Perezida Kagame yagaragaje ko iteramberer y’ubukerarugendo mu Rwanda ritashoboraga kugerwaho iyo abanyarwanda badahindura imyumvire ngo bumve ko bakwiye kwigira aho gukomeza gutega amaboko abaterankunga.

Yabitangaje kuri uyu wa Mbere nyuma yo guhabwa igihembo cyo guteza imbere ubukerarugendo kizwi nka ‘World Tourism Award 2017’ yaherewe i Londres mu Bwongereza, mu muhango wo gufungura inama mpuzamahanga ku bukerarugendo (World Travel Market London).

Perezida Kagame yavuze ko guhabwa iki gihembo bisobanuye byinshi ku mbaraga z’abanyarwanda mu guteza imbere ubukerarugendo burambye mu myaka 20 ishize.

Yagize ati “ Twakoze ibishoboka mu kurengera ibidukikije, twubaka ibikorwaremezo ku bashyitsi bacu n’abaturage kugira ngo babashe kwishimira ibyiza byihariye bihaboneka. Iterambere ry’uru rwego ryerekanye ko rishobora kuba ishingiro by’uburumbuke busangiwe, by’umwihariko kubera ko duharanira ko abanyarwanda bungukira mu musaruro w’ubukerarugendo.”

Perezida Kagame yavuze ko iterambere ry’ubukerarugendo ritari kugerwaho, iyo hataba ko buri munyarwanda yumva akamaro ko kwigira aho gutega amaboko.

Ati “Ibyo byashobotse kubera ko abanyarwanda bahinduye imyumvire bakava ku gutega amaboko bakagira imyumvire yo kwihesha agaciro no kwigira. Niyo mpamvu nk’urugero, abahoze bashimuta inyamaswa baje guhinduka ab’ingenzi mu kurengera urusobe rw’ibinyabuzima.”

Kagame yakomeje agaragaza uburyo u Rwanda rwatangiye indi nzira yo guhuza abanyarwanda n’ibindi bice by’isi hifashishijwe sosiyete y’indege ya Rwandair.Yavuze ko ari nabyo iki gihembo gisobanuye cyane ku banyarwanda.

Ati “Turi kugerageza kongera uburyo bwo guhuza abanyarwanda n’ibindi bice by’Isi, ari nacyo iki gihembo gisobanuye kuri twe. Ni ibintu byagarutsweho cyane ku mugabane wacu, aho Abanyafurika twiyemeza kwigenera ahazaza hacu.”

Yongeyeho ko ubu nta rwitwazo ruhari nkuko byahoze kugira ngo u Rwanda rwinjire ku isoko ry’ubukerarugendo bwo gutwara abantu mu ndege.

Ati “Nkuko mubibona, nta rwitwazo ruhari.U Rwanda rwabaye hanze y’isoko ry’ubukerarugendo bwo gutwara abantu imyaka myinshi kandi ingaruka zabyo twarazibonye.”

Imibare y’ikigo cy’igihugu gishinzwe ibarurishamibare, yagaragaje ko urwego rwa serivisi ari narwo rubarizwamo ibijyanye n’ubukerarugendo rwinjije 48 % by’umusaruro mbumbe w’igihugu mu mwaka wa 2016.

Muri uwo mwaka, serivisi zishingiye kuri hoteli na resitora zazamutse ku rugero rwa 11% bitewe na gahunda yo kwakira inama n’ibikorwa bitandukanye, n’imirimo y’ubwikorezi izamuka ku rugero rwa rwa 8% ahanini bitewe n’ubwikorezi bwo mu kirere bwazamutse ku rugero rwa 15%.

Perezida Kagame amaze gushyikirizwa igihembo yagenewe mu nama mpuzamahanga ku bukerarugendo i Londres mu Bwongereza
Perezida Kagame yakira igihembo yahawe kubera guteza imbere urwego rw'ubukerarugendo
Perezida Kagame yavuze ko igihembo yahawe kivuze byinshi kandi ari uburyo bwo kuzirikana imbaraga u Rwanda rushyira mu kubungabunga ibidukikije
Kagame yavuze ko iyo hataba uguhindura imyumvire kw'abaturage ubukerarugendo butari gutera imbere
Bamwe mu bitabiriye inama mpuzamahanga ku bukerarugendo bafata selfie hamwe na Perezida Kagame
Umuyobozi Mukuru w'Ikigo cy'Igihugu cy'Iterambere, Clare Akamanzi(Iburyo), mu bitabiriye inama mpuzamahanga ku bukerarugendo i Londres
Perezida Kagame yasuye igice u Rwanda rwamurikiragamo ibijyanye n'ubukerarugendo muri iyi nama mpuzamahanga
U Rwanda rwari rufite aho rumurikira ibijyanye n'ubukerarugendo


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved