uru rwego rwa serivise. Nta tandukaniro rihari. Bisaba gusa kwishyira mu mwanya ukwiye kandi ku gihe gukwiye maze ukihatira gukorana n’abantu bashobotse. Ikindi ni uko bisaba kwigirira icyizere no kwiha icyerekezo.”

Simone Kuhn, Umuyobozi ushinzwe kwagura ibikorwa muri Carlson Rezidor Hotel Group akaba ari ku rutonde rw'abagore 100 b'indashyikirwa mu guteza imbere urwego rw'amahoteli muri Afurika

Simone yakanguriye abagore kwiha intego iboneye kandi bagakora cyane kugira ngo bayigereho, bakirinda icyabarogoya cyose ubundi bagakomeza intambwe bajya imbere.

Carlson ikomeje kwagura ibikorwa

Simone yibanda ku kwagura ibikorwa cya Carlson Rezidor mu bihugu 10 by’Afurika bikoresha Icyongereza birimo Botswana, Ethiopia, Malawi, Zambia, Namibia n’ibindi aho bafite amahoteli 28. Ubusanzwe Carlson Rezidor icunga amahoteli y’ibigo bine bikomeye ku isi ari byo Radisson Blu, Radisson Red, Park Inn na Quorvus; kuri ubu ikaba icunga amahoteli 80 afite ibyumba birenga 17,200 harimo ibikoreshwa n’ibicyubakwa ku mugabane w’Afurika. Intego ni ukugira amahoteli 125 afite ibyumba birenga 23,000 muri Afurika bitarenze mu 2022.

Yagize ati “Ubu turangamiye ibihugu bifite isoko rinini harimo Nigeria, Afurika y’Epfo, Tanzania, Kenya, Malawi, Zambia, Zimbabwe... kandi turateganya kwinjira mu mikoranire n’ibindi bigo bikomeye mu ishoramari ry’amahoteli mu mwaka utaha.”

Yavuze ko isoko ry’u Rwanda bamaze kuryinjiramo neza kuko bahafite amahoteli abiri, bityo bakaba badateganya kuhazana ayandi mu gihe cya vuba. Simone yavuze ko asanga u Rwanda ari igicumbi cy’ubukerarugendo no kwakira inama muri Afurika y’Iburasirazuba ndetse ko iteka iyo ahageze atangazwa n’ishyaka ry’Abanyarwanda mu korohereza ishoramari, bityo agasanga hari amahirwe yo gutera imbere kw’ishoramari mu Rwanda.

Simone ukomoka muri Afurika y’Epfo ahamya ko yavukiye muri hoteli ndetse uyu mwuga ukaba mu maraso ye kuko ise yabaye umuyobozi mukuru wa Sun International Hotels & Casinos igihe kirekire. Simone we yinjiye muri uyu mwuga neza mu 2000 ubwo yatangiraga amasomo mu Bwongereza agahita yinjira mu buyobozi bw’amahoteli mu Bwongereza no muri Afurika y’Epfo akorera Relais & Châteaux and Starwood.

Muri Gicurasi 2011, Simone yinjiye muri Carlson Rezidor Hotel Group kuri ubu icunga amahoteli arenga 480 akagira ibyumba birenga 106,000 harimo ibikoreshwa n’ibicyubakwa mu bihugu bigera kuri 80 birimo 29 byo muri Afurika.

Park Inn by Radisson Kigali iherereye mu Kiyovu ahahoze Hotel Kiyovu. Iyi hotel icungwa Carlson Rezidor Hotel Group icunga amahoteli 80 muri Afurika
Radisson Blu Hotel & Convention Centre Kigali icungwa na Carlson Rezidor Hotel Group icunga amahoteli arenga 480 ku isi


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved