IGIHE

Dutemberane muri Jordanie, igihugu gifitanye umubano wihariye n’u Rwanda (Amafoto)

0 6-01-2024 - saa 19:14, Philbert Girinema

Umubano wa Jordanie n’u Rwanda ukomeje kugana aheza biturutse ku bushake bw’abakuru b’ibihugu byombi biyemeje kuwushimangira mu nyungu z’abaturage babyo. Ni ibintu bikorwa mu masezerano anyuranye asinywa n’ingendo zirimo n’urwo Umwami wa Jordanie ateganya gukorera mu Rwanda.

Jordanie ni kimwe mu bihugu byo muri Aziya y’Uburengerazuba, kiri mu nkengero z’imigabane itatu irimo Aziya, Afurika n’u Burayi. Gihana imbibi na Arabie Saoudite mu Majyepfo n’Uburasirazuba, Iraq mu Majyaruguru ashyira Uburasirazuba, Syria mu Majyaruguru n’agace ka West Bank katumvikanwaho na Israel na Palestine mu Burengerazuba.

Muri Jordanie niho hari inyanja y’umunyu ireshya na kilometero 26 ndetse itandukanya iki gihugu na Misiri.

Umurwa mukuru w’iki gihugu ni Amman, ni wo mujyi munini kuko ubarizwamo ibikorwa hafi ya byose by’ubukungu, ibijyanye na politiki, umuco n’ibindi.

Mu 2022, Jordanie yari ituwe n’abaturage barenga miliyoni 11,4 bari ku buso bukubye gatatu u Rwanda kuko iki gihugu gifite ubuso bungana na kilometero kare 89.342.

Umusaruro mbumbe w’igihugu ubarirwa muri miliyari 50.022$ mu gihe umuturage abarirwa ko yinjiza nibura 4.850$ ku mwaka. Umubare munini w’abaturage mu gihugu ni Abayisilamu b’Aba-Sunni mu gihe 3% ari Abakirisitu, abandi basigaye barimo 1% b’aba Baháʼí mu gihe 1% bafite imyizerere itandukanye.

Abdullah II ni we Mwami wa Jordanie kuva tariki 7 Kamena 1999 ariko yimye ingoma tariki 2 Gashyantare 1999 asimbuye Umwami Hussein.

Nyuma y’umwami, undi muntu uba ufite inshingano zikomeye ni Minisitiri w’Intebe. Ubu izo nshingano zifitwe na Bisher Khasawneh uzifatanya no kuba Minisitiri w’Ingabo kuva ku wa 12 Ukwakira 2020.

Umuryango wa cyami wo muri Jordanie, uzwi nka Hashemites, wategetse iki gihugu kuva mu 1921. Mbere nka ba emirs ubwo hitwaga Emirate of Transjordan ubwo iki gihugu cyakolonizwaga n’u Bwongereza na nyuma nk’abami bamaze kubona ubwigenge mu 1946.

Amateka avuga ko aba-Hashemites bakomoka mu nzu ya Hashem yategetse Umurwa wa Mecca kuva mu kinyejana cya 10, kandi Umwami Abdullah II akomoka ku ntumwa y’Imana Muhammad.

Amafaranga akoreshwa muri iki gihugu yitwa ama-dinar. Iyo ufite 1000 cyayo uba ufite asaga miliyoni 1,7 Frw. ubukungu bw’iki gihugu bushingiye ku ifumbire mvaruganda nyinshi n’ubukerarugendo.

Ururimi rw’igihugu ni Icyarabu nubwo abaturage benshi bavuga Icyongereza.

Aha hantu hateranira abantu barenga ibihumbi bitandatu, hubatswe mu kinyejana cya kabiri

Ni igihugu gifite ibice byinshi by’amateka

Jordanie ifite ibice bisaga ibihumbi 100 by’amateka ashingiye ku bisigaratongo, iyobokamana n’ibyiza nyaburanga bisurwa na ba mukerarugendo benshi. Ni kimwe mu bihugu bya mbere umuntu uri mu biruhuko yatembereramo, akamenya byinshi ku murage abahabaye kera basize.

Muri aha hantu nyaburanga harimo umusozi wa Nebo ufite uburebure bwa metero zigera kuri 700. Uwawugeze ku gasongero, aba abona neza ubutaka butagatifu [Holy Land], Ikibaya cya Jordanie, Inyanja y’Urupfu ibitse igipimo kinini cy’umunyu, Umurwa wa Betelehemu na Yeruzalemu.

Muri Jordanie hari ikidendezi gikuze kurusha ibindi cyitwa Jawa, cyubatswe mu mwaka wa 3000 mbere y’ivuka rya Yezu. Giherereye mu Butayu bw’Umukara buherereye mu burasirazuba bw’iki gihugu.

Ibibumbano bimaze imyaka myinshi kurusha ibindi bibarizwa mu murwa wa Amman. Ibi byitwa Ain Ghazal, amateka agaragaza ko byabumbwe mu mwaka wa 7500 mbere y’ivuka rya Yezu. Ubu bibitse mu ngoro y’amateka y’igihugu.

Mu gihugu hari umurwa witwa Petra wigeze kwibagirana nyamara uteye amabengeza. Ni hamwe mu hantu harindwi ku Isi hashitura ba mukerarugendo havumbuwe mu kinyejana cya 19. Amashusho ya filimi zakunzwe cyane zirimo Indiana Jones na Last Crusade ni ho yafatiwe.

Muri rusange, umuntu ubyifuza ashobora kuzenguruka Jordanie mu minsi 40, akoresheje amaguru. Hari ahantu hanogeye ijisho harimo Wadi Rum na Gadara; ahari inyubako zasenyutse zubatswe n’Abagiriki n’Abaromani mu myaka ya kera.

Birumvikana ko utamara ahantu igihe kirenze umunsi umwe, ngo ntukenere amafunguro yaho. Muri Jordanie hari ifunguro ryihariye rwitwa Mansaf. Abatetsi baho baritegura bifashishije inyama y’intama, ‘yogurt’ itaze izwi nka ‘Jameed’, umuceri n’impeke zitwa ‘Pine Nuts’.

Jordanie ifitanye umubano wihariye n’u Rwanda

U Rwanda na Jordanie ni ibihugu bifitanye umubano wihariye n’ubushuti hagati y’abayobozi b’impande zombi.

Magingo aya, Umunyarwanda wifuza gukorera urugendo muri Jordanie ntagisabwa Visa kuva muri Kanama ubwo Minisitiri Biruta yakoreraga urugendo muri iki gihugu hagasinywa amasezerano abyemeza.

Mbere Umunyarwanda ugiye muri Jordanie yasabaga Visa akoresheje internet cyangwa akayisaba ageze ku mupaka umwinjiza mu gihugu. Byamusabaga kwishyura ibihumbi 10 Frw cyangwa se ibihumbi 20 Frw iyo ari gushaka Visa y’umuryango. Iyo Visa yabaga ayishaka byihutirwa, yishyuraga agera ku bihumbi 180 Frw.

Muri Gashyantare 2023, Minisitiri w’Intebe wungirije wa Jordanie yagiriye uruzinduko mu Rwanda, ibihugu byombi bisinyana amasezerano ajyanye n’ubufatanye mu burezi n’ubushakashatsi agamije gufasha inzego z’uburezi.

Hasinywe kandi n’akuraho Visa ku Badipolomate n’abandi bafite pasiporo zihariye.

Icyo gihe kandi Intumwa y’Umwami wa Jordanie yashyikirije Perezida Kagame ibaruwa ikubiyemo ubutumwa yari yamugeneye bugamije gushimangira umubano usanzwe hagati y’ibihugu byombi.

Perezida Kagame na Madamu Jeannette Kagame ubwo bitabiraga ubukwe bw'Igikomangoma Hussein muri Kamena 2023

Mu gihe u Rwanda rwibasirwaga n’ibiza, Minisitiri w’Intebe wungirije wa Jordanie usanzwe ari na Minisitiri w’Ububanyi n’Amahanga, Ayman Safadi, yahamagaye mugenzi we w’u Rwanda, Dr Vincent Biruta, amuha ubutumwa bw’Umwami bufata u Rwanda mu mugongo.

Perezida Kagame akunda kugenderera Jordanie. Inshuro iheruka ni muri Kamena ubwo we na Madamu Jeannette Kagame bitabiraga ubukwe bw’Igikomangoma cya Jordanie.

Igikomangoma Hussein w’imyaka 28, ni we muragwa w’Ingoma. Ni umuhungu mukuru w’Umwami Abdullah II n’Umwamikazi Rania. Icyo gihe yarongoye Rajwa Khaled bin Musaed w’imyaka 29, umukobwa wo muri Arabie Saoudite.

Mu 2022 na bwo yari yitabiriye inama yitwa “Aqaba Process Meeting” yatangijwe n’Umwami wa Jordanie aho yiga ku bibazo bitandukanye byiganjemo iby’umutekano.

Mu Ukwakira 2023, u Rwanda rwohereje muri Jordanie inkunga yo gufasha abaturage bo mu Ntara ya Gaza bagizweho ingaruka n’intambara ihuje umutwe wa Hamas wo muri Palestine n’Ingabo za Israel.

Amman, ni Umurwa Mukuru wa Jordanie ufite ibice byinshi bigaragaza amateka yo hambere mbere y'ivuka rya Yezu
Izuba ryo ku nkengero z'inyanja muri Jordanie ni kimwe mu byo ubyukiraho mu gitondo
Mu cyanya gikomye cyitwa Ajloun Forest Reserve, ni hamwe mu hantu ba mukerarugendo bashobora kuruhukira
Agace kitwa Sekrab, ni kamwe mu dukurura ba mukerarugendoo. Hari utubari dukundwa cyane
Mu gace kitwa Wild Jordan Center mu Murwa Mukuru wa Jordanie hari restaurant nyinshi ziba ahantu hirengeye zicuruza ibintu birimo imitobe
Amafunguro menshi gakondo yo muri Jordanie aba aherekejwe n'ibiribwa bikozwe mu ifarini
Mu Mujyi rwagati ahantu hitwa Hashem ni hamwe mu ho abashaka amafunguro ya mu gitondo bajya
Umusigiti witiriwe Umwami Abdullah ni umwe mu myiza iri muri iki gihugu
Petra, ni hamwe mu hantu umuntu agera akabasha kwiga amateka ya kera mbere y'ivuka rya Yezu
Ijoro ryo muri Jordanie ni uku riba rimeze
Umurwa Mukuru wa Jordanie ni wo ubumbatiye ibikorwa byinshi by'igihugu
Amman ni umujyi umaze imyaka myinshi
Imisigiti yo muri Jordanie iba itatse ku buryo bwiza
Roman Theatre, ni ahantu habera ibirori hafite amateka akomeye muri Jordanie
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza