Itsinda ry’abantu icyenda barimo abahanga mu kurira imisozi, kurengera idukikije n’abanyamakuru, bagiye kurira imisozi irindwi yo muri aka karere irimo Karisimbi, mu rugendo bazakora mu byumweru birindwi bagamije kwereka amahanga ko aka karere gafite ibyiza byinshi bibereye ubukerarugendo.

Carel Verhoef wagize icyo gitekerezo mu mushinga wiswe ‘7 Summits Africa’, yabwiye IGIHE ko Afurika y’Iburasirazuba ari ahantu heza, hafite imisozi miremire na pariki nziza z’ibihugu, ariko ugasanga ntiharaba icyerekezo cya ba mukerarugendo burira imisozi kandi naho ihari.

Mu rugendo rwabo bazatangirira ku Kirunga cya Nyiragongo muri Repubulika Iharanira Demokarasi ya Congo, bazamuke Karisimbi yo mu Rwanda, berekeze muri Kenya burire Mount Kenya, bakomereze mu rukurikirane rw’imisozi ya Rwenzori burire imisozi ya Stanley na Speke muri Uganda, basoreze muri Tanzania bazamuka imisozi ibiri ya Meru na Kilimanjaro.

Ni urugendo bazakora bagenda berekana ibyiza nyaburanga n’urusobe rw’ibinyabuzima umuntu abona iyo azamuka iyo misozi.

Biteganyijwe ko uru rugendo bazarwerekana uko ruri kugenda kuri paji yabo ya Facebook na konti ya Youtube ya 7 Summits Africa, hifashishijwe ‘smart phone’ zikoresha internet y’icyogajuru, ari nako buri muntu azaba afite akuma gatuma agaragara aho ageze.

Verhoef yakomeje agira ati “Ubutumwa bwacu ni uko muri Afurika y’Iburasirazuba ari ahantu heza, ariko abantu bazamuka imisozi ku Isi usanga bakomeza kujya ahantu hamwe nko muri Nepal (niho haba Everest), Alpes (urukurikirane rw’imisozi mu Burayi), Rocky Mountains muri Amerika, ariko ugasanga impamvu bataza kurira imisozi hano ni uko batazi ko ihari. Impamvu turi gukora uyu mushinga wa 7 Summits Africa, ni ukubwira Isi ko hari imisozi myiza muri Afurika y’Iburasirazuba bashobora kuzamuka.”

Yavuze ko ufashe imisozi iri muri aka karere ukarushaho kuyimenyekanisha hamwe na pariki ibi bihugu bifite zirimo ibinyabuzima nk’ingagi ziba mu birunga, byabyara umusaruro ukomeye kuri ibi bihugu.

Yakomeje agira ati “Iyi misozi tugomba kuyizamuka mu minsi 25, ariko umushinga wose hamwe ni iminsi 49 ingana n’ibyumweru birindwi tugenda mu mihanda, tuzamuka imisozi. Tuzaba tunasura pariki ziri hagati aho.’

“Twagiye tuzamuka imisozi buri muntu ku giti cye, twazamutse Kilimanjaro, Rwenzori twari twarayizamutse mbere. Kurira iyi misozi irindwi nta guhagarara twari tutarabigerageza ariko turi itsinda ry’abahanga mu misozi muri Afurika, nka Sibusiso Vilane, Ake Lindstrom, ni abantu b’abahanga mu kuzamuka imisozi.”

Kuri uyu wa Gatandatu nibwo iri tsinda ryerekeje mu Karere ka Rubavu gusura ikiyaga cya Kivu, kuri iki Cyumweru bagatangira kuzamuka Nyiragongo.

Nyuma abanyamakuru Jessica Flint na Patrick Thomas bazandika igitabo kuri uru rugendo uko rwakabaye, kimwe na Jacques van Tonder uzakoruraho filimi mbarankuru. Abandi bari kumwe ni Sally Grierson na Thommo Hart na Gabriele Brown.

Umuyobozi Ushinzwe kumenyekanisha ubukerarugendo mu Kigo cy’igihugu cy’iterambere, RDB, Mutesi Linda, yavuze ko iri tsinda ry’abantu bavuye mu bihugu bitandukanye, bakoze ikintu gikomeye gutekereza kuri Afurika.

Yagize ati “Ni ibintu twe nk’u Rwanda twifuzaga kuko iyo urutekereje ntabwo mu mutwe hahita hazamo kuzamuka imisozi, utekereza ibindi. Gusura ingagi, urundi rusobe rw’ibinyabuzima… Twebwe nka RDB turashaka kwereka Abanyarwanda, abo muri Afurika y’Iburasirazuba n’ahandi ko hari amahirwe yo kurira imisozi mu Rwanda, nk’ikintu dufite kidasaba ibintu byinshi kuko dufite imisozi myiza.”

“Aba bantu rero uko bamenyekanisha ko hari imisozi myiza, abantu baziyongera bazamuke ya misozi, barebe n’ibindi bintu byiza dufite mu Rwanda.”

Mutesi yavuze ko nubwo adafite imibare, Abanyarwanda bakomeje kuzamuka imisozi cyane cyane Bisoke na Karisimbi, ku buryo urugendo rw’aba bahanga rushobora kugira uruhare mu kumenyekanisha ubu bukerarugendo.

Yakomeje agira ati “Ni ibintu bihari kandi dushishikariza Abanyarwanda kubikora kuko dufite imisozi myiza, iyo ugeze hariya hejuru ukareba impande zose, ni ibintu byiza cyane.”

Aba bakerarugendo kandi bazagira umwanya wo kureba ibindi byiza nyaburanga igihugu gifite birimo nka Pariki y’Igihugu y’Akagera, imishinga yo kurengera urusobe rw’ibinyabuzima, ingagi n’ibindi.

Umuyobozi Ushinzwe kumenyekanisha ubukerarugendo mu Kigo cy’igihugu cy’iterambere, RDB, Mutesi Linda, yavuze ko iri tsinda ry’abantu bavuye mu bihugu bitandukanye, bakoze ikintu gikomeye gutekereza kuri Afurika
Abakora mu bukerarugendo mu Rwanda bari bitabiriye ikiganiro cyatangarijwemo iyi gahunda yo kurira imisozi
Carel Verhoef wagize icyo gitekerezo mu mushinga wiswe ‘7 Summits Africa’ hamwe na Jacques van Tonder uri gukora filimi mbarankuru
Itsinda rizazamuka imisozi mu rugendo rw'ibyumweru birindwi rugamije kwereka amahanga ko aka karere gafite ibyiza byinshi bibereye ubukerarugendo


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved