IGIHE

Marriott International irateganya kubaka izindi nyubako 40 zikomeye muri Afurika bitarenze 2023

0 23-09-2019 - saa 19:46, Evariste Nsengimana

Marriott International ibarizwamo Kigali Marriott Hotel, yatangaje ko igiye kwagura ibikorwa byayo ku mugabane wa Afurika birimo kubaka izindi nyubako 40 zizaba zifite ibyumba bisaga 8000 bitarenze mu mwaka wa 2023.

Iki kigo gitangaza ko cyamaze gushyira umukono ku masezerano azagifasha gushyira inyubako zacyo za mbere mu bihugu birimo Cap-Vert, Ethiopia, Kenya na Nigeria.

Uku kwagura ibikorwa kwa Marriott muri ibyo bihugu bine biteganyijwe ko bizarangira mu 2023, bigatwara ingengo y’imari irenga miliyari ebyiri z’amadolari ya Amerika bikazahanga akazi gashya ku barenga ibihumbi 12 muri Afurika.

Perezida akaba n’umuyobozi mukuru wa Marriott International muri Afurika yo hagati n’Iburasirazuba, Alex Kyriakidis, yagize ati “Afurika ni ubutaka bwuzuye amahirwe atarabyazwa umusaruro, isigaye ari ishingiro ry’ibikorwa byacu.”

Alex yavuze ko ibyo bishimangirwa n’izamuka ry’ubukungu bw’uwo mugabane n’uburyo ibihugu byawo bishyize imbere urwego rw’amahoteli n’ubukerarugendo.

Alex yavuze ko ikigo abereye umwe mu bayobozi kizakomeza gushyira imbaraga mu bikorwa n’intego cyihaye yo kuba imbere mu bitanga serivisi z’ubukerarugendo kandi biri ku rwego rw’iterambere ry’Akarere ka Afurika.

Uku kwagura ibikorwa byayo kandi bijyanye n’umubare w’abakenera serivisi bigezweho zitanga na Hoteli za Marriot muri Afurika ukomeje kugenda uzamuka umunsi ku wundi zirimo hoteli umunani zigiye gufungurwa mu gihe cya vuba n’amashami atandatu ya Hotel Protea, ibarizwa muri Marriott.

Iki kigo kigaragaza ko izo nyubako zizaba ziganjemo izagenewe gukorerwamo inama, amacumbi n’izindi serivisi zimenyerewe mu zitangwa na Marriott. Kigaragaza ko kizanakomeza kubyaza umusaruro amahirwe agaragara kuri uwo mugabane, kigakuba kabiri inyubako zacyo gifite zitangirwamo serivisi zikenerwa n’abifite.

Marriott International igaragaza ko mu bihugu ikoreramo aho ifite amasoko akomeye agira uruhare mu iterambere ryayo harimo Maroc, Afurika y’Epfo, Algeria na Misiri.

Umuyobozi ushinzwe iterambere rya Marriott International muri Afurika yo hagati n’Iburasizuba, Jerome Briet yavuze ko ‘Ubunararibonye Marriott imaze kugira ku isoko ryo muri Afurika, isura nziza imaze kubaka biyishyira mu mwanya mwiza wo gukomeza kubaka izina mu karere.”

Marriott International iteganya ko mu 2022 izatangirana n’inyubako ya mbere yayo muri Cap Vert ifite ibyumba by’abashyitsi 128, ibifatirwamo amafunguro bitatu, ibyumba by’inama, icyo gukoreramo siporo n’ibindi.

Inyubako izafungura muri Ethiopia mu 2022 izaba ifite ibyumba byo kuraramo bigera kuri 241, resitora, aho gukorera siporo n’ibindi.

Iki kigo giteganya ko muri Kenya kizahashyira Marriott Kisumu izaba ihereye mu nkengero z’ikiyaga cya Tanganyika, ikazafungurwa 2022 ifite ibyumba 125 byo kuraramo, resitora eshatu, ibyumba by’inama biri ku buso bwa kilometer kare 500.

Muri Nigeria iki kigo kirateganya kuhashyira, Residence Inn by Marriott izaba ifite ibyuma birenga 130 n’ibindi bikorerwamo imirimo ya hoteli, ikazafungurwa mu 2023.

Kugeza uyu munsi Marriott International ifite inyubako zirenga 140 z’amoko agera kuri 14, zifite ibyumba birenga ibihumbi 24 zikaba ziherereye mu bihugu 20 byo ku mugabane wa Afurika.

Marriott International irateganya kubaka izindi nyubako 40 zikomeye muri Afurika bitarenze 2023


[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza