Ibice bikurura ba mukerarugendo mu Rwanda bimaze kuba imari ishyushye yinjiriza igihugu amadevize, umusaruro ukaba warageze kuri miliyoni $404 mu mwaka ushize ndetse intego ni uko zaba $800 mu myaka irindwi iri imbere.

Ibiteganywa ni byinshi ngo u Rwanda rurusheho kuba icyerekezo cya ba mukerarugendo birimo kongera imari ishorwa mu bikorwaremezo byorohereza ubukerarugendo, guteza imbere serivisi zo kwakira abashyitsi ndetse abikorera bagahugurwa ngo barusheho gutanga serivisi nziza.

Kuri ubu, ubukerarugendo nyobokamana buza ku isonga mu gukoranya ba mukerarugenda baturuka imihanda yose, mu bijyanye na Pariki, iy’Akagera ikaza imbere mu gusurwa n’Abanyarwanda ugereranyije n’izindi.

1. I Kibeho, iwabo w’amabonekerwa

Ku musozi wa Nyarushishi mu murenge wa Kibeho ho muri Nyaruguru, habereye amabonekerwa ya Bikira Mariya ku bakobwa batatu ari bo Anathalie Mukamazimpaka, Alphonsine Mumureke na Marie Claire Mukangango, guhera kuwa 28 Ugushyingo 1981.

Ayo mabonekerwa amaze guhagurutsa abantu b’ingeri zose bajya kureba ibitangaza bya Bikira Mariya, kugera no ku byamamare nka Sergio Kün Agüero, rutahizamu wa Manchester City FC yo mu Bwongereza.

Ni ahantu hasurwa cyane n’ibihumbi by’Abanyarwanda baturuka impande n’impande, bamwe bagakora ingendo z’byumweru byinshi bagenda n’amaguru bagana i Kibeho kwa “Nyina wa Jambo.”

Ubuyobozi bw’Akarere ka Nyaruguru buvuga ko mu mwaka nibura hagera abantu babarirwa hagati y’ibihumbi 350 na 500.

Umuyobozi w’Akarere wungirije ushinzwe iterambere ry’ubukungu, Bisizi Antoine yabwiye IGIHE ati “Hari aho usanga nko mu munsi mukuru wa Bikira Mariya twakira hagati y’abantu ibihumbi 45 na 60, nibo twabaruraga kuwa 15 Kanama ku munsi w’ijyanwa mu ijuru rya Bikira Mariya.”

Binafitiye akamaro Akarere kuko ubu hamaze kugera ibikorwa bitandukanye by’iterambere, ku buryo abagiyeyo babona hoteli bararamo n’abacuruzi bakabona icyashara. Ibikorwa remezo byinshi kandi biracyubakwa.

Ubu Nyaruguru imaze kugira izina ritandukanye n’irya kera aho kafatwaga nk’akarere kabi katera, umushoramari Unilever ari guhinga icyayi no kubaka uruganda rugitunganya n’ibindi.

Kubera Kibeho kandi Abihayimana bahazanye amahoteri, amashuri y’inshuke, abanza n’ayisumbuye, ayigisha imyuga ndetse bita ku babana n’ubumuga bwo kutabona no kutumva.

Ubuyobozi bw’Akarere ka Nyaruguru butangaza ko mu mwaka nibura i Kibeho ahabereye amabonekerwa, hagera abantu babarirwa hagati y’ibihumbi 350 na 500

2. Kwa Yezu Nyirimpuhwe mu Ruhango

Hari mu 1992 mu mutambagiro w’Umunsi mukuru w’Isakaramentu Ritagatifu ubwo abarwayi bakiriraga mu isengesho ryo gusabira abarwayi ryabereye mu kigo nderabuzima cya Ruhango.

Byatumye haboneka abantu benshi bagarukiye Imana kandi abakirisitu benshi bagaragaza icyifuzo cyo kugira ababunganira kugira ngo bashobore gushinga imizi mu kwemera.

Abagize Communauté de l’Emmanuel biyemeje kujya bunganira buri wa Kane w’icyumweru, abaza mu isengesho bashaka gukira uburwayi bunyuranye. Buri cyumweru cya mbere cy’ukwezi cyagizwe umunsi w’isengesho ryo gusabira abarwayi no gusabira ibindi bibazo bitandukanye, ababyifuza bose ubu bakoranira mu Ruhango.

Byageze aho havuka igitekerezo cyo kuhubaka ahantu abantu bajya bahurira n’Imana bakiyunga nayo, hitwa ‘Urugo rwa Yezu Nyirimpuhwe’. Kuwa 6 Ukuboza 1998 nibwo Musenyeri Anastase Mutabazi wari umushumba wa Diyosezi ya Kabgayi yahaye umugisha urwo rugo.

Umuyobozi Wungirije w’Akarere ka Ruhango Ushinzwe Ubukungu, Twagirimana Epimaque, avuga ko gusengera mu Ruhango bimaze kuba igikorwa cyamamaye cyane kandi bifitiye akamari akarere.

Yagize ati “Iyo ahantu umunsi umwe haza ibihumbi 15, hari serivisi nyinshi baba bakeneye, ibyo barya, aho barara, ubushobozi bw’amafaranga bahasiga ni menshi, haba muri serivisi n’ibindi.”

Nibura ku cyumweru cya mbere cya buri kwezi, mu Ruhangio hakoranira imbaga y’abantu babarirwa hagati y’ibihumbi 15 n’ibihumbi 30, wakuba n’ibyumweru cumi na bibiri bakaba hagati ya 180 000 na 360 000.

Twagirimana yakomeje agira ati “Gusa nko mu cyumweru cy’Impuhwe z’Imana ho haba hari ibihumbi 70 gutyo, abo mu bindi bihugu baje cyane cyane Uganda, Repubulika Iharanira Demokarasi ya Congo, Tanzania n’u Burundi.”

Ruhango ifite n’ibindi bice bisurwa ku buryo buri hasi cyane, birimo Urutare rwa Kamegeri, Kwa Sebukwe wa Ngunda, kwa Mirenge ku Ntenyo…

3. Pariki y’Igihugu y’Akagera

Pariki y’Akagera ikomeje kuzamura umubare w’abayisura harimo n’abanyarwanda, kuva muri Gicurasi ubwo yongerwagamo Inkura, ku buryo iyi pariki ifite urusobe rw’inyamaswa eshanu zikomeye muri Afurika zirimo Intare, Inzovu, Imbogo, Ingwe n’Inkura. Irimo Inkura 18 n’Intare 19.

Umuyobozi Ushinzwe kumenyekanisha Ubukerugendo muri Pariki y’Igihugu y’Akagera, Sarah Hall, aheruka kubwira IGIHE ko Nyakanga kwabaye ukwezi iyi pariki yabonyemo amafaranga menshi kuva yabaho, kukaba ari n’ukwezi kw’impeshyi kuba kubereye ubukerarugendo.

Yagize ati “Nyakanga 2017 yagize umubare munini w’abantu basuye Pariki y’Akagera mu kwezi kumwe kuruta andi mezi. Ni nako kwezi kwinjije amafaranga menshi, asaga $200,000, akaba anaruta ayinjiye mu mwaka wose mu 2010.”

Muri uko kwezi konyine yasuwe na ba mukerarugendo 4978, muri Kanama isurwa na 3879, kandi nibura kimwe cya kabiri kiba kigizwe n’Abanyarwanda.

4. I Rubavu ku mucanga

Umujyi wa Rubavu ni icyerekezo gikomeye cya ba mukerarugendo haba ku Banyarwanda n’abaturanyi bo muri Repubulika Iharanira Demokarasi ya congo, ku buryo iyo uhatembereye wumva urunyuranye rw’indimi z’Ikinyarwanda, Lingara, Igifaransa n’Igiswahili.

Rubavu iganwa cyane kubera umucanga wo ku kiyaga cya Kivu nubwo hari ibindi bice bishobora gusurwa ku Gisenyi nk’uko hazwi kuva kera.

Imibare yerekana ko nibura mu 2015, i Rubavu hinjiye abakerarugendo 556211 muri 1 300 000 binjiye mu Rwanda.

Umuyobozi w’agateganyo w’Akarere ka Rubavu, Murenzi Janvier, yavuze ko Ubukerarugendo ari ingenzi cyane mu iterabere ry’ako Karere.

Yakomeje agira ati “Iyo baje bararya, bararara, amahoteli yacu n’abikorera bakabyungukiramo, birumvikana n’imisoro bishyura mu buryo bworoshye. Ari nayo mpamvu dufatanyije na RDB twagerageje kugenda tugaragaza ahantu h’ubukerarugendo abantu basura mu gihe bari i Rubavu.”

Mu bigomba kongererwa imbaraga harimo gutunganya umwaro w’ikiyaga cya Kivu, guteza imbere imikino ikorerwa mu mazi no ku musenyi n’ibindi.

U Rwanda kandi rwakira ba mukerarugendo benshi bajya gusura ingagi muri Pariki y’Igihugu y’Ibirunga, gusa imibare igaragaza ko Abanyarwanda atari benshi bitewe n’ikiguzi cyabyo, kimwe na Pariki y’Igihugu ya Nyungwe.

Umucanga wo mu nkengero za Kivu nawo ukurura benshi bashaka kwidagadura
Abakunda gutembera mu bwato nabo baryoherwa no gusura Rubavu ku Kivu
Imikino ya Kayaking ni imwe mu yitabirwa cyane n'abanyarwanda basura i Kivu
Ubuyobozi bw’Akarere ka Nyaruguru butangaza ko mu mwaka nibura i Kibeho ahabereye amabonekerwa, hagera abantu babarirwa hagati y’ibihumbi 350 na 500
Inyamaswa zigaragara muri Pariki y'Akagera nta handi wazisanga mu Rwanda
Umubare w'abanyarwanda basura Akagera ukomeje kuzamuka ubutitsa ugereranyije n'izindi Pariki


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved