Zanzibar, mu Mujyi w’amateka y’ububabare bw’abacakara n’imiturirwa yihariye (Amafoto)

10 10-07-2018 - saa 12:09, Mugwiza Olivier

Zanzibar ibitse amateka yihariye muri Afurika n’inkombe zidagadurirwaho na ba mukerarugendo baturuka imihanda yose, uyitembereye atahana urwibutso rw’inzu zishaje zubatswe n’Abarabu zihamaze ibinyejana zidakorwaho.

Uyu mujyi ufite ubukungu bwubakiye ku nganda z’indyoshya ndyo, ubuhinzi bw’imikindo n’ubukerarugendo buganje mu buryo bwihariye cyane ko hanafatwa nk’icyanya cy’umwe mu mirage ikomeye yasizwe n’abakurambere ku Isi.

Nta mpungenge zo gutemberera mu bihugu bituranye n’u Rwanda kuko zose zakuweho n’ubwisanzure buganje muri iki gihe aho ushobora kujya mu biri muri Afurika y’Uburasirazuba utikandagira na gato cyangwa ngo utake umutwaro w’ibyangombwa n’umuruho wo gusiragira igihe kirekire ubishaka. Upfa kuba wifitiye pasiporo yawe uragenda ukarambagira aho ushaka.

Urugendo rujya muri Zanzibar uturutse mu Rwanda ni umunyenga mu wundi bikaba akarusho ku wagendanye na RwandAir kuko rushira wumva ukinyotewe no kudamarara urebera Isi ahirengeye.

Ibi byiyongeraho serivisi nziza ubona bikagutera akanyamuneza no kumva ko ukiri mu rugo nubwo bwose uba uri mu kirere cy’andi mahanga. Bihera ku cyayi baguha, ugasanga cyuje icyanga cyo mu rw’imisozi igihumbi, watumiza amazi ugasanganizwa Inyange, ibiribwa na byo ukitoranyiriza ibikugera ku nzoka.

Ndabyibuka neza twahagurutse i Kigali mu gitondo akazuba kamaze kurasa! Indege feri ya mbere yayifatiye kuri Kilimanjaro International Airport (KIA). Aho twahagaze nk’isaha imwe yongera gufata amavuta ari na ko abagenzi bamwe bavamo abandi binjira.

Dutemberane muri Dar Es Salaam gato…

Mu rugendo rwa kabiri twafashe ikirere twerekeza i Dar Es Salaam tugeze aho tuhitegeye ntungurwa no kubona uburyo ari umujyi wagutse cyane, ntangira kubona inzu nyinshi kandi nini, naterera akajisho hakurya nkabona n’amazi menshi cyane ari yo Nyanja y’u Buhinde.

Umubyigano uba ari wose aho abinjira n’abasohoka kuri Julius Nyerere International Airport bakirirwa, gusa kuba u Rwanda ruri mu Muryango wa Afurika y’Uburasirazuba ntako bisa pe! Abo muri ibi bihugu twari ku murongo wacu ndetse nta mwanya muremure twahamaze.

Uko Umujyi wa Dar Es Salaam wagutse ni nako ubonekamo ubucuruzi aho utambutse hose! Ni ha hantu ukibona amashashi ku muhanda, ntibitinda ngo ukubitane n’ucuruza ibiribwa abizunguza. Natunguwe no kubona n’ahari ingoro ziyubashye cyangwa mu duce twifite ibi na ho ari ko bimeze, bitandukanye no mu Rwanda aho isuku uyisanga hose.

Mbere y’uko nerekeza muri Zanzibar nabanje kujya ahitwa Slipway Beach hari Restaurent yitwa Thai Kani itegura amafunguro amenyerewe mu bihugu bya Aziya (Japanese, Seafood, Sushi) akenshi niho usanga abantu benshi bafata ayo mafunguro kandi bitegereza ubwiza bw’izuba riba ririmo kurenga rinyuze hejuru y’inyanja. Biba ari ibyiyumviro bidasanzwe ku muntu ubibonye ku nshuro ya mbere!

Iyo uhagurutse i Dar Es Salaam werekeza mu Kirwa cya Zanzibar ukoresheje ubwato narwo ni urugendo rushimishije cyane ko rukorerwa mu bwato mu Nyanja hagati rukamara amasaha agera kuri abiri.

Uru rugendo umugenzi aba asabwa kwishyura $50, $40, $25, bitewe n’aho ashaka kwicara, ariko njye nafashe umwanya wo hanze aho ngenda ndora neza amazi ndetse n’ibyambu ari na ko mbasha gufata amafoto.

Iyo uhagurutse i Dar Es Salaam saa moya za mu gitondo ugera aho ubwato buba butegereje abantu mu gitondo kare ukakirwa n’izuba riba rirasira hejuru y’amazi ku buryo ubona ari ibintu binogeye ijisho wongeyeho umuyaga wuzuye amafu ugenda wumva mu nyanja hagati.

Zanzibar ibitse amateka yihariye

Iyo utangiye gusatira Zanzibar ubona amato menshi atandukanye mu mazi hanyuma mwagera aho muviramo mukakirwa n’amagambo ari mu Kiswahili avuga ngo “Karibu Zanzibar” haba ari no ku cyambu, aho ubona amato manini ndetse na za kontineri nyinshi, ikintu cya mbere ukora ni ukunyura ku bashinzwe abinjira n’abasohoka hanyuma ukabona kwerekeza aho ushaka hose muri Zanzibar.

Uhita winjira mu Mujyi uzwi nka ‘Mji Mkongwe’ cyangwa Stone Town mu Cyongereza. Ufite umwihariko wo kurangwamo inzu zishaje cyane ku buryo udasobanuriwe ushobora gukeka ko ubwato bwabayobeje bukabajyana ahandi.

Akumiro kambereye ako kuwuzenguruka hose ngasanga huzuye inzu zishaje gusa gusa! Umwe mu bansobanuriye yambwiye ko habitse amateka ku buryo n’uhatuye atemerewe kuba yasenya ngo avurure cyangwa ngo ahindure uburyo inyubako iyo ari yo yose yaho yubatsemo.

Ni inzu ushobora gukeka ko ziyuburura bitewe n’uburyo ushobora kubona hoteli uyirebeye inyuma ugakeka ko ari inzu y’igisazira kitabamo abantu ariko wakwinjiramo gato ugatangira kubona ubwiza bwayo n’uburyo itatse bya gihanga bituma nta mukerarugendo utifuza kurara muri uyu mujyi nubwo hari ikindi gice cyatangiye kubakwa mu buryo bugezweho muri Zanzibar.

Iyi myubakire ngo ifitanye isano n’amateka maremare y’Abarabu ubwo bahageraga bwa mbere ariko igitangaje kurushaho ndetse kikaba umwihariko w’uyu mujyi ni uko hari n’uruvangitirane rw’inyubako z’Abaperesi, Abarabu, Abahinde n’Abanyaburayi bose bagiye bahafata mu binyejana bitandukanye. Ku bw’iyi mpamvu byanatumye uyu mujyi ugirwa na UNESCO igice cyihariye ndangamateka mu 2000.

Mji Mkongwe hari inyubako zifite amateka yihariye cyane nk’iyitwa House of Wonders izwi nk’ubuturo bw’abitwaga Aba-Sultan bagiraga ikuzo rya mbere ku myanya y’ubuyobozi muri Zanzibar. Ni yo nyubako izwi cyane muri uyu mujyi w’amateka yihariye.

Hanagaragara ibindi bice birimo nk’icyo uba witegeye iyo uri kwa Sultan kizwi cyane nka Old Fort cyangwa Ngome Kongwe kijya kugira ishusho y’ikibuga cy’umupira. Habitse amateka yo kuva mu kinyejana cya 17 ubwo Abanya-Oman baharwaniraga birinda kuhamburwa n’Abanyaburayi. Aha ni naho hakira iserukiramuco rikomeye rya film rizwi nka Zanzibar International Film Festival cyangwa ZIFF mu mpine.

Zanzibar yaruriye abirabura mu gihe cy’ubucakara

Amatsiko yanjye atarashira nageze ahandi hantu hari urusengero runini cyane rw’Abangirikani ruri ku muhanda wa Mkunazini ariko bivugwa ko rwahoze ari isoko rikomeye ry’abacakara!

Ni igice gifite amateka y’ububabare bukomeye ndetse rikaba rimwe mu isoko ry’abacakara ryo mu gihe cya vuba kuko hafunzwe n’Abongereza mu 1983. Abagurishwaga bahazanwaga baziritse bikomeye bakavanwa ahantu hatandukanye bari mu mato ku buryo uwagiraga uburwayi cyangwa intege nke yabaga yakwitaba Imana cyangwa akajugunywa mu mazi.

Muri aka gace hagaragara ibimenyetso bitandukanye by’icuruzwa ry’abacakara ndetse n’ibibumbano bigaragaza uko babohwaga ku biti biremereye hapimwa imbaraga zabo udatatse cyangwa ngo arire akagira igiciro kinini mu igura n’igurisha.

Hari n’ubuvumo bitakorohera n’ubutemberejwemo kumara iminota ibiri yumva agihumeka neza ariko ni hamwe mu hantu haruriye abacakara biratinda kuko bo bahafungirwaga igihe kirekire.

Iki gice kiranga ubucakara bivugwa ko bwamaze hafi ikinyagihumbi bukorerwa abo mu bwoko bwa ‘Bantu’ (Zanj) babaga mu bice muri iki gihe bituyeho Kenya, Mozambique na Tanzania.

Ibitabo bitandukanye by’amateka bigaragaza ko ubwo bucakara bwakorerwaga mu Nyanja y’u Buhinde bwatumye abagera kuri miliyoni 17 batwarwa bunyago mu bihe bitandukanye ndetse Abirabura babarizwa muri miliyoni eshanu bakagurwa n’Abarabu b’Abiyisilamu bavaga mu Burasirazuba bw’Isi kuva mu 1500 kugeza mu 1900.

Ifoto igaragaza izuba rirenga hejuru y'inyanja
Ku Nyanja y'u Buhinde witegeye Umujyi w'Ubucuruzi wa Dar es Salaam
Ubwato ba mukerarugendo batemberezwamo mu nyanja
Ku nkengero z'inyanja usanga hatuwe n'abifite
Amato manini akoreshwa mu bwikorezi butandukanye
Imwe mu miturirwa iri mu Mujyi wa Dar es Salaam
Mu gitondo cya kare izuba rirasira hejuru y'inyanja
Ibyombo bitwara imizigo itandukanye
Rumwe mu nsengero zikomeye muri Dar es Salaam
Uko Dar es Salaam igaragara iyo uhagurutse werekeza ku Kirwa cya Zanzibar
Ahacururizwa amafi arobwa mu nyanja
Amato atandukanye aba agana ku Cyambu cya Dar es Salaam
Dar es Salaam ikikijwe n'ahantu nyaburanga henshi
Bumwe mu bwato butwara abagenzi
Iyo ukigera Zanzibar, ubona icyapa kiguha ikaze
Zanzibar, ikirwa giteye ubwuzu kuri ba mukerarugendo
Icyambu cya Zanzibar
Ubwato bugezweho bwa Azam bujyanye abagenzi muri Zanzibar
Inzu yubatswe n'Abarabu mu myaka yo hambere
Zanzibar uhasanga inyubako za kera zubatswe mu gihe cy'ubukoloni
Zanzibar hari inzu nyinshi zihindurwa ahantu ndangamateka
Inzu zicururizwamo ibijyanye n'ubugeni
Mu Mujyi wa Stone uzwi nka "Mji Mkongwe" hari inzu nyinshi za kera
Stade yacururizwagamo abacakara mu gihe cy'ubukoloni
Imwe muri hotel yo ku Kirwa cya Zanzibar witegeye inyanja
Inzu nyinshi muri Zanzibar zigaragara nk'izishaje iyo uzirebeye inyuma
Iyo utembera muri Stone Town unyura hagati y'inzu nyinshi
Ba mukerarugendo baba basura Zanzibar ku bwinshi
Inyubako za kera usanga zigikingishijwe inzugi z'icyo gihe
Umwe mu mihanda iri hagati muri Zanzibar
Agace gakunda kuberamo ibirori bikomeye muri Zanzibar
Umunara wifashishwa na ba mukerarugendo bashaka kurebera Zanzibar hejuru
Kimwe mu birwa bito biba muri Zanzibar
Mu nkengero z'Ikirwa cya Zanzibar
Imwe mu nzu zibitse amateka menshi y'ubukoloni muri Zanzibar
Ku Cyambu cya Zanzibar hururukirizwa ibicuruzwa byinshi biturutse mu mpande zose z'Isi
Ibyombo binini bipakira n'ibizana imizigo biba biri ku cyambu
Inyubako z'abifite muri Zanzibar
Uko ubona Zanzibar uhagurutse werekeza Dar es Salaam
Uko Dar es Salaam igaragarira ba mukerarugendo bavuye Zanzibar mu masha y'umugoroba
Ikirwa kiri hagati mu Nyanja y'u Buhinde
Ba mukerarugendo bavuye muri Zanzibar binjira muri Dar es Salaam
Kamwe mu duce turi Dar es Salaam, ba mukerarugendo baruhukiraho
Abaherwe bafite agatubutse bubaka ku nkengero z'inyanja
Ba mukerarugendo baryoherwa n'amahumbezi yo ku Nyanja y'u Buhinde
Akabari kari ku mazi ahakorerwa ibirori bitandukanye muri Dar es Salaam
Ba mukerarugendo bakimara kuva mu bwato bubavanye gutembera mu nyanja
Abana bato bazana n'ababyeyi babo kwidagadurira ku nyanja
Usanga ba mukerarugendo benshi banezezwa no kugenda muri uyu mucanga n'ibirenge

Amafoto: Olivier Mugwiza

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
freddy 2018-07-11 19:50:07

Waou, igihe muri aba mbere ku nkuru ndetse n’amashusho.Murakoze kudutembereza Zanzibar abenshi ntabwo tuhazi.

2
Toto'o 2018-07-11 13:31:04

Muzstweteke na mombasa

3
Rwamasirabo 2018-07-11 10:26:44

Dore umujyi ninyubako ureke za nyakatsi mwirirwa murata ngo za convetion center. hahhhhhh

4
mahoro 2018-07-11 02:49:12

oh niheza pe simbigaye cyane gusa muge munandika kurwanda cyane

5
MURINDANGABO Gilbert 2018-07-11 01:48:01

hhhhhhhhhhhhhhhhhhhhhhhhhhh nizereko iyinkuru ifite icyo ihatse (marketing.com )ahubwo x kuki utahereye kugihugu cyawe ukimenyekanisha cyane cyane ko aricyo uzi kurusha ahandi hose?

6
Emmy 2018-07-11 00:15:50

Mbega ahantu heza harakaze wagirango niburayi wakoze

7
Mateka 2018-07-10 23:48:22

Nta bwoko bwa"bantu"bubaho,koko nawe w umunyarwanda uravuga ibyo?twese turi abantu utari umuntu ni igisimba,rero mujye mureka gukoresha imvugo z abazungu buzuye ubuswa bwinshi baduhimba amazina,kuberako tuvuga"abantu" naho mu giswahiki bakavuga"bantu"niho izo rutuku zabivanye ziti reka tubite"bantu"kuko ariryo jambo bakunze kuvuga,nyamara tubivuga kuko nyine turi abantu"humans"ubwo se hari ubwoko bwita"humans"muri iyi si butari abatuye isi nyine?rero rwose ntimukagendere mu bujiji bw abo bazungu,ikindi nibyo amateka ya abacu tugomba kuyiga tukareka ibyo by abazungu ngo napoleon,uziko koko ubukoroni bwasigaye mu mitwe ya benshi koko,ibaze ukajya kwiga ngo napoleon pe ntacyo mupfana,ni umwicanyi wishe bene wanyu abajyana mu bucakara ariko warangiza ukamwiga nk igihangange pe,nyamara twifitiye intwari nka ba Ruganzu ariko ntitubige pe.njye nasanze Afrika yicwa ni uko abafata ubutegetsi buzuyemo ubukoroni mu mitwe yabo bakadusunikiraho ubwo bukoroni bubarimo nyine,ugasanga dupfuye rubi.ubu ndibuka uko nigaga ngo inganda za brazil ziri aha naha,erega koko bakabitangira amanota,ubu ninaza icyo byamariye ngaheba pe,nyamara iyo niyigira Imana y i Rwanda yayoboye abakurambere ubu narigukura nyitinya nkamenyako ariyo inkingira Ikandagira,ko ariyo ngomba kuragiza igihugu yampaye nkamenyako abatayisenga basenga ibigirwamana bityo nkayinambaho,naje kubimenya nyuma ingiriye ubuntu,ubu niyo ntinya gusa kandi niyo buzima bwanjye.

8
Mami 2018-07-10 07:44:54

Aya mateka ya bene wacu kuki tutayiga? Ugasanga twiga Napoleon Bonaparte, Mussolini, ba Stalini.. Niba dushaka kuvuga independence koko tubanze tumenye amateka yacu koko. Mineduc igire icyo ikora kabisa.

9
Baurice 2018-07-10 06:28:39

Mwiriwe.

Nizereko mu meze neza. Nejejwe nukuntu abanyamakuru b’igihe.com bazi kwandika inkuru Neza. Rwose Olivier urumuhanga rwose. Niz reko Zanzibar babishyuye kuko ubakoreye advertisement cyane.

10
john 2018-07-10 05:35:49

uradutembereje kabisa. Asanti sana

Kwamamaza