Ikigo cy’Igihugu gishinzwe iterambere (RDB) cyatanze ibyemezo byo gukora, kinashyira mu byiciro ibigo by’ubukerarugendo, aho cyashyize Radisson Blu Hotel, Kigali Serena Hotel na Kigali Marriot Hotel ku rwego rwa mbere rw’inyenyeri eshanu.

Mu muhango wabaye ku mugoroba wo kuri uyu wa Gatatu, amahoteli 50 yashyizwe mu byiciro yahawe ’ibyemezo byo gukora, abatwara ba mukerarugendo umunani n’ababayobora icyenda bahabwa ibyemezo byo gukora (Licence).

Hoteli zashyizwe ku rwego rw’inyenyeri enye ni zirindwi ari zo; Lemigo Hotel, Hotel Milles Collines, Ubumwe Grande Hotel, Golden Tulip la Palisse Hotel, Gorilla Golf Hotel, Lake Kivu Serena Hotel na Sabyinyo Silverback Hotel.

Hoteli 19 zashyizwe ku rwego rw’inyenyeri eshatu, izigera kuri 18 zishyirwa ku rwego rw’inyenyeri ebyiri, imwe ishyirwa ku rwego rw’inyenyeri imwe naho izindi zihabwa icyemezo kizemerera gukora.

Bimwe mu bituma Hoteli ihabwa inyenyeri, ni ubwoko bwa serivisi itanga, abakozi ikoresha, inyubako n’uburyo abakiriya bishimira uburyo bakirwa.

Umuyobozi Mukuru w’ikigo cy’igihugu gishinzwe kwihutisha iterambere, Clare Akamanzi, yasobanuye ko ari ubwa mbere bashyize mu bikorwa ibiteganywa n’itegeko rigenga ubukerarugendo mu Rwanda; Yavuze ko uretse guhuza ibipimo ku rwego rwa EAC ari no kongera ubwiza bwa serivisi zihabwa abakerarugendo.

Yagize ati “Ni iby’ingenzi kuri twe nk’u Rwanda kuko turi ahantu abakerarugendo bifuza kujya muri Afurika, tugomba kubisigasira kandi tukanabyongera dutanga serivisi nziza.”

Yongeyeho ko gutanga inyenyeri bituma umukiriya ushaka kujya muri hoteli runaka amenya icyo asangayo ndetse n’abatanga amasoko bakamenya niba serivisi bashaka bazazibona.

Umuyobozi wa Serena Hotel mu Rwanda, Daniel Sambai, yavuze ko urwego bashyizweho babikesha serivisi nziza n’ishoramari bakora hagamijwe guhaza ibyifuzo bya buri mukiriya.

Yagize ati “Ni iby’ingenzi kuko biratwereka ko ishoramari dukora bigendanye n’ibipimo mpuzamahanga rizirikanwa. Icyo tubikesha ni ugukomeza gutanga serivisi nziza, ibintu byiza kandi ukazirikana ko umukiriya yishimye.”

Umuyobozi wa Dereva Hotel y’i Rwamagana, Ndaruhutse Didier , yakuwe ku nyenyeri imwe ikajya kuri ebyiri, yavuze ko ibanga bakoresheje nta rindi uretse kongera ubumenyi mu bijyanye n’amahoteli ndetse n’ubushobozi bw’abakozi.

Yagize ati “Habayeho guhugura abakozi bacu ndetse na ba nyiri hoteli bakora ingendoshuri bareba uko andi mahoteli y’ahandi akora.”

Gushyira mu byiciro no gutanga ibyemezo byo gukora mu bijyanye n’ubukerarugendo, byitezweho gutuma kugenzura uru rwego byoroha kuko ubusanzwe nta mabwiriza agena uburyo byagenzurwaga hagendewe ku byiciro yari ahari, rimwe na rimwe imikorere ikaba mibi aho wasangaga hoteli yahinduwe amacumbi mato ‘Lodge’.

Ikindi cyakunze kugaragara ni uko abafite inyubako zitanga serivisi z’ubukerarugendo bihaga amazina bashatse, bakishyira mu byiciro ndetse bakagena n’ibiciro bashatse akenshi bitandukanye na serivisi bafite.

RDB ivuga ko hazajya hakorwa ubugenzuzi mbere y’uko ikigo gitanga serivisi z’ubukerarugendo gishyirwa mu cyiciro, gihabwe uruhushya rw’imyaka ibiri ruvugururwa hakurikijwe ubundi bugenzuzi.

Ibi kandi bizatuma u Rwanda rugera kuri gahunda yatangijwe muri 2014 yo kwakira inama mpuzamahanga n’ibikorwa bitandukanye bizwe nka MICE (Meetings, Incentives, Conferences and Events).

Kugeza ubu mu Rwanda habarirwa amahoteli ageze kuri 200 afite ibyumba 4500. Ibi byumba byakira abashyitsi ku kigero cya 70%, muri bo 97% ni abanyamahanga.

Ibigo 75 byasabye ibyemezo birimo amahoteli 56, ibigo icyenda bitwara ba mukerarugendo n’icumi bibayobora. Ibyemerewe ni 67 birimo amahoteli 50, abayobora ba mukerarugendo icyenda n’ababatwara umunani.

Minisitiri w'urubyiruko, Mbabazi Rosemary n'Umuyobozi mukuru wa RDB, Clare Akamanzi
Minisitiri w'urubyiruko, Mbabazi Rosemary ashyikiriza icyemezo Umuyobozi wa Kigali Marriot Hotel y'inyenyeri eshanu
Minisitiri w'urubyiruko, Mbabazi Rosemary ashyikiriza icyemezo Umuyobozi wa Serena Hotel mu Rwanda, Daniel Sambai
Umuyobozi Mukuru wa RDB, Clare Akamanzi
Minisitiri w'Urubyiruko na Denis J. Dernault, Umuyobozi mukuru wa Radisson Blu Hotel
RDB yavuze ko gushyira mu byiciro ibigo by'ubukerarugendo bituma umukiriya amenya urwego rwa serivise asanga aha n'aha
Abayobora abakerarugendo bahawe ibyemezo byo gukora

Amafoto: Niyonzima Moïse


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved