Amatsiko ni menshi kuri Sally Grierson, Umunyafurika y’Epfo ugiye guterera Kalisimbi, umusozi wa mbere muremure mu Rwanda, bikaba ishema kuri Subusiso Vilane, icyamamare mu kurira imisozi akaba n’Umunyafurika wa mbere wageze ku gasongero k’umuremure ku isi, Everest.

Sally na Vilane n’itsinda Seven Summits Africa rigizwe n’abantu icyenda, batangiye urugendo rwo kuzamuka umusozi wa Kalisimbi kuri uyu wa Kane, bikaba byitezwe ko bazagera ku masimbi ari ku gasongero ku gicamunsi cyo kuri uyu wa Gatanu.

Iri tsinda riri mu Rwanda nyuma yo kuva mu bindi bihugu bigize Afurika y’Iburasirazuba nka Kenya, Uganda na Tanzania, aho banyuze bazamuka imisozi yaho miremire.

Sibusiso Vilane amaze kuzamuka umusozi muremure ku isi wa Everest inshuro eshatu kandi yabashije kugera ku dusongero tw’indi misozi irindwi miremire ku isi.

Uyu mugabo w’abana batatu ufite ibigwi muri Afurika, avuga ko ibyo kurira imisozi yabigize umwuga kugira ngo yerekane ko n’Abanyafurika bashoboye, akaba ari nacyo cyamuzanye mu Rwanda.

Aganira na IGIHE mbere yo guterera Kalisimbi, umusozi ufite uburebure bwa metero 4507, Sibusiso yagize ati “Everest ni umusozi ugoye kuwurira ariko nawuzamutse inshuro zirenze imwe kugira ngo nerekane ko Abanyafurika bashobora kurira umusozi muremure; ni nayo mpamvu naje hano kugira ngo nereke abantu ko natwe dushoboye kuzamuka imisozi. Icyakora ntabwo byoroshye niyo mpamvu mubona turi bake muri Afurika babashije kurira imisozi itandukanye ku Isi.”

Agiye guterera Kalisimbi, atitira gahoro kubera imbeho yo mu birunga, Sally Grierson yatangaje ko afite amatsiko yo kugera ku gasongero ka akirebera amasimbi yitiriwe uwo musozi.

Yagize ati “Ni ubwa mbere nsuye u Rwanda kandi narahishimiye. Iki gihugu ni cyiza cyane. Kalisimbi ifite metero zisaga 4500 ndetse n’amasimbi ku gasongero, nzishimira kugera kuri ayo masimbi kuko sinabikekaga kandi nzishimira kumva imvura yo muri aya mashyamba yo ku misozi.Nkunda kuzamuka imisozi kandi nkunda kureba ibyaremwe, uko ubikora niko wumva ubwiza bw’uyu mubumbe dutuyeho.”

Sally yavuze ko nubwo atari umuhanga cyane mu kurira imisozi nka bagenzi be, Abanyafurika bakwiye kureba ibyiza bitatse umugabane wabo kandi bakabyishimira, bagamije gushyikira ko bibungabungwa.

Umunyamerikakazi Jessica Flint yavuze ko aje kwiyibutsa ibihe byiza yagize ubwo yageraga ku gasongero ka Kilimanjaro muri Mutarama 2017.

Uyu mukobwa yavuze ko nubwo umuntu aca mu nzira igoye, iyo ugeze ku gasongero k’umusozi muremure yumva aruhutse.

Yagize ati “Abantu bagomba kugira intego, bakumva ko nabo bagera ku gasongero k’umusozi, bakanabasha kureba neza ibyo bibaya biri hasi babyitegeye. Uzi iyo uri kuzamuka umusozi, mu biti birebire cyane ugenda ubinyuramo ! Rwose iyo ari ubwa mbere birashimisha.”

Jessica avuga ko uretse kwishimira ko wageze ku gasongero k’umusozi, ngo ni n’umuti w’umunaniro, waba uw’umubiri no mu mutwe.

Iri tsinda rya Seven Summits rizasoza uruzinduko rwaryo mu Rwanda kuri uyu wa Gatandatu, rinasura ingagi zo mu birunga.

Umuyobozi wa Pariki y’Igihugu y’Ibirunga, Uwingeri Prosper , yabwiye IGIHE ko ibi byamamare bizabafasha kumenyekanisha umusozi wa Kalisimbi, abantu bakajya baza kuwishimishirizaho bawuzamuka.

Yagize ati “Ni byiza ko tubona abashyitsi bajya kwishimira ibi byiza kuko nicyo bibereyeho. Iki gikorwa cyo kuzamuka ibirunga ni icy’agaciro cyane kuko ni itsinda ryazobereye mu kurira imisozi, babikora bakabyamamaza bagakurikirwa n’abantu benshi […] Barashaka kuganira natwe bifashishije ubunararibonye bwabo ku buryo byakorwa kinyamwuga, bareba urugendo, bareba ibijyanye no gucumbika mu gihe cy’urugendo, batugira inama ku bijyanye n’umutekano n’ibindi.”

Mu gihe bikunze kuvugwa ko Abanyarwanda batitabira gusura ibyiza nyaburanga bigize igihugu cyabo, Uwingeri avuga ko mu bantu bagera kuri 500 bakira buri mwaka bashaka kuzamuka Kalisimbi, abenshi aba ari Abanyarwanda.

Ikindi kirunga abantu bishimira kuzamuka ni Bisoke kuko ari kigufi ugereranyije na Kalisimbi kandi gifite ikiyaga ku gasongero.

Kuzamuka umusozi wa Kalisimbi umunyamahanga yishyura amadolari 400 (asaga 300,000 Frw), baza ari itsinda umwe akishyuzwa amadolari 300 naho Umunyarwanda akishyura 7000 Frw.

Umwe mu bagiye guterera Kalisimbi ari kumwe n'ubayobora
Sibusiso Vilane (Iburyo) umaze kuzamuka umusozi muremure ku isi wa Everest inshuro eshatu, yatangiye no kuzamuka Kalisimbi
Sally Grierson ufute amatsiko y'amasimbi yo mu Rwanda
Umukozi wa RDB, Kassim aganira n'icyamamare Sibusiso
muyobozi wa Pariki y’Igihugu y’Ibirunga, Uwingeri Prosper, aganira n'abagiye guterera Kalisimbi
Umuyobozi wa Pariki y’Igihugu y’Ibirunga, Uwingeri Prosper
Kalisimbi, umusozi muremure mu Rwanda

Amafoto: Moses Niyonzima


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved