IGIHE

Amarangi atatse inzu yegereye rond point nini i Kigali yasembuye ibitekerezo by’abakoresha Twitter

26 14-04-2019 - saa 16:35, Ishimwe Israel

Umujyi wa Kigali urakataje mu iterambere! Iyo utereye ijisho mu mfuruka zose n’uduce tuyikikije usanga hari impinduka mu bijyanye n’imyubakire aho imiturirwa izamurwa ubutitsa.

Mu myaka yo hambere, uwageraga i Kigali yatungirwaga agatoki inyubako ya Rubangura, iri mu Karere ka Nyarugenge, mu Mujyi wa Kigali rwagati nk’imwe mu zisirimutse.

Uko imyaka yicumye, mu mpande zayo hazamuwe indi miturirwa nka Kigali City Tower n’izindi kugeza kuri Kigali Convention Centre iri mu bitatse ubwiza bwa Kigali.

Umwaka wa 2019 ntiwacogoje umuvuduko wa Kigali kuko inyubako zikomeje kuzamurwa. Kuri ubu hafi imbere y’isangano rinini (rond point) ryo mu Mujyi wa Kigali, imbere y’ahazwi nko kwa Chez Venant impande y’ahari Fantastic Restaurant hari kuzamurwa inyubako nshya.

Iyi nyubako uyirebeye inyuma itatse amabara arimo ay’umuhondo n’umutuku.

Imiterere yayo ni yo yasembuye abakoresha imbuga nkoranyambaga by’umwihariko Twitter batanze ibitekerezo bitandukanye ku marangi ayirimbishije.

Ni ibitekerezo byasembuwe n’ikibazo cy’Umuyobozi Ushinzwe Itangazamakuru mu Rwego rw’Igihugu rw’Imiyoborere (RGB), Gerald Mbanda, wanditse ku rukuta rwe rwa Twitter, ati “Amarangi ari kuri iyi nzu iri ku isangano ry’Umujyi wa Kigali hari abavuga ko akurura uyareba cyane ku buryo bishobora kurangaza abatwaye ibinyabiziga bikaba byateza impanuka. Wowe urabibona ute?’’

Abasubije kuri iyo nyandiko yo ku wa 12 Mata 2019, bagaragaje ibitekerezo bitandukanye bamwe bahamya ko amarangi nta mpungenge ateye ku mutekano w’ibinyabiziga biyinyura imbere.

Rukundo Willy yavuze ko “Aribyo mu mijyi myinshi tuzi yateye imbere ifite inyubako z’agatangaza kurusha n’iyo bavuga amarangi gusa, impanuka zaba zarabamaze.’’

Rudatsimburwa Albert we yavuze ko amarangi yashyizwe kuri iyo nyubako agenewe abarebera Kigali mu kirere.

Ati “Ariya marangi ni ubutumwa bugenewe abatureba kuva mu kirere bazunguruka Isi, abagenda mu muhanda bajye bacungana n’uwo muhanda n’ibigenda, aho kwirebera ibihagaze bitanagenda.’’

Umunyamakuru Muramira François Regis ukora ikiganiro cy’imikino kuri City Radio yavuze ko ibyatangajwe ngo bigamije guhombya nyir’inyubako.

Yanditse ati “Njye mbona iriya nyandiko yanyujijwe kuri Twitter icyo igamije ari uguhombya umushoramari. Bica ku ruhande ahubwo tubitege amaso. Icyiza ni uko dufite perezida ukunda abaturage kandi adahwema kubarenganura. Nishimiye ko ndi Umunyarwanda.’’

Abatanze ibitekerezo bagaragaje ko amarangi ari ku nyubako atafatwa nk’intandaro y’impanuka kuko Kigali Convention Centre na Kigali Heights na screens zaka amatara yose ku mihanda nta kibazo zirateza.

Popote Janvier yavuze ko “Uwakora impanuka yaba abitewe n’uburangare bwe kuko ariya mabara ntakurura uyareba kurusha aya KCC kandi sindumva uwo yagushije.’’

Ubuyobozi bw’Umujyi wa Kigali bwatangaje ko bugiye gukurikirana izi mpungenge zagaragajwe harebwa ishingiro ryazo.

Umuyobozi w’Umujyi wa Kigali, Rwakazina Marie Chantal, yatangaje abinyujije kuri Twitter ko “‏Mwakoze cyane ku bitekerezo byanyu byiza! Bigaragaza ko umujyi wanyu muwitayeho. Turasuzuma imbogamizi zose mwavuze hanyuma tugire nyiri inyubako inama.’’

Amarangi atatse inzu yegereye rond point nini yo mu Mujyi wa Kigali rwagati yasembuye ibyiyumviro by’abakoresha Twitter
Bamwe bavugaga ko umuntu utwaye imodoka, amabara y'amarangi amukubita mu maso ku buryo byateza impanuka
Uyu muturirwa wubatse ku muhanda uva ku isangano rinini mu Mujyi wa Kigali rwagati werekeza Nyabugogo

Amafoto: Ntare Julius

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2 | 3  

1
John 2019-05-10 14:01:52

Icyo majije kubona,uretse umuntu umwe gusa abandi basigaye mwese muri abaswa barangwa na mashyari uwo umuntu umwe gusa nabonye igitekerezo cyubaka! Nawe simuvuze atirata cyane

2
Ann 2019-04-15 09:05:27

Jye sindi inzobere cyane ariko mfite ubumenyi buhagije mu myubakire. Ndebye iyi nkuru ariko isa niyakomotse ku gitekerezo cya Gerald Mbanda mu butumwa yanyujije ku rukuta rwe. Munyemerere mbasangize uko mbibona.
1.Amarangi ntiyakabaye ikibazo, ku buryo n’ubuyobozi bugira icyo bubinengaho kuko haba harabanje gutanga ibyangombwa biba birimo n’igishushanyo-mbonera kerekana uko izaba isa nyuma yo kuzura. N’amarangi rero (isura yayo) aba arimo. Nta mwubatsi ushobora kubirengaho. Ahubwo bubatse idasa nuko igishushanyo cyayigaragazaga mu byangombwa byahanirwa. Kimwe n’igihe wakubaka inzuinyuranye mu miterere n’ibiri mu byangombwa.
2. Abatanze ibitekerezo cyane cyane kuri Twitter harimo benshi birengagiza, batazi wenda, batakoze cg batize ibijyanye n’ubwubatsi. Guhindura amabara bisobanura gusenya ibirahure by’aho ayo mabara anyura. Hafi finissage yose. Ni ibintu bihenda bishobora gutwara hagati ya 150 na 400 millions bitewe n’ingano y’inyubako. Byaba ari uguhombya ba Nyirayo mu gihe niyo haba harabaye ikosa mu kutita ku mabara mu gutanga ibyangombwa, byaryozwa urwego rwabitanze, nubwo kugeza aha haba beneyo cg abatanga ibyangombwa nta kosa nyakuri (usibye amarangamutima y’abantu) ntawe ugaragazwaho amakosa.
3. Kuyivugaho cyane byayongereye agaciro ku bwikube kandi itabyishyuriye iyamamaza. Ndibuka mu minsi ishize ubwo nari kumwe na mugenzi wange mu modoka tuhanyuze, arambwira ati ’ya nyubako yuzuye noneho’. Iby’amarange ntitwigeze tubyitaho ahubwo twatangajwe nuko yari imaze igihe kirekire yubakwa. Izi nkuru rero ziyivuzweho ziyihaye kumenyekana cyane kandi buriya buri mwubatsi wese aba yifuza ko inyubako inyubako ye yagira ubudasa. Hari inyubako zisaga 1000 muri Kigali ziri ku rwego cg rurenze urwayo ariko byanagora kuzirangira umuntu.
4. Nsoreje ku bijyanye n’ubumenyi buke ku bya business y’inyubako byaranze abanenze cyane uyu muturirwa. Inyubako ihabwa agaciro n’ikiyikorerwamo cg amateka ibundikiye, si ingano yayo. Niyo mpamvu inyubako zikorerwamo na za ambassades zitinywa kandi urebeye inyuma zidakanganye, naho igorofa ribengerana ariko rikora akazi k’amacumbi aciriritse (lodges) nta gitinyiro ihabwa.

3
Alice 2019-04-15 08:16:13

Nhirayo nawe akwiye kwibazwa impamvu
Ubibonye we abyibazaho
Ubwose s’ikibazo?

Kubwanjye ni bibi rwose
Iyo nzu ikwiye kuba nka Nyabugogo
Si mu mugi rwagati.

4
Jolie 2019-04-15 04:46:54

Njye uko mbibona,nuko amarangi ubwayo simeza,kandi bigeretseho kuko ari icyirahure iyo ari kuzuba bimena amaso kuko njye narabibonye ,naho kuba yaba mabi cyangwa meza biterwa nibyo umuntu akunda.gusa ntibibangamire abandi.nukuvuga iyo biza kuba biri mu marangi asanzwe atari icyirahure ntacyo kubwange numva byagatwaye.

5
hassan 2019-04-15 03:49:16

ariko noneho ibi n akumiro nonese biriya biri kuri makaro ari kuri iriya nyubako ko bazabivanaho ntago mwabonye hepfo ko batangiye kubishishura ariko abanyarwanda n amatiku yacu ubu koko azatugeza he koko murabura kujya gukora mukabyukira mu matiku gusa

6
MM 2019-04-15 02:11:17

Ngayo nguko, noneho ibyiza byose bitatse umugi wa kigali bizajya biteza impanuka

7
Sano Brian 2019-04-15 02:08:48

Tuvugishije ukuri inonzu bayihaye amabara atajyanye rwose! UMUTUKU N’UMUHONDO koko?! naho ubundi inyubako yo ntacyo itwaye.

8
gashikazi gashumba 2019-04-15 01:50:32

Kandi aba bose barimo kuyirwanya wasanga nta na nyakatsi bifitiye bacumbitse. Ndumiwe koko

9
Ornella 2019-04-15 01:23:08

Inyubako iri sexy buriya nimeze gute? Ariko usibye ko naya marangi ntacyo atwaye cg wazashaka ikibanza cyiza nawe ukazubakamo iri sexy ifite namarangi wifuza murakoze.

10
Rutamu Partrick 2019-04-15 00:39:57

NGEWE AHUBWO MBONA YUBATSE MU MUHANDA KUKO UREBYE AHO FANTASTIC RESTAURANT IRI USANGA IRIYA INZU IRI MBERE CYANE NDAVUGA URUHANDE RWO HARUGURU. RWOSE MUBIREBE NEZA NIBA NTACYO IBANGAMIYE, BIRAMUTSE BIGARAGAYE KO IRI MU MUHANDA, UBWO HAZAMWO GUKEKA RUSWA ISANZWEIVUGWA MU IMYUBAKIRE, NAHO AMARANGI UWO YATUMA AKORA IMPANUKA YABA YARI ASANZWE ARI INDANGARE

Paji: 1 | 2 | 3  

Kwamamaza