IGIHE

Ibyo wamenya kuri Siporo ya Kayaking, imwe mu zikunzwe na ba mukerarugendo basura i Kivu

2 4-09-2019 - saa 07:56, Philbert Girinema

Siporo ya Kayaking, ni imwe muri nyinshi zishobora gukorerwa mu mazi, ariko imaze igihe gito igeze mu Rwanda nyuma y’igitekerezo cy’Umwongereza wasuye ibice by’i Kivu akabona ko byaba byiza kuhatangiza uyu mukino.

Ubusanzwe mu mazi bimenyerewe ko hakorerwa siporo yo koga, hakaba kandi ahantu abantu bashobora gutembera bareba ibyiza by’ikiyaga cyangwa inyanja bakoresheje ubwato.

Abaturiye ahari amazi, usanga bazi neza umukino wo koga, ariko bikagarukira aho. Mu 2015 nibwo mu kiyaga cya Kivu hatangijwe umukino wa Kayaking ukinwa n’abagamije kwishimisha ariko na none ukaba ufasha umuntu mu kurambura ingingo zinyuranye.

Iyi siporo ikorwa hifashishijwe ubwato buto bwabugenewe, umuntu akicaramo arambije amaguru, afite ingashya ifite aho ukoresha ugashya iburyo n’ibumoso ku buryo udahindura mu kandi kaboko.

Ntabwo ari umukino bisaba ko umuntu aba asanzwe azi koga cyangwa se amenyereye uko ukinwa, ahubwo buri gihe iyo ugiye mu mazi, uba ufite umuntu uri kukwerekera ku buryo uguyemo cyangwa ukagira ikindi kibazo ashobora kugukurura.

Uwikunda Gratien ni umwe mu bafasha ba mukerarugendo muri iyi siporo. Ni umurimo yatangiye mu 2015 ubwo iyi siporo yageraga mu Rwanda.

Yabwiye IGIHE ko “uwaje abizanye yaje aturutse mu Bwongereza, ageze inaha asanga byaba ari byiza ko byakongerwa mu bishimisha ba mukerarugendo mu gihugu kugira ngo umuntu agire n’ibindi bikorwa yakwishimira.”

Umubare munini w’abitabira uyu mukino ni abanyamahanga cyane abaturutse mu Burayi na Amerika kuko muri ibyo bihugu wateye imbere aho usanga hari n’abantu ku giti cyabo batunze ubu bwato.

Abantu ba mbere bahuguriwe uyu mukino muri Gicurasi 2015, nyuma y’amezi ane iyi siporo itangira gucuruzwa ku basuye inkengero za Kivu n’ahandi hari amazi.

Ku isaha umunyamahanga yishyura amadolari ya Amerika 25 mu gihe umunyarwanda we agabanyirizwa igiciro ho 40%.

Umuntu wese uri gukina iyi siporo, asabwa kwambara umwenda utuma atarohama mu gihe ari mu mazi.

Ni siporo ituma umuntu ananura ingingo zitandukanye z’igice cyo hejuru nk’amaboko, ndetse ifasha umuntu kuba atagira umubyibuho ukabije ku gice cy’inda.

Ubwato bukoreshwa buba bwarabigenewe ndetse buratandukanye cyane ku biciro, kuko hari nk’ubugura amadolari 1500 utabariyemo imisoro n’ubundi bushobora kugeza kuri miliyoni esheshatu z’amafaranga y’u Rwanda.

Uburengerazuba bw'u Rwanda ni kimwe mu bice bikurura ba mukerarugendo kubera imiterere yacyo
Itsinda ry'abanyamakuru mpuzamahanga riri mu rugendo rugamije kumenya ibice nyaburanga by'u Rwanda ubwo ryari rigeze aho ryitegeye neza Ikiyaga cya Kivu muri Karongi
Mbere yo gukina uyu mukino, babanje guhabwa imyenda ibarinda kurohama mu gihe baguye mu mazi
Abafata amafoto bakunda kujya mu kiyaga mu gihe izuba riri kurenga kugira ngo babone ameza ahambaye
Uyu mukino ni umwe mu ikundwa na ba mukerarugendo basura u Rwanda
Umuntu aba yicaye mu bwato buto, hanyuma akagenda agashya impande zombi
Ni siporo ititabirwa cyane n'abanyarwanda ugereranyije na bagenzi babo b'abanyamahanga basura u Rwanda
Ni bumwe mu bwoko bw'imikino yo kwishimisha ishobora gukorerwa mu mazi
Iyo uri mu mazi, uba uherekejwe n'umuntu ukwerekera uko ubigenza
Usibye Kayaking, abakunda koga nabo baba bashyizwe igorora
Kayaking ifasha umuntu kunanura amaboko n'intugu
Ku nkombe z'amazi, haba hari abakira abavuye mu mazi, bakabakurura n'ukuboko
Ku nkombe z'amazi, haba hari abakira abavuye mu mazi, bakabakurura n'ukuboko

Amafoto: Niyonzima Moise

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Kasemiro Jr 2019-09-05 01:43:14

Yegooo rwose Rwanda komez uter’ imbere. Hari byinshi twakoresha icyo kiyaga cya kivu bigakurura ba mukerarugendo. Kayaking yari ikenewe cyaneee ppe. Buriya bongereyehoo na parasailing nayo byaba byiza cyane.

2
Kasemiro Jr 2019-09-05 01:42:19

Yegooo rwose Rwanda komez uter’ imbere. Hari byinshi twakoresha icyo kiyaga cya kivu bigakurura ba mukerarugendo. Kayaking yari ikenewe cyaneee ppe. Buriya bongereyehoo na parasailing nayo byaba byiza cyane.

Kwamamaza