IGIHE

Pariki y’Akagera yasuwe n’abakerarugendo barenga ibihumbi 40 yinjiza arenga miliyoni $2 mu 2018

0 16-04-2019 - saa 16:07, Habimana James

Ubuyobozi bwa Pariki y’Akagera iherereye mu Ntara y’Iburasirazuba, bwavuze ko umwaka wa 2018 wabaye mwiza kuko yasuwe na ba mukerarugendo 44,000 muri aba 50% ni abanyarwanda.

Mu itangazo iyi Parike yashyize ahagaragara, rigaragaza ko mu 2018 binjiye amadorali miliyoni ebyiri ni ukuvuga amafaranga y’u Rwanda arenga miliyari imwe na miliyoni 800 kandi ngo mu 2019 abahasura bazakomeza kwiyongera.

Ubuyobozi bw’iyi pariki bwavuze ko ibi bituma ishobora kwihaza mu byo ikora ku kigero cya 75%.

Ubuyobozi bwa Pariki y’Akagera bwatangaje ko ibyo bukora byose binajyanya no kugeza ibikorwa by’iterambere kubayituriye, ari na yo mpamvu hari byinshi birimo gukorwa.

Bwavuze ko “Hagiye gufungurwa agace kazakorerwamo ibikorwa bitandukanye bifasha abaturage nk’imirima y’imboga, ubworozi bw’inzuki n’inkoko, irerero ry’ibiti, iduka ry’ababoshyi n’ibindi kandi ibi bizatangira muri uyu mwaka, ibi byose bigamije gufasha abayituriye kongera umutungo wabo, umusaruro w’ibyo bahinga no kubona aho babigurisha.”

Mu rwego rwo gukomeza gutanga serivisi nziza z’itumanaho ku bagenda Pariki y’Akagera, ubuyobozi bwayo bwavuze ko Urwego ngenzuramikorere (RURA) rwubatse iminara ine y’itumanaho.

“Kugeza ubu kubona itumanaho muri iyi parike ntibyageraga kuri bose ariko ubu abahasura babona itumanaho kandi ibi bizatuma abahasura basangiza abandi ibyo bafite kandi bagume ku murongo.”

Iyi minara y’itumanaho yubatswe hafi ya hoteli Akagera Game Lodge, Rwisirabo, ku gasozi ka Mutumba na Muhororo.

Parike y’igihugu y’Akagera iherereye mu Ntara y’Iburasirazuba yashinzwe mu 1934. Uretse kuba ari ahantu hagizwe n’uduce tw’imirambi habereye abahasura, harimo n’inyamanswa zikundwa na ba mukerarugendo nk’Imparage, Udusumbashyamba, Inzovu, Intare, Ingona n’Imvubu biri mu Kiyaga cya Ihema n’andi moko y’inyoni.

Iyi pariki ifite ubuso bungana na kilometero kare 1,122, irimo inyamaswa zizwi nka ‘Big Five’ ari zo; Intare, Inkuru, Inzovu, Ingwe n’Imbogo.

Mu Ukuboza 2018, U Rwanda rwaje ku rutonde rwakozwe n’ikinyamakuru Forbes, rugaragaza ahantu heza buri wese akwiye gusura mu mwaka wa 2019, akaba yizeye kugira ibihe atazigera yibagirwa.

Ni urutonde rwakozwe nyuma yo kugenzura ibirebana n’ibishya biri aho hantu, umutekano, ibikwiye gusurwa bitarakendera, ibizagusigira urwibutso n’impinduka zikomeye mu buzima bwawe.

Mu gukora uru rutonde umunyamakuru wa Forbes, ufite ubunararibonye mu birebana n’inkuru zivuga ku bukerarugendo yanifashishije inararibonye zikora mu bigo bitegura ingendo, dore ko ari nabo baba bazi aho bahanze amaso bifuza ko ababagana berekeza.

Muri Pariki y'Akagera habarizwamo inzovu
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza