IGIHE

Abagore bari mu bukerarugendo bakangukiye kubyaza umusaruro amahirwe aburimo (Amafoto)

0 23-03-2019 - saa 13:47, Ishimwe Israel

Uhaye umugore ubumenyi aba arereye igihugu n’abatuye Isi mu binyejana bizaza! Ubukerarugendo nk’urwego ruri mu zinjiriza u Rwanda agatubutse abari n’abategarugori babuhawemo umwihariko mu kubyaza umusaruro amahirwe aburimo.

U Rwanda rufite abagore mu Nteko Ishinga Amategeko (61.25%) mu gihe 50% bari muri guverinoma na 40% mu nama njyanama z’inzego z’ibanze. Ntirwirengagijwe uruhare rw’umugore mu kwagura ubukerarugendo.

Mu bufatanye bw’u Rwanda na Leta Zunze Ubumwe z’Abarabu (UAE), abagore 100 bakora muri serivisi zo kwakira neza ababagana, abo muri hoteli, abayobora ba mukerarugendo n’abandi bahawe ubumenyi buzabafasha kugendana n’ibipimo mpuzamahanga muri uru rwego.

Aya mahugurwa yakozwe mu “Guha abagore 100 ubushobozi buzabaremamo abayobozi b’ahazaza mu rwego rw’ubukerarugendo.’’

Umwiza Joana utwara imodoka zitembereza abakerarugendo yavuze ko ubumenyi yungutse bwatumye we na bagenzi be biyemeza gukora cyane ngo batarebwa nk’abadashoboye.

Yagize ati ‘‘Hari ibyo batubwiye dusanga hari impinduka n’inyongera ikenewe. Twungutse ko dukwiye kwakira neza abatugana binyuze mu gutegura neza igihe cyo guhura n’umukiliya, serivisi umuha n’akarusho karengaho ku birenze ibyo yari yiteze. Batubwiye kumenya icyo umuntu yakongera ngo serivisi iryohere uwamugannye. Hari abakobwa bitinyutse ndetse bikanabakura mu bibasubiza inyuma.’’

Umuyobozi wungirije muri Palast Rock Hotel i Nyamata, Kamikazi Aurore, na we wahuguwe yavuze ko mu bukerarugendo hari amahirwe menshi.

Ati “Aya mahugurwa n’amahirwe ahari tuyakoreshe, twerekane ko dushoboye. Turi gushaka ibisubizo byo gukuraho imbogamizi zo kwitinya no kumva ko udashoboye. Twize kwihutisha serivisi no kubikora tubikunze.’’

Abahuguwe bemeza ko mu gihe serivisi zizanozwa abakiliya bazahora babagana banakangurire bagenzi babo kuza ku bwinshi.

Ambasaderi wa UAE mu Rwanda, Hazza Mohammed Falah Kharsan Al Qahtani, yavuze ko amahugurwa yatanzwe ashushanya uruhare rw’ubukerugendo mu bukungu.

Ati “Imikoranire ya UAE n’u Rwanda yatangiye kera aho bikorana mu mishinga itandukanye. Ibihugu byacu byizera ko ubukungu buhamye buzagerwaho binyuze mu mikoranire hagati y’umugore n’umugabo.’’

U Rwanda rwizeye kwinjiza miliyoni 800$ mu 2024 avuye mu bukerarugendo.

Minisitiri w’Uburezi, Dr Mutimura Eugène, yavuze ko urwego rw’ubukerarugendo rwakuze aho mu myaka ibiri ishize, umusaruro mbumbe w’igihugu wazamutse ugera kuri miliyoni 438$.

Ati “U Rwanda rwiyemeje guteza imbere ubukerarugendo bushingiye ku nama. Ibyo bizabaho mu gihe ababakira, bafatwa nk’urumuri bafite ubushobozi bwo ku rwego mpuzamahanga. Dushimishijwe n’ubumenyi abagore bahawe buzabafasha guteza imbere ubukerarugendo. Turabashishikariza kugira intego no gukora cyane. Ndizera ko imbuto zavuye hano zizagira akamaro.’’

Mu mitangire ya serivisi muri rusange, u Rwanda ruhagaze ku gipimo cya 74% mu gihe rwifuza kugera kuri 90% mu 2024.

Umuyobozi ushinzwe Ubukerarugendo mu Kigo cy’Igihugu cy’Iterambere (RDB), Belise Kariza, yavuze ko amahugurwa yateguwe mu guha umwihariko ab’ingeri zitandukanye mu kugaragaza amahirwe ari mu bukerarugendo.

Yagize ati “Urwego rw’ubukerarugendo ni rumwe mu zizana amadevise menshi. Ni ugutangira gutekereza uko abari n’abategarugori babyaza umusaruro amahirwe aburimo. Iyo ureze umugore biba ari iby’agaciro gakomeye. Tuzakomeza ubukangurambaga kandi tugomba gutanga serivisi zihanitse.’’

Aya mahugurwa y’iminsi itatu yabereye muri La Palisse Hotel Nyamata ku wa 18- 20 Werurwe 2019. Yateguwe na Guverinoma y’u Rwanda ifatanyije na UAE nyuma y’amasezerano y’ubufatanye yashyizweho umukono ku wa 8 Werurwe 2019, ubwo hizihizwaga Umunsi Mpuzamahanga w’Abagore.

Yanatewe inkunga na UAE Aid, Emirates Academy of Hospitality Management, Minisiteri y’Ububanyi n’Amahanga y’u Rwanda n’Ikigo cy’Igihugu cy’Iterambere (RDB).

Umuyobozi ushinzwe Ubukerarugendo mu Kigo cy’Igihugu cy’Iterambere (RDB), Belise Kariza, yavuze ko amahugurwa yateguwe mu kugaragaza amahirwe ari mu bukerarugendo
Umwiza Joana utwara imodoka zitembereza abakerarugendo yishimiye ubumenyi yungutse
Abahawe impamyabushobozi bari bafite akanyamuneza ku maso
Ambasaderi wa UAE mu Rwanda, Hazza Mohammed Falah Kharsan Al Qahtani, yavuze ko hari izindi nzego bateganya gukoranamo n'u Rwanda
Minisitiri w'uburezi Dr Mutimura yasabye abakobwa kwitinyuka

Amafoto: Muhizi Serge

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza