IGIHE

Radisson Blu yabaye iya mbere mu Rwanda yahawe igihembo cya hoteli itekanye

0 6-08-2019 - saa 19:23, Evariste Nsengimana

Radisson Blu Hotel and Convention Centre, imwe muri hotel zikomeye mu Rwanda, yabaye iya mbere mu Rwanda n’iya gatatu muri Afurika yahawe igihembo cya hoteli ituje kandi ifite umutekano.

Ku wa 5 Kanama 2019 ni bwo byatangajwe ko Radisson Blu Hotel and Convention Centre yegukanye iki gihembo gitangwa n’Ikigo Mpuzamahanga gihemba hoteli zifite ituze n’umutekano cyitwa Safehotels Alliance AB.

Iki gihembo gihabwa hoteli zateye intambwe ishimishije mu gushyira mu bikorwa politiki n’ingamba zo kubungabunga ituze n’umutekano kandi zikubahiriza amabwiriza y’ubuziranenge.

Iki kigo gitanga iki gihembo cyemewe kandi gikorana n’Ishyirahamwe ry’ibigo bya ba mukerarugendo birimo Ihuriro Mpuzamahanga rishinzwe ibyo gutegura inama zikomeye (ICCA) n’Ibiro by’Umuryango w’Abibumbye bishinzwe gukumira Ibiza (UNISDR).

Umuyobozi wa Radisson Blu Hotel and Convention Centre, Denis J. Dernault, yavuze ko bishimiye kuba hoteli yakiriye icyo gihembo gikomeye.

Yakomeje agira ati “Ituze n’umutekano by’abakiliya bacu ni ikintu duha agaciro gakomeye kandi tuzirikana ko ingamba nk’izo zishyirwa mu bikorwa. Abakozi bacu bazakomeza gutozwa kubahiriza amabwiriza mu nama zidasanzwe, dukomeze kubigira iby’ibanze.”

Yasobanuye ko Radisson Blu Hotel and Convention Centre izi neza ko icy’ibanze abagenzi bishimira aho batemberera ari ituze n’umutekano bahasanga, bityo kuba yabiherewe igihembo bizatuma abayigana barushaho kuyigirira icyizere.

Radisson Blu Hotel yahawe igihembo cya hoteli itekanye kandi yiyubashye nyuma y’igenzura yakorewe ku ngingo zisaga 220 zishingirwaho kugira ngo hoteli runaka ishyirwe mu zitekanye.

Harebwa ibyiciro bitandatu bitandukanye birimo umutekano w’inyubako, imiterere ya hoteli n’uburyo ihugura abakozi, ibikoresho bikumira inkongi, ibikoresho byifashishwa mu gucunga umutekano n’uburyo ikemura ibibazo ihuye nabyo.

Radisson Blu Hotel and Convention Centre, yagiye ihabwa ibindi bihembo birimo icyo yegukanye mu cyiciro cya hoteli zifite igishushanyo cyiza n’izikomeje gutera imbere muri Afurika, icya Hotel ibereye gukorerwamo Inama (Best Conference); Ubukerarugendo (Best Mice Hotel) n’Ishoramari mu Rwanda n’ibindi.

Radisson Blu Hotel and Convention Centre iherereye ku Kimihurura mu Mujyi wa Kigali. Ifite ibyumba 291, birimo n’icyagenewe abo ku rwego rwo hejuru (Royal Suite) kiri ku buso bwa metero kare 700.

Igice cyayo gishushe nk’Inzu y’Umwami igaragara i Nyanza, cyakira abantu 2600.

Iyi nyubako yafunguye imiryango mu 2016, ifite ubushobozi bwo kwakira inama y’abantu 5000 icyarimwe n’umwanya uhagije ushobora kuberamo ibikorwa by’ubucuruzi, imyidagaduro n’ibindi birori.

Radisson Blu Hotel & Convention Centre yegukanye igihembo cya hoteli itekanye
Muri Radisson Blu Hotel hateye amabengeza ku buryo abanyamahanga n'Abanyarwanda bishimira kuhacumbika
Radisson Blu Hotel and Convention Centre ifite ibyumba 291, birimo n’icyagenewe abo ku rwego rwo hejuru
Iyi nyubako yafunguye imiryango mu 2016, ifite ubushobozi bwo kwakira inama y’abantu 5000
Kuva muri Nyakanga 2016 Radisson Blu Hotel & Convention Centre imaze kwakira inama n’ibindi bikorwa 853 byitabiriwe n’abantu 320 000
Radisson Blu Hotel and Convention Centre yabaye hotel ya mbere mu Rwanda n’iya gatatu muri Afurika yahawe igihembo kubera ko ituje kandi ifite umutekano

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza